一百年前,一個十九歲憤青,兩粒子彈,引發一場世界大戰!

一百年前,一個十九歲憤青,兩粒子彈,引發一場世界大戰!

外面嘈到拆天,老夫趁機靜靜雞咁剛剛睇完英國作家TIM BUTCHER上個月所出本新書,叫做The Trigger: Hunting the Assassin Who Brought the World to War,依家就向大家報告讀完心得。

TIM BUTCHER根據呢個十九歲憤青一百年前所經過嘅足跡,自己再次在波斯尼亞及塞爾維亞進行實地考察及採訪,獲得唔少第一手資料,揭開呢個刺客百年來被蒙罩嘅迷霧,追尋到呢個憤青短暫一生嘅歷程。

憤青普林西普(Gavrilo Princip)原係生長於波斯尼亞一個塞爾維亞族貧苦農奴家庭,如果佢按照父輩足跡,佢只不過會係一個默默無聞嘅農奴,唔可能會在佢十九歲幹下驚天動地一番舉動。

改變佢生命軌跡發生在佢十三歲,因為佢大佬早年到大城市打工,有能力供佢到首府薩拉熱窩讀書,佢就響呢一年由佢老竇陪同首次走出鄉村,去到大城市薩拉熱窩,呢個鄉下仔就咁開左眼界。

第一年普林西普在薩拉熱窩讀書成績極佳,但係之後幾年就成績續年下降。點解?原來佢深受當時世界各國民族主義思潮影響,已經參與左當時潛伏在薩拉熱窩斯拉夫民族主義秘密組織,於是無心向學矣!

我地有必要了解當時波斯尼亞狀況,波斯尼亞如同巴爾幹半島其他地區一樣,自中世紀以來就一直被外族所侵佔,其中土耳其佔據時間最長,達四百幾年,到十九世紀末,土耳其勢力沒落,波斯尼亞呢個空間就由奧匈帝國來佔領。

普林西普及其同黨所進行活動乃係旨在尋求波斯尼亞脫離奧匈帝國呢個異族嘅統治,在佢十七歲果年,佢離開波斯尼亞到塞爾維亞首都布爾格萊德,塞爾維亞王國當時係巴爾幹地區唯一獨立嘅斯拉夫國家,唔少波斯尼亞青年視塞爾維亞為祖國,普林西普到塞爾維亞取經,就不足為奇矣!

普林西普在布爾格萊德同當地極端組織發生聯繫,並獲得該組織給予手槍及手榴彈支援,鼓勵普林西普返回波斯尼亞食大茶飯。

普林西普一九一四年五月底返回薩拉熱窩,並設法偷帶所有手槍及手榴彈入境,佢連同其他四名與佢年紀相同憤青要刺殺對象係奧匈帝國皇儲法蘭茲•斐迪南大公,因為斐迪南大公確定在六月廿八日到薩拉熱窩進行訪問。

革命有各種唔同手段,點解普林西普呢班憤青會採取暗殺呢種手段?呢個同十九世紀中葉以來所流行暗殺思潮有關。

就連遠離歐洲之東亞都深受呢種暗殺思潮所影響。例如孫大炮佢所領導革命組織就進行過多次暗殺任務,其中最著名就係大普林西普十一歲之汪精衛在一九一零年帶埋同黨潛入北京企圖刺殺攝政王載灃。

在此之前,朝鮮革命黨人安重根在中國東北哈爾濱成功刺殺架相伊藤博文,可見刺殺風潮流行之廣也!

在六月廿八日當天上午,斐迪南大公夫婦乘坐座駕在薩拉熱窩巡視,普林西普一個同黨首先發難,向斐迪南大公座駕掟左枚手榴彈,但係手榴彈延後爆發,淨係傷及斐迪南大公後面隨員。

唔知點解,斐迪南大公夫婦仍然按原定行程到市政廳參與歡迎儀式,其後仲要到醫院探視傷者,點知個司機唔識路,居然咁啱駛到普林西普埋伏地點,普林西普見到斐迪南大公夫婦同佢得幾尺距離,機不可失,即刻衝上前開槍,第一槍就打中斐迪南大公,第二槍就打中斐迪南大公老婆蘇菲亞,全部擊中要害,斐迪南大公夫婦都係一彈畢命!

奧匈帝國事後指責呢鑊嘢幕後黑手係塞爾維亞政府,亦以此為藉口向塞爾維亞宣戰,但係根據歷史事實,塞爾維亞政府同呢單嘢並冇直接關聯,向普林西普提供武器係塞爾維亞某D政治態度激進軍官,塞爾維亞政府上層係想盡辦法要同奧匈帝國改善關係,但係塞爾維亞政府被逼食死貓。

普林西普被捕後,本來按照佢罪行,判十次死刑都唔奇怪,但係根據奧匈帝國法律,犯人唔足廿歲係唔可以判死刑,所以普林西普逃過死刑呢劫,被判監廿年,到一九一八年四月,距一次大戰結束仲有半年,普林西普在獄中因患結核病而死亡,未能見到和平降臨。

普林西普在法庭上聲言佢呢次刺殺係為求波斯尼亞脫離異族奧匈帝國統治,在巴爾幹地區建立一個獨立嘅南斯拉夫國。

一次大戰結束後,果如普林西普生前所願,南斯拉夫王國正式成立,但係南斯拉夫呢個國家真係多災多難,一九四一年二次大戰期間,納粹德國入侵南斯拉夫,南斯拉夫亡國。

二次大戰後,鐵托所領導共產黨奪得南斯拉夫政權,但係到一九八零年鐵托瓜老襯之後,南斯拉夫即發生危機,九十年代初,蘇東波一衝擊,南斯拉夫就解體,仲發生多場血腥內戰。

而內戰進行得最慘烈地點就係普林西普生前活動主要地區波斯尼亞,何以會咁?波斯尼亞其實有三個唔同族群,計有穆斯林族,約占總人口43.5%;塞爾維亞族,約占總人口31.2%;克羅地亞亞族,約占總人口17.4%。三族分別信奉伊斯蘭教、東正教和天主教。

由一九九二年到一九九五年,波斯尼亞發生滅族式大屠殺,主要係塞爾爾亞族對穆斯林族進行屠殺,克羅地亞族雖然與塞爾維亞族不和,但係亦有份參與屠殺穆斯林族,呢場內戰究竟死左幾多人,至今成謎,估計在廿萬人,目前在波斯尼亞仍然繼續發現到被屠殺穆斯林族屍體。

而對普林西普評價亦因為南斯拉夫局勢動盪而有多次改變,一次大戰後南斯拉夫王國建立,視普林西普為民族英雄,在佢行刺地點設立紀念碑。到納粹德國入侵南斯拉夫,呢個紀念碑被拆除,送左俾希特勒做禮物。

鐵托建立南斯拉夫共黨政權後,又再在行刺地點設立紀念碑,極力讚揚普林西普為革命分子,但係到南斯拉夫解體,波斯尼亞爆發族群廝殺,穆斯林族將紀念碑拆除,並破壞普林西普墳墓,穆斯林族視普林西普係恐怖分子。

同一個普林西普,一百年來評價一變再變,令人感概者也!

波斯尼亞發生族群屠殺係有歷史根源,波斯尼亞曾被土耳其統治四百年,所以會有唔少波斯尼亞人信奉回教,佢地在土耳其庇蔭下,唔少成為地主,而塞爾維亞族則多係農奴,受到穆斯林族長期剝削迫害,所以兩族之間有好深仇恨,九十年代波斯尼亞爆發內戰,塞族就趁機報呢個幾百年冤仇。

一百年前,呢個世界係由幾個大國所主宰,計有英國,法國,俄國,再加上三個新興工業強國:德國,米國及日本,一百年後,英國法國經過兩場大戰,元氣大傷,冇咁威猛,俄國經過共黨革命,又經過蘇聯解體,上上落落,依家正在掙扎緊要再度成為強國,德國及日本雖然係戰敗國,但係戰後復興,依家同樣舉足輕重,而米國就繼續執牛耳地位,無人能挑戰其領導也!

一百年前有個國家雖然係戰勝國,但係被當作戰敗國看待,呢個就係中國,一九一九年凡爾賽和會將德國在中國山東權益轉移俾架頭,引發北京五四運動,亦為建立共產黨做左準備。一百年後,中國再唔係任人宰割,正在邁向富強道路中,據講冇幾耐就會成為世界第一經濟體系,取代米國佬百年未曾動搖過之地位,是耶?非耶?

一百年前,國家矛盾,民族矛盾,宗教矛盾係亂源,一百年後,呢種現象變本加厲,並冇改善,嗚呼!

八十年代有阿富汗,九十年代有波斯尼亞,都係回教極端分子練武好基地,九一一事件中參與者當中就有人去過波斯尼亞同塞爾維亞人揮過!