中華民國南京臨時政府始末

中華民國南京臨時政府始末

1911年10月10日武昌起義爆發後,革命烽火迅速蔓延,在全國二十二個行省當中,到11月27日,先後有十五個行省及上海宣布獨立,而尚在清廷統治下,就得直隸(河北)、山東、河南、甘肅,新疆及東北三省而已。

武昌起義

各獨立省分別成立軍政府或都督府,都督為一省嘅最高軍政首腦,一般應該係一省一督,但係革命居然鬧出雙胞胎甚至三胞胎。

例如江西是先後有九江及南昌起義,就產生左九江都督及南昌都督,四川則有四川都督(駐成都)及蜀軍都督(駐重慶)。

在江蘇省就出現蘇軍都督、鎮江都督及江北都督,一省而有三督,可見革命情況之混亂矣!

本来在武昌城頭槍聲響起之前,參加革命係要殺頭兼抄家滅族,革命成本極高,人人爭相閃避,例如武昌起義前夕,革命黨人劉復基及彭楚藩被拉,立即斬頭示眾,真係觸目驚心也!

革命黨人劉復基及彭楚藩被斬頭

但係依家睇到清廷束手無策,落井下石,人人都識得做,原本支持清廷班立憲派人馬紛紛搖身一變就成為革命黨,就連清廷信任重臣如袁世凱,亦偷偷與革命黨講數,革命成功,但係革命隊伍龍蛇混雜唔再純潔,咁就使辛亥革命變成半吊子革命矣!

中國各地舉起革命義旗,但係又各自為政,並冇一個統一指導機構或議事機構,極感不便也!

於是同盟會宋教仁及于右任等人就提議仿效米國立國之初舉行十三州會議經驗,由各省舉派代表到上海共同磋商,佢地據此發出通告。

宋教仁

所謂英雄所見略同,鄂軍都督黎元洪、蘇軍都督程德全及浙江都督湯壽潛亦分別提出類似主張。

鄂軍都督黎元洪

黎元洪於11月9日通電各省派全權委員赴武昌組織臨時政府,但係程德全與湯壽潛則於11月11日聯電滬軍都督陳其美,主張各省在上海集合商議,變成商議臨時政府地點都鬧出雙胞胎!

蘇軍都督程德全

浙江都督湯壽潛

但係,畢竟上海歷來係革命勢力較為活躍地方,上海方面所發出通電有較大號召力,到11月15日,除廣東、廣西及江西代表去左武昌,共有十省代表到達上海。

呢十省代表在上海舉行第一次會議,議決將會議名稱定為「各省都督府聯合會」。

不過,武昌方面堅持呢個聯合會應該移到武昌開會,並派出代表到上海力勸各省代表去武昌,結果大部分代表又決定移到武昌開會,每省各留一名代表在上海組織通訊機構,聯絡聲氣。

各省都督府代表到達武昌後,於11月30日假漢口英租界順昌洋行召開一次會議,到會共十一省,廿三人(湖北四,山東二,福建一,湖南二,廣西一,四川一,安徽三,浙江四,江蘇三,直隸一,河南一),推舉湖南代表譚人鳳為會長。

會長譚人鳳

武昌代表會主要任務係要成立臨時政府,12月2日,決定起草《臨時政府組織大綱》,第二日呢個大綱就匆匆咁通過,因為袁世凱所領導北洋清軍已經佔據漢陽及漢口,武昌岌岌可危也!

就在同一日,南京被革命軍光復,在武昌呢種危城召開臨時政府會議根本就唔安全,於是在武昌代表又紛紛趕赴南京矣!

12月12日到達南京有十七省代表四十五人(江蘇二,浙江五,山西三,陝西二,安徽三,湖北五,湖南四,四川二,雲南三,山東一,江西五,福建二,廣東二,廣西二,奉天一,直隸二,河南一)。

呢次大會選出浙江代表湯爾和為議長,廣東代表王寵惠為副議長,王寵惠在香港荷理活道出世,皇仁書院畢業,係香港本土人。

浙江代表湯爾和

皇仁仔王寵惠

上海革命派與湖北立憲派兩派勢力在會上鬥到阿媽唔認得,革命派先係推舉黃興為「大元帥」,黎元洪為「副元帥」,但係後來俾立憲派推翻,改黎元洪為「大元帥」,黃興則為「副元帥」。

黃興

正當南京會議嘈到拆天之際,有個人就在呢個關鍵時刻由海外趕到上海,佢就係孫大炮中山先生是也!

孫大炮中山先生

孫中山係在聖誕節到達上海,佢當日朝早由胡漢民陪同下,踏上上海外灘金利源碼頭,咁就結束左老孫流亡海外十八年生涯,佢與同行胡漢民等人乘汽車到法租界寶昌路408號暫住。

上海外灘金利源碼頭

老孫一回國,南京會議上革命派與立憲派有關臨時政府首腦人選爭議即刻停頓,大部分人都認為呢個寶座應該由老孫坐上,雖然武昌革命與孫大炮冇乜直接關係,但係老孫畢竟係第一個人提出推翻滿清建立共和者也,唔由佢來做共和國總統,仲有邊個有資格過佢呢?

孫中山在上海

老孫抵達上海第二日,就召集自己友同盟會骨幹開會,討論選舉及組織政府問題,即使係革命同盟會內部意見都係唔統一,焦點係在臨時政府係米國式總統制定係法國式內閣總理制。

孫中山在上海召集同盟會骨幹開會

宋教仁堅決主張內閣制,而老孫及大部分革命黨人則主張總統制,經過一輪激辯後,宋教仁屈服,最後確定左總統制而非內閣制,推舉孫中山與黃興為臨時總統候選人,跟住又開會討論左臨時政府組織大綱。

12月29日上午10點鐘,各省代表在南京舉行選舉臨時大總統,由十七省代表按一省一票規定,由會議主席湯爾和逐呼省名,挨次投票。

各省代表投票選總統

選舉結果係:孫中山得十六票,黃興得一票,老孫以壓倒性票數獲選為革命政府臨時大總統,係中國幾千年歷史以來首次用選舉形式推出國家元首,雖然尚非係一人一票普選,但係意義已經非凡也!

孫大炮眾望所歸

在同一日,同盟會本部在上海外灘匯中飯店,即係依家上海南京東路外灘和平飯店南樓召開左歡迎孫中山大會,就係在呢次會議上,傳來左南京選舉結果,孫中山當選為臨時大總統。

上海外灘匯中飯店(今和平飯店南樓)

1912年1月1日上午10時,孫中山從上海起程前往南京。呢次老孫赴任,聲勢浩大。在上海北站,滬軍都督陳其美、民政長李平書已在寒風中等候多時。仲有專程由南京趕赴上海迎接嘅17省代表湯爾和、王寵惠、宋耀如等,一時間雲集萬人。

滬軍都督陳其美

孫中山一行抵達上海北站時,上海各軍隊已先期集結,擎槍排列。孫中山先與歡送者代表合影,然後登車,擔任列車警衛係滬軍敢死隊45名隊員,11時,列車啟動,鳴炮示慶,響徹上海上空。

孫中山在上海北站

孫中山抵達南京時,天氣陰冷,不時飄著陣陣細雨,總統府大門前廣場上華燈高照,各省代表及將領等候多時。孫中山從容走下馬車,一手持帽,微笑著與大家握手寒暄。

南京臨時大總統辦公室

有記者針對當時有報導話佢從海外帶回30萬元鉅款而提出問題,孫中山則講:「我呢次回國,身上係不名一文,我所帶回係革命精神。」老孫話音未落,頓時掌聲四起。

孫中山進入總統府大禮堂,當晚22點鐘,臨時大總統就職典禮就在呢處舉行,各省代表、將領及各國領事等200多人參加。

軍樂奏過,山西代表景耀月向與會者報告大總統選舉經過,然後高呼:「請大總統宣誓就職。」孫中山在大家注目下,緩緩走向前,用廣東口音北京話大聲朗讀誓詞:傾覆滿洲專制政府,鞏固中華民國,圖謀民生幸福,此國民之公意,文實遵之……

孫中山就任大總統

緊接著,致頌詞、歡迎詞,授大總統印,致答謝詞,一系列程式完成後,孫中山宣佈臨時政府五項施政方針。南京炮臺鳴炮21響,下關江面軍艦拉響汽笛。在呢個南京城不眠之夜,中國歷史上第一個共和制國家政權誕生矣!

同時,孫中山宣布改國號為中華民國,以代表漢、滿、蒙、回、藏五色旗為國旗,定西元1912年為中華民國元年。1月3日,又選舉黎元洪為副總統,由九個部總長、次長組成內閣。

五色國旗

臨時政府內閣九個部總長當中,同盟會成員得佔三席,而立憲派及舊官僚卻佔六席,老孫實際上係個空頭總統,對內閣並未能完全掌控也!

臨時政府最高立法機構係參議院,但係當時各省並未具備普選條件,於是規定每省三名參議員由各省都督去決定。

到1月下旬,十七省推出參議員到達南京,佢地在12月8日宣告成立參議院,公推福建參議院林森為議長。

林森

參議院成立目的係要起草《中華民國臨時約法》,呢個亦係中國歷史上第一部共和國憲法。

本來呢部《臨時約法》規定係總統制,但係在起草途中,傳來清帝退位,老孫辭職讓位俾袁世凱,於是又急急改為責任內閣制,內閣向議會負責而非向總統負責,目的係希望可以管束「野性難馴」嘅袁世凱。

後來事實證明呢部《臨時約法》只係一部紙上憲法,對袁世凱冇任何約束力,袁世凱想點就點,根本就視《臨時約法》如無物也!

講到孫中山讓位俾袁世凱,好多人至今難以理解,革命黨打生打死所奪來天下,何以袁世凱不費吹灰之力就可以奪取全國最高權力?

早在孫中山到達上海當日,老孫已經表明佢會係一個過渡期大總統,總統寶座係準備虛位以待,呢個唔係老孫謙虛,而係受到當時中國政治真實局面所制約。

武昌起義雖然成功,但係各省起義軍多係烏合之眾,並未具備統一全國實力,而最有實力係由袁世凱所掌控嘅北洋軍,如果北洋軍唔支持革命,堅持要維持滿清統治,咁中國勢將陷入內戰。

更加重要係一個錢字就足以困死孫中山,南京臨時政府雖然成立,但係並冇中央政府真正地位,各省起義獨立後,所有稅收均落入各省自己口袋中,南京臨時政府收唔到半毫子地方稅收。

當時臨時政府財政極其拮据,各地戰事未斷,軍費開支浩大。總統府秘書長胡漢民後來在自傳記述,一次安徽前線軍情告急,急電中央索餉,孫中山朱筆一批,撥款20萬元,但係當胡漢民手持總統手批前去財政部撥款時,先至發現國庫內得10枚銀元而已!

胡漢民

當年跟隨孫中山一起回國軍事顧問米國佬荷馬李將軍要回國,孫中山想發薪金俾他,但係就連100蚊都攞唔出!

米國佬荷馬李

本來臨時政府尚寄希望於在華各列強銀行團借款,但係列強銀行團卻係睇好袁世凱,已經私底下同袁世凱講緊數,只要老袁做到總統,列強借款自然滾滾而來矣!

袁世凱獲得列強銀行支持

孫大炮冇講大話,佢的確一分錢都冇帶到就由海外趕番來就任臨時大總統,淨係靠所謂「革命精神」係無法進行實質管治,臨時政府莫財,當然要讓位俾財大氣粗之老袁矣!

孫大炮在南京五行欠水

就連同盟會內部都有人勸孫中山讓位,其中最起勁就係「引刀成一快,不負少年頭」果位汪精衛,佢本來在北京坐緊籃,武昌起義後,袁世凱即刻放佢出來,贈予重金並且同佢密談。

二五仔汪精衛

汪精衛南下見孫中山,在佢面前猛講老袁好話,認為今後中國必須要由有銀有槍老袁來統治,同盟會唔少同志亦持相同意見,老孫想賴死做總統都唔得矣!

2月12日,當代曹操袁世凱果然軟硬兼施迫到清帝溥儀退位,按照南北協議,孫中山在次日宣布辭職,並舉老袁繼任臨時大總統。

孫中山在南京接見袁世凱談判代表唐紹儀

4月1日,孫中山正式解除大總統職位,臨時政府在袁世凱壓迫下遷往北京,存在三個月時間南京臨時政府就咁結束,中國第一個共和國到此名存實亡矣!

南京臨時政府係模仿歐米國家共和制第一個試驗品,試驗期得三個月就收皮,之後中國就再冇出現過類似試驗矣!

從辛亥革命各省獨立開始,中國進入長期分裂混亂之中,袁世凱之後其他中華民國政權都未能直接統治整個中國,例如號稱統一國民政府只能收到五個省稅收。

辛亥革命並冇重新建構社會結構,參加辛亥革命更多係軍人,舊式官僚,各地士紳。佢地在辛亥革命後仍然掌握權力。雖然革命主要領袖孫中山係出身平民知識份子,但係中國貧窮平民階層冇參加辛亥革命,因此辛亥革命後,生存條件並冇發生根本性改變。

辛亥革命後軍閥割據,大量戰亂及軍人政治使傳統擁有知識及功名士紳官僚力量漸衰,代之而起係具軍事背景人物以及地方土匪惡霸。

 一直要到1950年代,先至由萬惡中國共產黨使中國大陸再度統一,並全面消除民國以來各種混亂局面,大陸各省稅收首次都要向北京進貢,中央政府具備真正實力,中國現代化軍事及經濟發展乃得以進行矣!

中國近代革命之起伏及波折,世上罕見也,此亦證明中國國情複雜也!

搞中國革命少D奸謀都會冇命,天真無牙者最好遠離,否則瓜左都唔知爲乜也!