中蘇共分裂始末

中蘇共分裂始末

話說1958年7月31日下午,北京南苑軍用機場上空出現左一架蘇聯大型客機,呢架客機好快就降落機場跑道上,客機停頓後,機艙門一打開,大家就睇到一個又肥又矮又禿頭嘅俄國佬一馬當先咁走左出嚟,佢係邊個呢?佢就係蘇聯共產黨總書記兼蘇聯政府總理赫魯曉夫是也!

赫魯曉夫匆匆落機後,就受到以毛澤東為首嘅中共中央政治常委歡迎,大家經過簡短握手及寒暄之後,就各自坐上汽車,離開機場進入北京城。

大家睇到呢度,可能會覺得好奇怪,赫魯曉夫畢竟係一國之君,佢係蘇聯黨政第一把手,以佢呢種身份地位,點解呢次到達北京,機場並冇任何符合佢身份地位嘅歡迎儀式,例如冇奏國歌,冇檢閱儀仗隊,冇發表演說,更加係冇群眾歡迎場面,何以會咁呢?

查實呢次赫魯曉夫嚟北京,唔係一次正式嘅訪問,而係一次秘密嘅訪問,點解赫魯曉夫會有呢次秘密訪華呢?原來佢急急要嚟北京係同最近中蘇之間發生左兩鑊爭論有關。

第一鑊係長波電台事件,原因係蘇聯在1957年底研製核子潛水艇成功,第一艘核潛艇已經下左水,蘇聯計劃派核潛艇去太平洋及印度洋活動,但係有個問題,就係蘇聯本土嘅長波電台因為距離太遠,冇法子聯絡到在太平洋及印度洋活動嘅蘇聯核潛艇。

蘇聯軍方就建議不如在中國海南島建造長波電台,於是蘇聯政府就向北京提交一項建議書,內容係話由蘇聯出全部資金及技術,中國出土地及人力,建造咁樣嘅長波電台,電台建成之後,由中蘇兩國共同使用。

呢份建議書送到毛澤東手中,佢一見到「由蘇聯出全部資金」呢句說話,內心覺得唔舒服,就大筆一揮,改為由中國出全部資金,蘇聯出技術,以此來回答蘇聯。

蘇方睇到毛澤東答覆,又覺得唔舒服,就提議由蘇方出四分三資金,中方出四分一資金,但係毛澤東唔肯,堅持要中國出全部資金,蘇聯就話最後退多一步,中蘇各出一半,但係毛澤東死都唔制,堅持要由中國出全部資金。

點解會為左出資金而起爭執呢?呢個世界上,無論任何嘢都係邊個出錢,邊個就係阿爺,邊個就有話事權。長波電台亦係咁樣,呢個電台畢竟係建造在中國領土之內,毛澤東非要出全部資金不可,否則就無法擁有控制呢個長波電台嘅主權。

另外,一個人窮最忌就係驚人地話佢冇錢,蘇聯第一次提議中開頭就講明由蘇聯出全部資金,毛澤東會敏感到覺得俄國佬係嘲笑中國莫財,所以佢會一開始就對建造長波電台起極大反感。

點知一波未平,一波又起,中蘇之間就長波電台仲未達成協議,呢個時候兩國又再起爭執。原因係中國大陸海軍知道蘇聯老大哥已經研製成功核潛艇,希望老大哥能夠幫助大陸建造核潛艇,中國政府就向蘇聯提出呢項要求。

但係蘇聯方面遲遲未有任何答覆,到7月21日蘇聯駐北京大使尤金突然緊急求見毛澤東,話赫魯曉夫有緊要嘢要傳話俾毛澤東。於是毛澤東及其他中共高層領導人在中南海游泳池接見尤金。

尤金大使一見面就話佢奉赫魯曉夫命令,要求建立一個中蘇聯合艦隊,毛澤東一聽到聯合呢兩個字,就變得非常敏感,令佢想起斯太林時代俄國佬強迫在中國成立所謂中蘇聯合股份公司,呢D公司實際上係嚴重侵犯中國權益,毛澤東將呢D公司叫做合作社。

於是毛澤東就問尤金蘇聯係唔係想再來搞合作社?尤金話唔係,蘇聯政府意思係話利用中蘇聯合艦隊呢個平台來幫助中國海軍現代化。

但係毛澤東話我地曾經向你地要求幫我地建造核潛艇,你地一直唔答覆,依家突然提議要搞聯合艦隊,係唔係如果我地唔同意同你地搞聯合艦隊,你地就唔幫我地建造核潛艇?

尤金話我地可以建立中蘇核潛艇聯合艦隊,毛澤東聽到呢處就大發脾氣,佢話你地蘇聯咁想作致我地大陸海岸,咁我將全部大陸海岸俾晒你地,我毛澤東一支恭上井岡山打游擊!

尤金聽到毛澤東講到呢種地步,為之面青,佢急急返回大使館向赫魯曉夫匯報毛澤東發脾氣呢件事,赫魯曉夫覺得莫名其妙,毛澤東無端端點解會發嬲?梗係你尤金講左乜嘢得罪佢,又或者你尤金表達錯誤,引起呢場誤會,赫魯曉夫話不如我親自出馬秘密到北京同毛澤東當面講清楚,所以就有7月31日赫魯曉夫秘密到達北京呢一幕。

赫魯曉夫到左北京之後,亦唔休息,就同毛澤東響中南海懷仁堂會談,赫魯曉夫一直解釋建立中蘇聯合艦隊蘇方並無惡意,亦唔係有意冒犯中國主權,只係尤金大使表達不善而已。

毛澤東問建立中蘇聯合艦隊係唔係蘇聯幫助中國海軍現代化嘅先決條件,如果係咁,中國即刻撤回有關要求蘇聯幫助中國建造核潛艇提議,赫魯曉夫話如果中方唔願意建立聯合艦隊,蘇方仍然願意繼續幫助中國建造核潛艇,於是雙方就建造核潛艇達成協議。

至於建造長波電台問題,赫魯曉夫在獲悉毛澤東堅持要出全部資金之後,赫魯曉夫亦作出讓步,完全按毛澤東要求來做,中蘇雙方最後就建造長波電台亦達成協議。

後來由於中蘇關係好快惡化,蘇聯幫助中國建造核潛艇並未成事,中國係在十二年後即係一九七零年靠自主能力建造第一艘核潛艇。

至於建造長波電台亦係同樣得個講字,而且後來發展左通訊衛星,長波電台已經被淘汰,此是後話,暫時按下不表,依家再繼續講赫魯曉夫在北京與毛澤東談判。

中蘇雖然為長波電台及聯合艦隊有所爭執,但係風波好快過去,赫魯曉夫同毛澤東就其他各項問題進行探討,發現雙方共同點非常之多,講下講下,雙方談判氣氛越來越友好。

毛澤東話你赫魯曉夫呢次秘密來北京,你在莫斯科失踪咁多日,班西方記者實四圍刮你,唔知你去左邊,不如索性秘密來公開走,我地搞個盛大歡送儀式為你送行,而且我地雙方要發表中蘇聯合聲明。

毛澤東就話:拿!呢份就係我地起草嘅中蘇聯合聲明,請你過下目。赫魯曉夫攞來一睇,見呢份聯合聲明內容非常簡單,淨係話中蘇兩國領導人在北京就國際重大問題進行左深入探討,雙方並且已經取得一致嘅意見。赫魯曉夫覺得份聲明冇任何問題,就即刻簽署左。

8月4日,赫魯曉夫離開北京,毛澤東安排盛大儀式,敲鑼打鼓咁歡送赫魯曉夫,驚死冇人知道咁樣。《人民日報》公佈左中蘇聯合聲明,並且發表左社論,將赫魯曉夫訪華呢件事講到天上有地下無。

其實,赫魯曉夫呢次來北京係中左毛澤東嘅圈套。唔少學者為毛澤東為乜要向尤金大使大發脾氣而感到困惑,佢地作左唔少解讀,主要係認為毛澤東係為左維護中國主權而發脾氣,但係有學者就認為呢個只係表面上原因,毛澤東實際上係另有作用。

就算毛澤東要發脾氣,亦唔應該向尤金發,因為尤金同毛澤東關係係亦師亦友,當初蘇聯派學者尤金出使北京,原意就係想尤金幫助毛澤東修改毛澤東選集中有關哲學部分論述。

毛澤東突然發咁樣無厘頭脾氣其實係專登,佢了解赫魯曉夫嘅性格,當赫魯曉夫知道毛澤東無端端發脾氣,一定會趕來北京問個究竟,咁樣毛澤東就可以乘機要赫魯曉夫簽署早已準備好果份聯合聲明,因為呢份聲明在赫魯曉夫離開北京後第十九日會起重大作用。

赫魯曉夫係8月4號離開北京,十九日後正係8月23日,響呢一日,發生左一件轟動全球嘅大事,就係中國人民解放軍福建前線部隊萬炮齊轟炮轟金門,史稱八二三金門炮戰。

呢次炮轟金門猛烈程度係超出第二次世界大戰任何一次炮戰,使到蔣介石心驚膽跳,急急要向米國佬求援。

米國國務卿杜勒斯在炮轟金門後一日就作出左判斷,杜勒斯話毛澤東突然咁樣炮轟金門法,肯定係赫魯曉夫在背後指使,因為赫魯曉夫剛剛唔到三個星期前就鬼鬼祟祟去北京,之後又公開發表聯合聲明,咁就證實炮轟金門呢一鑊與赫魯曉夫訪問北京有關。

我地知道杜勒斯呢個判斷係完全錯誤,赫魯曉夫事前根本就唔知道有炮轟金門呢一鑊,外界並唔知道中蘇曾經為左長波電台及中蘇聯合艦隊而起過爭執,因為呢兩單嘢係屬高度機密,外界淨係睇到赫魯曉夫到過北京,又發表聯合聲明,所以認定金門呢一鑊赫魯曉夫肯定係幕後黑手。

根據目前解密資料顯示,毛澤東原本在7月14日已經下令福建前線部隊自己選擇適當時機炮轟金門,唔需要再請示中央。但係因為尤金在7月21日緊急求見毛澤東,毛澤東借口反對聯合艦隊大發一輪脾氣,將赫魯曉夫引嚟北京,所以毛澤東臨時下令福建前線即刻停止一切炮轟金門準備工作,搞到前線倒瀉蘿蟹,亂晒大籠。

毛澤東就利用赫魯曉夫突然訪華,再引佢簽左份中蘇聯合聲明,俾外界一種感覺就係中蘇兩國領導人已經就炮轟金門達成共識,其實赫魯曉夫在北京咁多日,毛澤東完全冇向佢提及有炮轟金門呢個計劃。

毛澤東知道單憑中共炮轟金門,米國佬係唔會驚,但係米國佬最驚就係俄國佬有份,而毛澤東就係要製造呢種假象,咁樣炮轟金門對米國佬先至會造成威懾力量。

毛澤東呢招當然係得米,但係就令到一個人非常唔高興,佢就係赫魯曉夫,赫魯曉夫係睇報紙先至知道中共已經炮轟金門,佢當堂非常火滾,我赫魯曉夫響北京咁多日,你毛澤東屁都冇放半個,完全冇同我提到準備要炮轟金門,冇將我蘇聯呢個盟友放在眼內。

根據中蘇友好同盟條約,任何一方如果有乜嘢重大軍事行動,事先必須知會對方,依家中國完全冇按照條約規定,自把自為,話打就打,咁樣算係乜嘢盟友呢?

赫魯曉夫唔知毛澤東葫蘆內賣乜嘢藥,佢就在9月6日派外交部長葛羅米柯秘密前往北京當面問清楚毛澤東究竟想搞邊科。

毛澤東對葛羅米柯講,請你番去同赫魯曉夫同志講,請佢放心,我地呢次炮轟金門並冇意圖要登陸金門,更加唔會登陸台灣,第三次世界大戰唔會爆發,我地要炮轟金門係有幾個目的。

第一個目的係要試探米國佬保衛金門嘅底線,我地炮火封鎖金門之後,國民黨派戰艦,補給艦及登陸艇向金門進行補給,米國第七艦隊派出戰艦話要幫手護航,但係米國戰艦一接近中國領海界線,就全部停低冇再向前,結果國民黨戰艦遭到我地炮擊,米國佬袖手旁觀,完全唔幫手還擊,咁我地就知道米國佬嘅底線就係唔會為保衛金門而敢同我地開戰。

另外,我地炮轟金門一響,就挑撥離間左蔣介石同米國佬關係,蔣介石要求米國佬幫佢守金門,美國佬唔單止唔肯,仲要逼老蔣由金門撤軍,老蔣打死都唔制,因為金門係佢唯一可以近距離睇到大陸嘅地方,佢點肯放棄金門,所以米蔣之間嘈起上來。

我地炮轟金門更重要目的係牽制米國佬在中東軍力,上個月伊拉克發生政變,成立左反美政權,米國佬非常騰雞,急急派兵登陸黎巴嫩,又向中東地區派出大批軍力,想要撲滅中東人民反美革命鬥爭。

我呢處金門炮火一響,米國佬就將全球一半航空母艦調來台灣海峽,咁就減輕左米國佬對鎮壓中東人民革命嘅力度,我地炮轟金門實際上係大大支援左中東人民反米革命鬥爭。

葛羅米柯番莫斯科向赫魯曉夫匯報,赫魯曉夫話原來係咁樣,你老毛應該早D講嘛,否則我地點樣幫你?

因為台灣海峽危機達到最高潮時候,米國佬揚言要對中國大陸實施核子打擊,赫魯曉夫知道毛澤東底牌之後,就寫左封信俾米國總統艾森豪威爾,話如果你米國佬膽敢用核子武器攻擊中國大陸,蘇聯會將之視為對蘇聯本土進行核子攻擊,蘇聯會以牙還牙,以核子武器還擊米國本土,赫魯曉夫知道金門砲戰唔會大打,就不妨靠嚇來幫下毛澤東。

赫魯曉夫雖然幫左毛澤東,但係條氣卻係非常唔潤,覺得同中國呢個所謂盟友根本就失去左互信。

仲有一件事係使到赫魯曉夫更加係惱火,就係炮轟金門期間,國共之間唔單止係炮戰,仲有空戰以及海戰。

米國佬將最先進空對空響尾蛇導彈裝配俾國民黨空軍,國民黨空軍在空戰中首先使用響尾蛇導彈,將中共米格機打個七零八落,但係響尾蛇導彈唔係百發百中,其中有一枚失靈冇爆炸到就跌落浙江溫州地面,俾中共執左去。

蘇聯知道呢件事,就急忙向中國要求將米國佬呢枚導彈交俾莫斯科,因為俄國佬正在頭赤緊搞唔出空對空導彈,有部分技術關卡仲未克服。但係中國方面東拖西拖,一直唔肯交出呢枚導彈。

赫魯曉夫當然火滾,你中國軍隊大部分先進裝備都係我地蘇聯所提供,依家要你交出一枚米國佬導彈居然唔俾,未免太過分。而且當時蘇聯正在協助中國建立第一支地對空導彈部隊,於是蘇聯向中國遞交措辭強硬照會,話如果中國唔交出響尾蛇導彈,蘇聯會停止幫助中國建立導彈部隊。

最後,中國方面係將呢枚導彈送到莫斯科,但係當班蘇聯技術人員將枚導彈打開,見到內部零件全部散晒,最重要部件紅外線導向儀不翼而飛!

1958年係中蘇共關係走向惡化嘅一年,但係冰凍三尺,非一日之寒,中蘇共關係惡化係有其歷史根源,我地不妨回顧下1958年之前中蘇共關係所走過嘅恩恩怨怨歷程,從中搵出關係惡化嘅深層原因。

我地知道1921年7月中國共產黨創建嘅時候,全中國中共黨員得五十幾丁人,參加中共一大亦只得代表十三條冷。在一大開會期間,有兩個鬼頭係坐響度,一個係荷蘭共產黨人馬林,一個係蘇聯共產黨人尼克爾斯基,佢地係奉莫斯科第三共產國際命令來中國幫助建黨。

中共作為第三國際一個支部,係必須聽命於莫斯科,何況中共當時活動經費絕大部分係來自莫斯科,正所謂邊個出錢,邊個就係阿爺,莫斯科係中共金主,點到你中共唔服從第三國際指令?

但係莫斯科畢竟唔了解中國國情,在指揮中共時常發出錯誤命令,使到中共多次蒙受損害,最嚴重一次係卅年代初,莫斯科所扶植王明掌握左中共控制權,實施所謂王明路線,害到中共雞毛鴨血,白區損失百分之百,紅區損失百分之九十。

一九三四年,江西紅軍被逼長征,講長征係好聽D,實際上係走佬,一九三四年底,紅軍殘餘部隊佔領貴州遵義,中共高層在呢處召開緊急會議,決定終止王明路線對中共嘅統治,恢復毛澤東對紅軍指揮權。

呢個係中共建黨以來第一次在冇莫斯科干預下獨立自己處理高層權力轉移,點解可以做到呢?本來莫斯科係通過第三國際在上海所設地下電台指揮中共,但係紅軍開始長征時候,呢個上海電台俾租界當局破獲,電台停止運作,莫斯科冇法子指揮到中共,而中共亦冇法子向莫斯科請示。

毛澤東本人同俄國佬冇乜瓜葛,佢未去過蘇聯,更加唔識俄文,佢對於莫斯科命令,可以聽亦可以唔聽,所以遵義會議之後,中共並非係樣樣都要聽莫斯科命令。

抗戰勝利後,毛澤東對斯太林產生不滿,先係斯太林話中國唔可以爆發內戰,因為中華民族會滅亡咁講,點解斯太林會咁關心中華民族滅唔滅亡?佢其實係唔想在遠東另起火頭,當時蘇聯主要力量係放在歐洲與美國爭霸,所以極力避免在遠東生事而引起西方國家兩面夾擊蘇聯。

於是斯太林強迫毛澤東去重慶同蔣介石談判,毛澤東對於斯太林逼佢去重慶呢種險地分分鐘會俾老蔣劏左,覺得非常之嬲,斯太林為左蘇聯利益係唔顧毛澤東生命安全。

到一九四九年初,經過三大戰役,中共已經佔領長江以北大部分地區,斯太林派米高揚秘密到西柏坡見毛澤東,要求毛澤東唔好過長江,斯太林話中共一過長江,美國就會出兵中國,到時蘇聯會被逼捲入咁講。

毛澤東唔聽斯太林支笛,四月就百萬雄師過大江,好快就佔據成個大陸,斯太林判斷錯誤,美國佬根本就冇出到兵。

1949年10月中共建立政權,年底毛澤東到莫斯科朝拜斯太林,佢唔敢坐比較方便嘅飛機,而係捱足七日坐火車去莫斯科,因為毛澤東驚斯太林會對佢下毒手。

毛澤東到達莫斯科後,遭到斯太林冷淡對待,將佢丟在莫斯科郊外別墅不聞不問成個月,毛澤東話佢淨係食飯,疴屎同瞓較,冇嘢好做,斯太林仲未想清楚支唔支持毛澤東建國。

最後斯太林好勉強先至同毛澤東簽署中蘇友好同盟條約,而且呢個條約係不平等條約,蘇聯繼續在華享有雅爾達會議所給予各種特權,毛澤東谷住一肚火返回北京。

中蘇友好同盟條約之簽訂,係新中國成立後第一場外交活動,而且對中國後來發展道路影響亦極大,因為佢係以一個條約方式將中蘇同盟關係亦法律形式固定落來。

跟住1950年6月朝鮮戰爭爆發,韓戰呢鑊嘢查實係斯太林同北韓金日成瞞住毛澤東一手一腳搞出來,但係就搞出一鑊泡,結果要毛澤東幫斯太林同金日成抹屎忽,因為咁中國要出兵朝鮮,犧牲慘重。

1953年3月斯太林暴斃,中國立刻急急同美國簽訂朝鮮戰場停火協議。而斯太林瓜老襯之後,蘇聯領導層亦起左變化,原本係由馬林可夫繼位,點知呢條友坐唔穩,俾赫魯曉夫後來居上趕左落台。

赫魯曉夫上台之初,權力基礎仲未穩固,需要中共嘅支持,所以佢就改變斯太林時期嘅對華政策,赫魯曉夫將損害中國權益嘅中蘇聯合股份公司撤消,又將旅順軍港交還俾中國,到呢個時候,中國大陸先至係真真正正成為一個擁有獨立主權嘅國家。

除此之外,赫魯曉夫仲向中國大陸提供大量軍事以及經濟援助,派出數千名專家顧問到大陸協助建立一百五十六個工業項目,可以講,大陸五十年代工業基礎係喺赫魯曉夫幫助之下完成,所以1955年及1956年係中蘇關係最融洽嘅時期。

但係到左1956年,中蘇兩國關係起左變化,原因係1956年2月莫斯科舉行蘇共第二十大,赫魯曉夫邀請各國共產黨派代表團參加盛會,中共亦派出朱德同鄧小平率領代表團到莫斯科。

蘇共廿大開會開到最後一日,在各國共產黨代表冇在場嘅情況之下,赫魯曉夫做左個秘密報告,呢份秘密報告由頭到尾媽叉斯太林,對斯太林進行鞭屍,全盤咁否定斯太林。但係赫魯曉夫並冇將秘密報告全文交俾各國共產黨代表團,淨係派人去各國共產黨代表團住處,草草咁將份報告宣讀一輪就走頭,唔留低任何文字記錄,大家聽到一頭霧水。

雖然赫魯曉夫將佢嘅秘密報告視為高度機密,唔俾任何外人睇,但係美國中央情報局神通廣大,非常之西飛利,居然將呢份報告全文搞到手,仲俾左紐約時報公開刊登,轟動一時。

中國係要由紐約時報所刊登秘密報告英文版本翻譯成中文,然後印成單行本,供中共高級幹部參考閱讀。中共中央政治局召開擴大會議,就赫魯曉夫秘密報告進行左討論。

毛澤東在政治局擴大會議上話赫魯曉夫批判斯太林呢一鑊,對我地中共來講,係一則以喜,但係又係一則以憂。

毛澤東話所謂一則而喜係指我地舉腳贊成批判斯太林,斯太林在生嘅時候,對中國革命俾左唔少壞主意,曾經害到我地雞毛鴨血,唔批判唔得,依家赫魯曉夫將斯太林呢舊大石頭由我地頭上搬走,使到我地有重獲自由嘅感覺。

但係一則以憂係指赫魯曉夫呢次搞個秘密報告,事前完全冇同任何兄弟黨商量過,佢係自把自為,以突然襲擊唔光彩手段做呢份秘密報告,大家冇任何心理準備,對國際社會主義陣營製造思想混亂,特別會對東歐造成衝擊,東歐恐怕從此會多事。

毛澤東跟住話:而且赫魯曉夫呢份秘密報告雜亂無章,充滿謾罵嘅語言,全無理性分析,全盤咁否定斯太林,係極之唔妥當。

《人民日報》就根據中共中央政治局擴大會議討論內容,寫成左一篇文章,題目就叫做《關於無產階級專政的歷史經驗》,呢篇文章係從理論角度以及歷史角度來論述斯太林現象產生嘅根源。

文章指出蘇聯係第一個社會主義國家,對於點樣搞社會主義,點樣搞無產階級專政,係完全冇任何經驗,既然冇經驗,犯錯誤乃係難免。對於斯太林我地要三七開,即係三分否定,七分肯定,就唔可以全盤否定斯太林,如果全盤否定斯太林,即係等於全盤否定蘇聯社會主義革命,等於全盤否定國際共產主義運動。

《人民日報》呢篇文章一經發表,震撼成個社會主義陣營,大家覺得毛澤東理論水平係高過赫魯曉夫好多,呢篇文章係中共有史以來首次就國際共產主義運動發表自己獨特嘅見解,咁亦奠定左中共響社會主義陣營嘅江湖地位。

雖然《人民日報》呢篇文章暗含批判赫魯曉夫嘅意思,但係連蘇聯方面都覺得呢篇文章的確寫得非常好,莫斯科真理報全文刊載,並且印左單行本廿萬份俾蘇共幹部學習。

毛澤東所擔心嘅事情終於發生,東歐果然出事,第一個出事嘅國家就係波蘭,波蘭本身同俄國乃係世仇,再加上斯太林時期,俄國佬對波蘭做左唔少壞事,在波蘭內部種下極大怨恨。

波蘭共產黨原本有親斯太林派同反斯太林派,反斯太林派曾經遭到殘酷清洗,幾乎係死清光,但係有個死剩種叫做哥穆爾卡,佢趁赫魯曉夫做批判斯太林秘密報告呢個時機復出,佢獲得波蘭黨內大部分人支持,哥穆爾卡要求召開波共中央全會,準備改選波共中央新領導層。

赫魯曉夫知道呢件事之後,就大起恐慌,佢懷疑呢個哥穆爾卡係一個反蘇分子,如果俾佢上台,波蘭極可能會脫離蘇聯陣營,於是赫魯曉夫就警告波共唔可以隨便召開中全會,在開會前要先派波共中央政治局全體成員到莫斯科接受赫魯曉夫嘅指示,如果真係要開中全會,亦必須有我赫魯曉夫在場監督先至可以。

波共當然拒絕赫魯曉夫呢個無理嘅要求,赫魯曉夫一怒之下,就調兵遣將,下令蘇聯軍隊從東西兩面向華沙進發,赫魯曉夫決定用武力解決波蘭問題。華沙嘅學生同工人攞起武器,響華沙外圍構築工事,準備同蘇軍揮過,波蘭軍隊亦產生異動,紛紛企響群眾呢邊,要抵抗蘇軍入侵,蘇波戰爭有一觸即發之勢。

就響呢個緊急關頭,赫魯曉夫唔理卅七廿一,一於夾硬來,佢率領蘇共領導層乘坐一架專機飛到華沙上空,要求降落,要強行參加波共中全會,經過多番交涉,波蘭政府總算允許赫魯曉夫專機降落華沙機場,赫魯曉夫一到華沙就同以哥穆爾卡為首波共領導層進行談判,雙方人馬一見面,就好似火星撞地球咁,火花四濺,互相斥罵,談判氣氛極為緊張。

與此同時,響北京嘅毛澤東知道左赫魯曉夫準備用武力鎮壓波蘭,毛澤東就緊急召見蘇聯駐華大使尤金,毛澤東對尤金講,兄弟黨之間有乜嘢爭執,應該係用和平商討方式來解決,唔應該郁下就動刀動槍,講打講殺。

毛澤東要求尤金轉告赫魯曉夫,如果蘇聯軍隊膽敢向波蘭群眾開槍,中國將會公開譴責蘇聯。尤金唔敢怠慢,佢即刻向莫斯科匯報,但係赫魯曉夫呢個時候冇響莫斯科,佢已經去左華沙同波蘭佬講緊數,所以佢唔知道毛澤東嘅態度。

赫魯曉夫呢個人雖然係性急,但係來得快,去得亦快,佢同哥穆爾卡嘈左一輪之後,赫魯曉夫發現哥穆爾卡並非係佢想像中嘅反蘇分子,查實哥穆爾卡係一個溫和嘅改革派,唔少理念同赫魯曉夫非常相似,佢亦無意要脫離蘇聯集團。

赫魯曉夫知道自己搞錯,又睇到波蘭上上下下抵抗蘇軍入侵決心非常堅定,咁佢就開始缩沙,佢下令蘇聯軍隊後撤,放棄用武力解決波蘭問題,佢對哥穆爾卡講,波共中全會你地照開,我番莫斯科先,你地選出新領導層就來莫斯科繼續談判。

赫魯曉夫番到莫斯科,先至接到蘇聯駐華大使尤金報告。佢知道左毛澤東反對蘇聯出兵波蘭,而毛澤東呢個意見亦傳遍東歐共黨集團,由於中國同歐洲有時間差,有唔少東歐國家誤以為赫魯曉夫係在毛澤東嘅壓力之下而退兵,所以毛澤東當時喺東歐威望變得非常之高。

赫魯曉夫雖然邀請波蘭哥穆爾卡到莫斯科,但係估計哥穆爾卡未必肯來,因為俄國佬出名陰險,哥穆爾卡對於自己到達莫斯科之後安全冇乜信心,於是赫魯曉夫就話要請埋中國派代表以中間人身份到莫斯科參加蘇聯同波蘭嘅談判。

哥穆爾卡話有中國佬來莫斯科參加蘇波談判,咁我就可以放心去莫斯科,唔怕俄國佬會出乜嘢陰濕招。

中國就派出劉少奇以及鄧小平率領代表團趕到莫斯科,按照赫魯曉夫原意係由蘇聯,中國以及波蘭坐埋齊齊開個三方會議。

但係毛澤東認為我地中國乃係第三者,直接參與蘇波談判似乎唔係咁方便,因為中國同俄國佬傾偈,有D說話未必方便俾波蘭佬聽到,同樣,中國同波蘭佬傾偈,亦有D說話未必方便俾俄國佬聽到,所以劉少奇就建議蘇聯自行同波蘭傾,中國就分別同蘇聯以及波蘭傾。

劉少奇鄧小平首先搵赫魯曉夫及蘇共中央主席團傾,劉少奇對班俄國佬話蘇聯係老大哥,老大哥就應該有個老大哥個款,老大哥應該要有氣量,唔應該對班細嘅郁唔郁就蝦蝦霸霸,斯太林時代蘇聯果種大國沙文主義作風認真要戒,班俄國佬一邊聽一邊點頭,表示贊同。

劉少奇跟住同哥穆爾卡班波蘭佬傾,哥穆爾卡一見到劉少奇,就首先話非常感激毛主席為波蘭呢類弱小民族講說話,如果冇毛主席幫我地出頭,波蘭局面極可能會不可收拾。班波蘭佬紛紛向劉少奇投訴俄國佬過去對波蘭所做所有壞事,講到聲淚俱下。

劉少奇就話我地社會主義陣營需要有個頭,呢個頭當然係蘇聯老大哥,因為佢係第一個社會主義國家,經驗最豐富,又係最強大。我地做細嘅,應該尊重老大哥嘅地位,唔好隨便咁落佢嘅面,為左維護社會主義陣營團結呢個大局,我地能夠忍就盡量忍,中國已經同蘇共中央主席團打左招呼,要求今後蘇聯必須以平等態度對待波蘭,請波蘭放心。

在中國斡旋之下,蘇聯同波蘭好快就兩國今後關係達成協議,但係呢頭波蘭事件剛剛要得到解決,果頭匈牙利又爆大鑊。

匈牙利呢鑊係嚴重過波蘭好多,因為匈牙利情況比較複雜,匈牙利共黨有保守派以及改革派,兩派勢均力敵,改革派態度比較激進,佢地要求退出蘇聯集團,要求用多黨制代替一黨專政,要求用資本主義來代替社會主義。

傾向改革派嘅匈牙利工人學生攞起武器同屬於保守派嘅秘密警察展開槍戰,好多流亡外國匈牙利人紛紛返回匈牙利參加武裝鬥爭,美國中央情報局當然唔會缺席,趁機煽風點火。匈牙利面臨內戰邊緣,局勢已經開始失控。

匈牙利保守派即刻向莫斯科求援,要求蘇聯出兵維持秩序,但係赫魯曉夫經過波蘭事件果鑊,唔想再介入匈牙利紛爭,決定將蘇軍撤出,準備放棄匈牙利。

在北京嘅毛澤東知道左呢件事,就即刻打電報俾仲響莫斯科嘅劉少奇,要佢緊急約見蘇共中央主席團,向佢地傳達毛澤東關於處理匈牙利事件嘅意見。

劉少奇對班俄國佬話毛主席認為波蘭事件同匈牙利事件乃係兩單唔同性質嘅事件,波蘭事件係屬於人民內部矛盾,可以通過和平商議解決,但係匈牙利事件已經演變成敵我矛盾,係一場階級鬥爭,係一場反革命暴亂,蘇聯必須出兵挽救匈牙利社會主義政權,唔可以任其自生自滅,匈牙利一旦脫離東歐集團,就會引起骨牌效應,東歐社會主義陣營就會含包散。

劉少奇最後講,如果蘇聯唔採取任何行動,任由匈牙利局勢惡化,咁你地將會成為歷史千古罪人!

蘇共中央漏夜開會商討對策,經過幾個鐘頭激烈辯論,最後接納毛澤東嘅意見,蘇聯決定出兵匈牙利,蘇聯軍隊一介入,匈牙利動亂好快就平息左。

但係子彈唔能夠解決所有問題,匈牙利事件包括波蘭事件仲有好多善後工作要做,蘇聯唔方便出面解決,於是赫魯曉夫又請求中共派人幫手執手尾,中共就派出執手尾專家周恩來出馬,佢先飛莫斯科,再飛華沙以及布達佩斯,進行為期一個月嘅穿梭外交。

由於匈牙利當時局勢仲非常緊張,據講周恩來係坐坦克車進入布達佩斯市區,憑住周恩來三寸不爛之舌,總算擺平匈牙利各派勢力,使到匈牙利社會好快恢復正常。

本來,中共同蘇共係有分工,中共係負責指揮亞洲共產黨活動,而蘇共就負責指揮歐洲共產黨活動。

但係波蘭同匈牙利事件爆發之後,赫魯曉夫搞唔掂,中共首次飛象過河,正式介入東歐共黨內部事務,使到中共響東歐威望大升,甚至係超越蘇聯添,大家覺得毛澤東處理危機手法係成熟過赫魯曉夫。

到1957年中,赫魯曉夫又再面臨另一場危機,呢次危機係來自蘇共黨內,由於佢搞左個反斯太林秘密報告,惹出左波蘭以及匈牙利兩場大禍,佢遭到蘇共黨內唔少同志嘅指責,斯太林分子莫洛托夫串聯左高層反赫魯曉夫成員,要合謀隊冧赫魯曉夫。

赫魯曉夫為左要應付來勢洶洶嘅反對派,就出左兩招,第一招係勾結國防部長朱可夫元帥,動用蘇聯軍隊來作為佢權力鬥爭嘅後盾。

第二招就係向毛澤東求援,赫魯曉夫話你毛澤東出一句聲好過我出十句聲,毛澤東果然夠雷氣,佢淨係講左一句說話:真理係喺赫魯曉夫同志呢一邊,就咁样,赫魯曉夫好快轉危為安,佢嘅權力同地位得到進一步鞏固。

赫魯曉夫當然非常感激毛澤東幫忙,將毛澤東當成係大恩人,佢就問毛澤東,我想送個大禮來報答你嘅大恩大德,唔知你想要乜呢?毛澤東就話我最想要就係原子彈,赫魯曉夫話冇問題,於是蘇聯同中國簽訂協議,由蘇聯幫助中國製造核子武器,呢點使到中蘇關係又上左一個新嘅台階。

1957年11月,係蘇聯共黨革命四十週年紀念,莫斯科要舉行一場大騷,赫魯曉夫邀請全世界六十幾個國家共產黨派代表團到莫斯科參加大party。中國係由毛澤東親自率領龐大黨政代表團到莫斯科捧赫魯曉夫嘅場。

呢個係毛澤東生平第二次去蘇聯,但係一九五七年毛澤東去蘇聯同佢一九四九年去蘇聯係完全唔同。一九四九年毛澤東去蘇聯,連飛機都唔敢坐,佢係捱足七日火車去莫斯科,因為佢驚斯太林會做瓜佢。

毛澤東所乘坐火車到達莫斯科火車站,斯太林並冇到場迎接,淨係派外交部長莫洛托夫去接車,而且將毛澤東安排住響莫斯科郊外別墅,遠離莫斯科市區,目的係唔俾毛澤東有機會同其他國家共產黨代表接觸串聯。

但係一九五七年毛澤東去莫斯科係乘坐由蘇聯政府派出嘅專機由北京起飛,毛澤東呢次再唔會怕俄國佬會做瓜佢,因為赫魯曉夫當佢係大恩公,咁又點可能會做瓜佢呢?

毛澤東專機飛抵莫斯科機場嘅時候,赫魯曉夫就率領蘇共中央主席團全體成員到場熱烈迎接,場面浩大,係蘇聯外交史上所罕見。

各國共產黨代表團到達莫斯科之後,係由蘇聯方面安排入住各個賓館,毛澤東係唯一一個被安排入住克里姆琳宮,點解會安排毛澤東住呢度呢?主要原因係赫魯曉夫知道毛澤東非常怕凍,安排佢住響克里姆琳宮,咁佢去大會議廳參加會議嘅時後就唔需要出外,咁就避免毛澤東會凍親,由此可見赫魯曉夫對毛澤東係非常體貼。

但係咁樣又出現問題,沙皇寢宮張床係席夢思,毛澤東唔瞓得席夢思,佢要木板床先至瞓得著較,成個莫斯科城都搵唔到張木板床,俄國佬唯有漏夜趕工特製一張木板床俾毛澤東較較豬。

仲有個問題就係沙皇個廁所係抽水馬桶,咁又唔掂,毛澤東坐響處疴唔出屎,要痞響處先至疴得出屎,於是俄國佬又將個坐廁改成痞廁,方便毛澤東順利疴屎。

安排毛澤東住響克里姆琳宮亦係方便佢可以接見各國共產黨代表,佢住處門口日夜排滿隊,各國共黨代表紛紛求見毛澤東,向毛澤東請教世界革命問題。

開全體會議嘅時候,各國代表有嘢要講,必須要企起身先至可以發言,唯獨係毛澤東唔需要企起身,佢坐響處翹起二郎腿,印印腳咁鳩up up就得,呢個係毛澤東有生以來所得到最高殊榮,得意忘形之餘,難免亂咁講嘢。

當時大會正在討論核子戰爭問題,赫魯曉夫一味靠嚇,話核子彈非常可怕,一旦打核戰,就會係全人類毀滅,全文明毀滅,全地球毀滅咁講,各國代表紛紛附和赫魯曉夫,個個話絕對唔可以同美國佬開片,講到尾,要避免核戰唯一辦法似乎就係向美國佬投降。

毛澤東越聽越覺得唔對路,佢就發言話核子彈並唔可怕,中國有六億人口,如果打核戰,死左一半,仲有三億人口,依然係世界上最多人口嘅國家,咁呢三億人就可以響核子戰爭廢墟上建設共產主義。

毛澤東一咁講,全場出現死一般寂靜,唔少歐洲代表聽到面都白左,有細國家例如捷克就話我地得一千兩百萬人口,一打核戰,連渣都冇埋,又點樣可以建設共產主義呢?

毛澤東呢種講法,成為以後中蘇出現爭論嘅一大焦點,蘇方指責毛澤東係好戰分子,成日想發動世界大戰。

查實如果詳細閱讀毛澤東發言全文,根據上文下理,毛澤東原意並非係如此。毛澤東原意係話美國佬成日向世界革命人民頭上揮舞核子武器來威嚇我地,如果我地革命人民出現恐懼情緒,美國佬就必然會向我地頭上掟原子彈,要避免核子戰爭就必須革命人民表示唔怕同美國佬揮過,因為其實最怕核戰應該係美國佬,咁樣佢就唔敢發動核戰。

毛澤東又講左句說話引起赫魯曉夫不滿,毛澤東係話依家係東風壓倒西風,唔係西風壓倒東風,赫魯曉夫聽左,佢覺得你毛澤東來自東方,東風當然係代表你,依家你來到西方莫斯科,咁豈唔係想要壓倒我地?

其實毛澤東呢句說話係出自紅樓夢弱不禁風林黛玉把口,毛澤東係想用文學語言來形容國際局勢而已。

1957年,六十幾個國家嘅共產黨代表雲集莫斯科,佢地係參加自馬克思主義創建以來最大規模嘅一場國際共產黨會議,呢次莫斯科會議有個重要項目,就係準備簽署以及公佈莫斯科宣言。

在過去歷次國際共產黨會議,所有文件都係由蘇共一手一腳包辦代替,但係1957年嘅莫斯科宣言就唔同,呢次莫斯科宣言係由中共以及蘇共聯合起草,響起草過程當中,中蘇雙方產生左分歧。

原因係赫魯曉夫認為呢次莫斯科宣言嘅主題應該係「三和」,究竟乜嘢係「三和」呢?三和就係和平共存,和平過渡以及和平競賽。但係毛澤東表示反對,佢認為莫斯科宣言嘅主題應該係武裝鬥爭,世界革命以及打倒美帝國主義。

中蘇各持己見,互不相讓,如果咁樣落去,莫斯科宣言極可能出唔到街。到最後關頭,中蘇總算係妥協,嚟一個五七共識,各自表述。就係將中蘇唔同意見一齊列入莫斯科宣言入邊,經過全體同意然後簽署公佈。

個莫斯科宣言日後亦成為中蘇爭論另一個焦點,因為中蘇雙方對呢個宣言嘅解讀都係唔同。

1957年11月莫斯科會議將中蘇友好同盟關係推上一個頂峰,但係亦同時埋下左中蘇分裂嘅因子。

到1958年,正如上面開頭已經講左,中蘇因為長波電台事件同中蘇聯合艦隊事件發生左爭拗,跟住就係炮轟金門事件,使到中蘇兩國失去左互信。

1958年仲有單嘢亦係加深左中蘇兩國之間嘅裂痕,呢個就係毛澤東當時所發動嘅大躍進以及人民公社運動,響呢場運動發動期間,中國大陸出現左好多稀奇古怪嘅口號,例如乜嘢趕英超美,乜嘢幾多年趕上英國,乜嘢幾多年超越美國,乜嘢幾多年要建成共產主義天堂等等。

呢類口號表面上係以英美作為趕超對象,但係,查實毛澤東發動大躍進及人民公社運動,佢真正想要趕超嘅對象其實係蘇聯。

當時大陸非常流行咁樣嘅講法,就係話俄國佬搞社會主義成四十年,但係到依家仲搞唔清楚共產主義天堂大門口響邊,而我地中國搞左唔夠十年社會主義,就已經嚟到共產主義天堂大門口,我地係等埋蘇聯老大哥嚟埋一齊進入共產主義天堂,定係禮讓俾老大哥先入呢?呢種風涼說話俾俄國佬聽到,係極之唔乃奇。

而赫魯曉夫對人民公社係特別反感,因為蘇聯響廿年代曾經搞過人民公社失敗收場,赫魯曉夫覺得我地蘇聯搞人民公社都搞唔掂,依家你中國仲要攞嚟搞,豈唔係自尋死路?一九五八年尾及五九年初,赫魯曉夫先後響唔同場合發表批評人民公社嘅言論。

我地知道人民公社係毛澤東條命根,佢係唔俾人地亂咁掂,邊個掂親,佢就嬲邊個一世,依家赫魯曉夫三番四次咁媽叉人民公社,毛澤東當然非常之嬲喇!但係中共當時為左維護中蘇友好團結,對於赫魯曉夫嘅批評一於借左聾耳陳隻耳,詐蒂聽唔到,大陸傳媒亦隻字冇報導到,所以大陸老百姓並唔知道中蘇係有分歧。

1959年赫魯曉夫有兩個大PROJECTS要做,第一個大PROJECT就係蘇聯要同美國以及英國響日內瓦談判禁止核彈試驗,第二個大PROJECT就係赫魯曉夫準備要訪問美國。

赫魯曉夫諗住要同美國佬搞緩和,如果俾美國佬知道左蘇聯幫助緊中國製造原子彈,就肯定會影響美蘇談判氣氛,於是蘇聯響1959年6月20日突然通知中國話暫時停止提供所有製造原子彈技術及資料。

原本蘇聯答應左要送一個原子彈模型俾中國,而事實上呢個模型已經運到中蘇邊境,隨時可以運入中國,但係6月20日莫斯科一聲令下,呢個模型當然永遠冇得送過嚟。

中國冇左蘇聯幫助,唯有靠自主能力去繼續搞原子彈,呢個自力更生製造原子彈計劃就被命名為596工程,點解叫做596工程呢?意思係要提醒大家記住係59年6月蘇聯停止幫助我地造原子彈,迫使我地走上自力更生嘅道路。

呢個亦係蘇聯有史以來首次單方面撕毀同中國所簽訂嘅協議,對於中蘇關係嚟講,呢個係一項警號。

1959年9月赫魯曉夫訪問美國,在美國期間,赫魯曉夫睇到美國資本主義生產力嘅先進以及美國社會嘅富裕,留下左深刻嘅印象。

赫鲁曉夫訪問美國完畢番到莫斯科,休息一兩日,就響9月30日飛嚟北京,佢嚟北京做乜呢?佢係嚟參加中共建國十週年慶典。

赫魯曉夫到左北京頭兩日,由於忙於參與各類慶祝活動,並冇機會同中國領導人細談,到十月二日,中蘇兩國領導人先至有時間坐低談判。中國方面出席談判,除左毛澤東之外,仲有中共中央政治局委員十一條冷,蘇聯方面出席嘅連同赫魯曉夫在內一共得三條冷。

首先,赫魯曉夫就大講特講佢嘅美國所見所聞,赫魯曉夫話:美國資本主義生產力真係勁楸到不得了,美國社會係富到漏油,家家戶戶都有汽車,電話,電冰箱以及電視機,餐餐牛油麵包牛扒,食到個個肥屍大隻!

毛澤東同中國其他領導人聽到赫魯曉夫一味大吹大擂,非常之唔耐煩。赫魯曉夫突然話題一轉,就指責中國響舊年即係一九五八年八月無端端炮轟金門,試圖挑戰美國資本主義嘅穩固性,咁樣做法係非常之唔明智。

赫魯曉夫話你地中國應該想辦法同美國改善關係,要解決台灣問題,可以參照列寧時期遠東共和國呢個模式。點解赫魯曉夫會咁樣講呢?原來響佢訪問美國期間,美國總統艾森豪威爾向赫魯曉夫提出用台灣獨立呢個方式來解決中美之間糾紛,艾森豪威爾並且委託赫魯曉夫到北京傳話俾中國,試探中國嘅底線。

但係台灣問題牽涉到中國嘅核心利益,中國係冇可能會有任何妥協餘地,赫魯曉夫呢次做左美國佬說客,當然係碰到一鼻子灰喇!

赫魯曉夫跟住就指責中國同印度在邊境發生衝突,究竟中印邊境發生左乜嘢事呢?中印邊境幾千年來從未發生過任何事,但係到一九五九年三月,西藏爆發叛亂,達賴喇嘛逃離西藏,獲得印度政府政治庇護,中印關係從此惡化,到五九年八月中印軍隊響邊境發生武裝衝突,有印度士兵俾中國軍隊擊斃,當時蘇聯塔斯社發表聲明譴責中國。

依家赫魯曉夫響北京又再次提起呢件事,佢話你地中國為左喜馬拉雅山幾塊爛地得罪中立國印度係非常之愚蠢。

外交部長陳毅聽到赫魯曉夫咁講,佢就嬲到爆,企起身指住赫魯曉夫鼻哥嚟鬧,陳毅話中國係社會主義國家,印度係資本主義國家,依家中國同印度發生衝突,身為社會主義國家嘅蘇聯,唔幫社會主義國家嘅中國,反為幫資本主義國家嘅印度,咁又係乜嘢道理呢?

赫魯曉夫俾陳毅鬧到面紅耳赤,佢話你陳毅係乜嘢身份地位,點可以用咁樣態度同我講嘢吖?

北京市長彭真亦企起身,指住赫魯曉夫嚟鬧,彭真話你赫魯曉夫講錯嘢,我地任何人都有資格指正你!

其他中共中央政治局成員紛紛企起身媽叉赫魯曉夫,赫魯曉夫話咁樣唔公平,你地成十一條冷,我地得三條冷!

毛澤東就笑笑口咁對大家講:拿拿拿!你地嗌交還嗌交,千祈唔好打交呀!

周恩來就耐心咁向赫魯曉夫解釋中印邊境發生衝突原因,周恩來話係印度政府多年嚟唔停咁蠶食中國領土,得寸進寸,變本加厲,依家甚至係越過非法嘅麥瑪洪線,向中國哨所進逼,中國守軍係為左自衛而還擊。

赫魯曉夫唔肯聽周恩來解釋,佢話總而言之,你地中國同印度打交,就係你地中國唔啱,赫魯曉夫一於打橫嚟講!

赫魯曉夫又向毛澤東提出一項要求,佢話你地中國由1952年起就扣留左兩個美國公民,唐奈以及費克圖,依家已經成七年咁耐,應該係時候釋放佢地番美國。

毛澤東話呢兩條美國佬係美國中央情報局特務,佢地係侵入中國領空,在中國境內進行間諜活動俾我地俘虜左。唐奈被判無期徒刑,費克圖被判有期徒刑廿年,依家佢地仲未坐滿監,係唔可以釋放。

赫魯曉夫堅持要中國釋放呢兩條美國佬,毛澤東問點解,赫魯曉夫話我已經響艾森豪威爾總統面前拍左心口答應講掂中國將呢兩條美國佬釋放。

毛澤東話:好笑嘞!我地幾時委託你赫魯曉夫代表中國政府向美國總統答應放呢兩條美國佬?對唔住,唔放,冇得放!

赫魯曉夫覺得佢呢次冇晒face,非常冇癮,中蘇談判就咁不歡而散。

本來按照原定行程,赫魯曉夫仲要去大陸其他地方訪問,但係赫魯曉夫以蘇聯國內有緊要事要處理為理由,就臨時取消所有行程,提早走頭!

赫魯曉夫先係番到蘇聯遠東地區海參崴,佢響呢處發表演說,指責中國係一隻好鬥嘅公雞,番到莫斯科之後,赫魯曉夫繼續響唔同場合對中國內政以及外交進行評擊。中共就仍然採取啞忍態度,粒聲唔出。

1960年2月4日,莫斯科召開華沙條約國首腦會議,赫魯曉夫在會上要求所有社會主義陣營國家都要支持佢準備在五月份到巴黎同米國,英國以及法國所開嘅四強首腦會議,赫魯曉夫接住再次攻擊中國。

佢先係就中印邊境衝突再次媽叉中國,跟住佢就對毛澤東進行人身攻擊,佢話如果有個老坑唔明智,咁就等於一對破舊嘅老套鞋,實際上應該擺響角落當成廢品,一D用處都冇。

到個時候,中共中央可以話係忍無可忍,決定要在輿論上對赫魯曉夫進行還擊。於是就利用1960年4月22日係紀念列寧誕生九十周年呢個機會,中共發表左三篇文章。

第一篇係中共中央宣傳部部長陸定一在紀念列寧誕生大會上嘅發言,題目係:《在列寧的革命旗幟下團結起來》,第二篇係人民日報編輯部文章,題目係:《沿著偉大列寧的道路前進》,第三篇係紅旗雜誌編輯部文章,題目係:《列寧主義萬歲》。

中共有關方面將呢三篇文章合印成一本小冊子,就以紅旗雜誌文章《列寧主義萬歲》做標題,分別印成中文、英文、俄文、德文、日文以及法文公開發行。

《列寧主義萬歲》呢三篇文章重申左列寧革命學說嘅基本原理,文章指出,雖然有左新技術嘅發明,有左核武器嘅出現,但係時代並冇變到,依家仲係帝國主義同無產階級革命嘅時代,帝國主義本質並未改變,所以列寧主義並未過時。

雖然文章集中對米帝國主義及南斯拉夫嘅觀點進行批判,對赫魯曉夫並冇指名道姓,但係實際上係對赫魯曉夫嘅三和政策進行批判。

就響呢三篇文章發表後第八日,即係1960年5月1日,一架米國U-2高空偵察機深入蘇聯領空進行偵察,但係就俾蘇聯地對空導彈所擊落,U-2機飛行員鮑爾斯被生擒。

蘇聯政府即刻向米國提出嚴重抗議,但係艾森豪威爾總統起初否認米國有派軍事偵察機進入蘇聯領空,佢話呢架飛機不過係米國氣象偵察機嚟 jie!

蘇聯就公佈左U-2機殘骸影片以及鮑爾斯供詞,響呢D證據面前艾森豪威爾唔能夠再否認,但係佢堅持話米國係有權派U-2機進入蘇聯領空進行偵察,而且聲稱米國政府以後仍然會繼續咁樣做,拒絕接受蘇聯嘅抗議。

呢個時候赫魯曉夫已經到達巴黎,準備出席米蘇英法四強高峰會議,在會前,赫魯曉夫發表聲明,要求米國佬必須要公開道歉,如果米國佬唔道歉,佢就會拉隊走人!

但係米國佬就堅持唔肯道歉,搞到大家冇彎轉,赫魯曉夫唯有提早走頭,由巴黎番回莫斯科,米蘇英法四強首腦高峰會議就咁變成流會。

北京睇到米蘇呢場鬧劇,當然非常開心,咁亦證明列寧主義萬歲呢三篇文章冇講錯到,你赫魯曉夫同米國佬搞緩和根本就係一廂情願,U-2機事件就狠狠咁刮左赫魯曉夫一巴,使到赫魯曉夫三和政策面臨破產。

大陸輿論就萬炮齊轟,將米國佬鬧到仆街,大陸各城市發動五千幾萬嘅群眾參加援蘇抗米示威行動,表面上係撐蘇聯,實際上係諷刺赫魯曉夫對米緩和政策嘅破產,赫魯曉夫當然知道中共嘅含意,佢就惱羞成怒,決心要整鑊傑嘅俾中共嘆。

1960年6月下旬,羅馬尼亞共黨要在首都布加勒斯特開第三次大會,赫魯曉夫就建議利用呢個機會召開一次國際共產黨會議,表面上理由係要商討今後國際局勢,但係實際上,赫魯曉夫係準備要在布加勒斯特大會上對中共進行批鬥。

中共係派彭真率領代表團到布加勒斯特,大會一開,赫魯曉夫就一馬當先,對中共進行猛烈抨擊,佢指責中共係教條主義者。

彭真睇到赫魯曉夫在台上指手畫腳咁媽叉中共,佢就企起身反駁,赫魯曉夫講一句,彭真就反駁一句。

赫魯曉夫話:如果列寧在生嘅話,佢會爬番起身,扭住你地中共耳仔,提醒你地中共乜嘢先至係真正嘅列寧主義!

彭真就反駁話:列寧可以扭到我地中共耳仔,咁就證明我地中共離列寧唔係好遠,列寧係扭唔到你地蘇共耳仔,因為你地蘇共係離列寧非常之遠!

呢個係中蘇共首次在公開場合展開罵戰,亦係向全世界暴露左中蘇共之間矛盾。

赫魯曉夫覺得佢在布加勒斯特大會上係遭到彭真侮辱,就決心要洗重手來懲罰中共。

1960年7月16日,蘇聯突然通知知中國,要將在中國大陸一千三百幾名蘇聯專家全部撤回,並且要帶走所有圖紙及資料,理由係:中國方面向在華蘇聯專家強行派發反蘇小冊子《列寧主義萬歲》。

呢個時候正係中國大陸因為大躍進失敗經濟面臨極端困境,赫魯曉夫咁樣做法即係等於落井下石,使到中國經濟困難百上加斤,亦令到中蘇之間裂痕難以修補。

有個人對於中蘇分裂係極為痛心,呢個人就係北越領袖胡志明是也!

當時越南南方正在開展緊武裝解放運動,胡志明知道越南南方解放必須獲得中蘇支持,如果中蘇分裂嘅話,就肯定會影響到越南南方解放鬥爭。

而且在社會主義陣營當中,胡志明算得上係德高望重,佢亦係唯一一位可以同時在毛澤東以及赫魯曉夫面前講得上說話嘅人。

1960年8月初,胡志明首先係來到北戴河見毛澤東,佢講明呢次係來勸和,希望中蘇能和解。

毛澤東就對胡志明講:睇在你胡伯伯份上,我地中共可以暫時停止發表批判赫魯曉夫嘅文章。

跟住,胡志明就到莫斯科見赫魯曉夫,赫魯曉夫亦同樣答應蘇聯方面可以暫時停止發表批判中共嘅文章。

就在胡志明斡旋之下,中蘇同意在1960年9月中旬舉行一次談判,中共就派左鄧小平在1960年9月16日飛抵莫斯科。

鄧小平係要同蘇共中央書記處書記蘇斯洛夫舉行談判,兩個人傾左幾日,但係依然傾唔埋欄,因為中蘇之間分歧實在上係太大也!

雖然係咁,中蘇仍然同意利用1960年十月革命慶典個個機會,召開八十一國共產黨代表,希望可以在呢次大會上能夠解決中蘇之間矛盾。

呢次中共就派左劉少奇率領代表團前往莫斯科,在劉少奇到達莫斯科頭果兩日,蘇聯係以最高規格來接待劉少奇。

赫魯曉夫及勃列日涅夫親自率領蘇共中央主席團全體成員到莫斯科機場迎接劉少奇,赫魯曉夫並且響劉少奇面前講左好多中蘇友好團結嘅說話。

但係當中蘇兩黨領導人坐低談判嘅時候,就即刻出現激烈嘅爭吵,互相指責對方係違反左1957年所簽署嘅《莫斯科宣言》,雙方已經嘈到分裂邊緣。

胡志明就繼續發揮佢作為和事佬嘅作用,佢就串聯左好多國家共產黨代表,分別向中共及蘇共請願,請求中蘇兩黨務必要以社會主義陣營團結大局為重,千祈係唔好分裂。

1960年第二次莫斯科會議,要形成一個新嘅國際主義共產運動文件,就係《莫斯科聲明》,對於呢個《莫斯科聲明》,中共係有意見,因為蘇共起草文本,唔單止要肯定蘇共二十大,仲要肯定1959年蘇共二十一大,入邊又提到有派別活動問題,乜嘢宗派問題,集團問題,民族主義問題,中共對此無法同意。

所以兩黨就《莫斯科聲明》嘅文本進行爭論,雙方最後都作出讓步,蘇聯作出讓步就係話你中共唔同意肯定蘇共二十一大,咁可以唔寫二十一大,但係蘇共二十大卻必須予以肯定。

中共作出讓步話可以接受二十大,另外,蘇共又作出讓步,唔將派別活動寫入,同時將有關乜嘢宗派主義及集團主義活動上嘅語調稍加緩和。

達成呢個妥協,對赫魯曉夫來講,係非常之開心,所以在《莫斯科聲明》簽字時候,老赫激動得多次擁抱中共領導人。

到最後關頭,中蘇總算係妥協,就各讓一步,仍然按照《莫斯科宣言》模式,簽署及公佈《莫斯科聲明》,暫時避免左中蘇一次分裂危機。

在《莫斯科聲明》上,實際上係中共作出更大讓步,因為在八十一國共產黨代表大會上,去肯定蘇共二十大路線綱領,係進一步強化赫魯曉夫就係蘇共作為國際共運領袖形象。

在《莫斯科聲明》正式簽署及公佈之後,劉少奇就即時以中華人民共和國國家主席身份對蘇聯進行國事訪問,劉少奇所到之處,都係聽到一片中蘇友好團結萬歲嘅口號,中蘇關係似乎恢復到五十年代中期果種友好狀態。

蘇聯為表示誠意,答應將米格廿一戰鬥機製造技術轉讓俾中國,並且向中國提供蔗糖、穀物及盧布貸款等援助,對於當時中國大陸經濟困難多少有左幫助。

赫魯曉夫甚至表示如果中國方面同意嘅話,佢可以將已經撤回果一千三百幾名蘇聯專家從新派往中國,但係中共知到赫魯曉夫呢條友反覆無常,唔想再俾佢玩多一鑊,於是就婉拒赫魯曉夫好意。

中蘇呢種友好狀態維持時間好短,唔到一年,两國就為左一個細國仔而起爭執,呢個細國仔就係阿爾巴尼亞。阿爾巴尼亞係東歐集團最細一個國家,人口得三百萬。

阿爾巴尼亞共黨領袖係霍查,呢條友係斯大林主義死硬分子,在1956年赫魯曉夫對斯大林鞭屍後,霍查就非常之不滿,霍查繼續在阿爾巴尼亞推行斯大林政策,赫魯曉夫因為咁就經常同霍查嘈起上來。

老赫一怒之下,就斷絕對阿爾巴尼亞所有經濟及軍事援助,由於1960年6月布加勒斯特會議上,彭真遭到赫魯曉夫率領下大部分東歐國家圍剿,獨係阿爾巴尼亞呢個時候仗義執言,為中共辯護。

中共當然視阿爾巴尼亞為知己,就在經濟上及軍事上大力援助阿爾巴尼亞,咁樣又惹得赫魯曉夫極度不快。

蘇聯宣傳機器呢個時候日日鬧阿爾巴尼亞教條主義者,其實就係鬧中共,中共亦不甘示弱,日日鬧南斯拉夫修正主義者,查實係鬧蘇共也!

但係在表面上,中蘇兩黨仲繼續維持原來關係,進入1961年,按照陳毅及彭真講法係:外甥打燈籠,照舅(舊),中共特別極力宣傳第二次莫斯科會議及《莫斯科聲明》重要意義,佢地反覆咁講:我地依家在國際共運中只係扛二旗,大旗係要由蘇共來扛。

中共又講:中蘇兩黨就好似兩隻在寒風中嘅刺猬,抱埋一齊會刺,但係雙方又給予對方輸送暖氣,所以雙方都互相需要,係分唔開,中蘇係唔能夠分裂。

1961年10月,蘇共召開二十二大,呢次由周恩來率領代表團出席,赫魯曉夫親自到莫斯科機場迎接,一路與周恩來有講有笑,表面上仲非常之客氣。

但係當赫魯曉夫在會上所發表報告,有兩點係出乎中共代表團意料之外。

第一點係赫魯曉夫對米國態度非常溫和,大講談判、裁軍及和平競賽等。

第二點係赫魯曉夫在報告中大搞「三反」,即係反「反黨(指莫洛托夫等)集團」、反斯大林,反阿爾巴尼亞。

周恩來在大會上發言,唔提前面兩反,淨係提最後一反,即係關於反阿爾巴尼亞問題。

周恩來含蓄咁對反阿爾巴尼亞提出唔同意見,佢話兄弟如果不幸發生爭執,應該本著無產階級國際主義精神,平等及協商一致原則,耐心咁加以解決。希望在互相尊重、獨立及平等基礎上,重新團結起來。

跟住,周恩來要求與赫魯曉夫面對面進行一次談話,周恩來明確向老赫表示中共唔同意蘇共中央報告中公開批判阿爾巴尼亞。

周恩來又再次提出蘇共唔應該全面否定斯大林,重申中共在1956年所發表關於斯大林問題觀點。

赫魯曉夫唔肯聽周恩來勸告,佢話我地以前要靠你中共,因為當時中國共產黨聲音對於我地有重大意義,但依家我地掂晒,唔再需要依靠你中共,我地要走自己條路!

周恩來見老赫如此頑固,亦懶得同佢理論,就提前返回北京,留低彭真繼續參加蘇共二十二大會議。

蘇共二十二大結束後冇幾耐,蘇聯與阿爾巴尼亞斷絕邦交。

老赫對老周在莫斯科訓斥佢一頓非常之唔乃奇,後來佢對人話老周好似老竇教仔咁教訓佢,認真難頂也!

進入1962年,中共黨內對蘇共嘅認識發生左根本性變化,就係將中蘇之間關係確定為敵我性質關係!

1962年有兩件事,一個係伊塔事件,就係在1962年春,新疆伊犁及塔城地區,中國邊民大量越境逃到蘇聯,總共有成七萬幾人,中國認為係蘇聯駐伊犁領事館煽風點火嘅結果。

呢單嘢對中蘇關係來講,影響非常大,提醒中共領導人要開始由國家安全角度去考慮中蘇邊境問題,但係呢一鑊仍然未足以使到毛澤東對中蘇關係進行新嘅調整。

更關鍵就係第二件事,呢單嘢與中國大陸內部有關。因為嚴重經濟困難,中共黨內召開會議不斷來調整經濟政策,在呢一段過程中間,1962年2月,有個擴大中央工作會議,叫做七千人大會。

呢個時期,中共內部有三條線索,第一條線索係:在中共中央總結經驗教訓呢次會議上,出現一種傾向,例如劉少奇在呢次會議上提到「七分人禍,三分天災」,亦即否定大躍進,否定人民公社,呢種否定係超過毛澤東認識錯誤所能夠接受心理底線。

第二條線索係:1962年2月,中央聯絡部部長王稼祥俾中央一份報告中,反思前一段中共外交政策,提出新外交政策嘅建議:對世界革命援助要量力而為,對帝修反要和,對世界革命援助要少,即係「三和一少」,亦係超過毛澤東所能接受底線。

第三條線索係:彭德懷在呢個時候出來提出要為佢平反,而劉少奇又舊話重提,指彭德懷係串通蘇聯,亦刺激到毛澤東非常敏感神經。

於是毛澤東開始懷疑係唔係中共黨內出現修正主義傾向,係唔係會有赫魯曉夫代理人?

咁就導致毛澤東要調整中國外交內政政策,在1962年夏天7到8月北戴河中央工作會議上,毛澤東批所謂黑岸風,翻案風,單幹風,批三和一少,毛再次提階級鬥爭。

同年8月9月間八屆十中全會中,毛澤東發表關於階級鬥爭論述:社會主義社會係一個相同長嘅歷史階段,存在著階級、階級矛盾及階級鬥爭,存在著資本主義復辟嘅危險性。要天天講,月月講,年年講!

1962年11月,中共中央成立左一個中央反修文件起草小組,直屬中共中央政治局常委,組長係康生。

 呢個中央反修文件起草小組領導一個寫作班子,由黨內著名寫手又稱「秀才」負責寫出大篇文章,呢班「秀才」計有許立群、姚溱、喬冠華、王力等人。

所有起草文件,都先送由鄧小平主持會議進行討論修改,然後再送政治局常委審查,通過之後就正式發表。

個起草小組一直負責所有批判蘇共及其附庸文章,到1966年文化大革命爆發後才告結束使命。

呢個時候,中共又認為國際共運左派隊伍已經形成,在1960年中蘇兩黨分歧嘅發展,例如在布加勒斯特大會上,中共都好孤立。

隨住中蘇爭論發展,國際共運中間各個國家嘅共產黨及工人黨就產生出好多派別,乜嘢馬列派,革命派,左派,到1962年國際共運一個重要特點就係國際共運左派隊伍之形成。

呢個情況對於中共來講,係極大嘅鼓舞,刺激中共中央要當國際共運領袖呢種心理就膨脹矣!呢個時候,國際共運領袖嘅責任應該由中共來承擔也!

毛澤東決定要同蘇共鬥落去!唔會再容忍對蘇讓步,1962年底,中共提出要將中蘇兩黨在前一階段關於戰略方針問題上嘅分歧、爭執,確定為敵我性質嘅矛盾,而且係唔可以調和嘅!

中共強調對蘇要主動出擊,主動進攻,唔怕緊張,要主動回擊蘇聯,反擊蘇聯,甚至唔怕邊緣化,咁樣就決定左中蘇今後關係走向,所以1962年係中蘇關係中關鍵第一年。

自1950年以來,中共外交路線及方針,係要確立反米統一戰線,到呢個時候,就調整為反帝反修,本來係一個拳頭出擊,依家變成係兩個拳頭出擊。

1962年底到1963年初,毛澤東詩詞有七律《冬雲》及《滿江紅·和郭沫若同志》,在此毛澤東話:獨有英雄驅虎豹,更無豪傑怕熊羆,由此可以睇到毛澤東果種與米帝及蘇修進行鬥爭嘅豪情!

1963年3月30日,蘇共中央在給中共中央回信中間,就提出我地應該制定國際共產主義運動嘅總路線。赫魯曉夫呢條友好蠢,因為兩次莫斯科會議早已確定左蘇共二十大方針綱領,呢個自然就係國際共運所要遵循嘅標準,其實就已經係總路線,仲提來做乜?

蘇共中央呢封回信,正中毛澤東下懷,俄國佬呢次係送上門來,毛澤東話過去我地都冇提出自己宣言或草案,都係就蘇共草案進行修修補補,呢次借蘇共來信為由頭,由我地提出與蘇共來信相對立嘅綱領文件,時機已經成熟矣!

於是毛下令中央反修文件起草小組寫封長篇大論嘅回信,為鄭重其事,初稿出來後,仲邀請阿爾巴尼亞,朝鮮及越南等共產黨領導人對此發表意見,然後再據佢地意見加以修改。

呢封就係中共中央在6月14日俾蘇共嘅覆信,題目係《關於國際共運總路線的幾點建議》,並在《人民日報》上全文發表。初左華文廣播之外,仲以各種外語廣播全信內容,又用各種文字印發小冊子。

呢封信,中共提出廿五條建議,係中共第一次提出自己綱領性宣言,實際上係要求所有社會主義國家必須遵循中共綱領,與蘇共方針即赫魯曉夫方針綱領,係完全大相徑庭,咁就搞到赫魯曉夫非常狼狽。

1963年7月,中蘇兩黨為避免正式破裂,同意在莫斯科召開一次中蘇兩黨會談,中共談判代表團團長係鄧小平,其他成員有彭真、康生及楊尚昆等。在鄧小平率團離開北京去莫斯科時,劉少奇及周恩來親到機場送機,以示隆重也!

中共代表團7月5日到達莫斯科之後,發現蘇方招呼非常馬虎,飯菜極為難食,彭真就在車上為飯菜差而發一輪牢騷,第二日飯菜果然有改善,亦證明蘇方在車上安裝左竊聽器也!

中蘇兩黨會談由7月6日開到7月20日,總共傾左九次,蘇方首席代表仍然係蘇共理論權威蘇斯洛夫。一開場,蘇斯洛夫就連續屌左中共成兩個鐘頭!

第二輪會談,鄧小平發言,指出中蘇分歧係起自1956年蘇共二十大,跟住佢列舉由1957年到1963年以來,蘇共一系列反華言論及舉動,鄧小平話中蘇兩黨分歧實質係革命與唔革命嘅問題。

就在中蘇兩黨談判期間,發生蘇聯政府驅逐中國駐莫斯科使館人員及中國留蘇學生出境事件,蘇方指中國使館人員及留蘇學生在莫斯科派發反蘇文件,雙方為此而爭吵一番。

赫魯曉夫唔理中蘇莫斯科談判尚在進行中,就忍唔住要對於中共所提綱領加以反駁, 7月14日,蘇共中央就發出一封致蘇聯共產黨基層組織及蘇共黨員《公開信》,呢封《公開信》長三萬字,係全面批駁中共所提廿五條建議。

在呢種氣氛底下,中蘇談判陷入僵局,鄧小平與蘇斯洛夫輪住發言互相攻擊,鄧小平嚴詞斥責蘇方搞分裂,搞到蘇斯洛夫臉色紅一陣白一陣,無言以對!

7月22日中蘇共在莫斯科發表公報,宣稱中蘇兩黨第一階段談判結束,準備再舉行第二輪談判,時間地點待雙方商討後再決定,算係留有餘地。

中蘇兩黨談判雖然冇結果,但係7月25日,米蘇英卻在莫斯科簽署部分停止核試驗協定,係禁止大氣層及水底進行核試驗,分明就係限制中國發展核武器。

米方核禁談判代表副國務卿哈里曼在與赫魯曉夫見面時,老赫對佢講,中國冇左蘇聯幫助之後,冇乜可能會在短期內發展出核武器,請米國佬放心。

鄧小平等回北京後,中共中央即刻著手研究蘇共中央《公開信》,將信中要點加以分類,然後針對呢D論點,擬定中共中央準備批駁文章題目。

當時總共擬定左十幾個題目,其中有關於中蘇分歧由來、關於斯大林問題、關於南斯拉夫問題、關於戰爭與和平問題,關於民族獨立運動問題、關於各國工人運動戰略策略問題、關於和平共處總路線問題,關於社會主義國家關係問題、關於中蘇關係問題、關於分裂主義問題、關於維護國際共產主義團結問題等等,可以話係保羅萬有也!

8月初,毛澤東召開政治局常委會議,專門研究點樣反駁蘇共中央《公開信》,毛首先提出以下幾點:

一) 蘇共《公開信》已經公開指名道姓攻擊我地,我地評論同樣要指名道姓,蘇共既然要公開論戰,咁我地亦要公開論戰;
二) 豺狼當道,焉問狐狸。我地評論要直接指名蘇共領導,對其他蘇共附庸黨反華言論不予理會;
三) 擒賊先擒王,矛頭對準赫魯曉夫,佢係急先鋒,講話亦最多及最惡劣;
四) 評論要有嚴肅嘅論辯,亦要有抒情嘅嘲諷,要有中國風格及氣派,剛柔相濟,軟硬結合。

由1963年9月起到1964年7月為止,在毛澤東直接領導及指導下,中共中央寫作班子就連續寫左九篇重頭文章,呢九篇文章後來被稱為「九評」。

由1964年2月到1964年7月,後三評直接將矛頭指向左赫魯曉夫,第七評就係《蘇共是國際共產主義運動的最大分裂者》,九評就係《關於赫魯曉夫的假共產主義及其在世界革命歷史上教訓》。

咁樣就真係激到赫魯曉夫生蝦咁跳矣!

1964年3月4月間,中共情報機構從莫斯科傳來一項機密訊息,就係蘇共黨內高層有人想趕赫魯曉夫落台,毛澤東對大家講:赫魯曉夫雖然成日同我地作對,但係呢條友在蘇共黨內未算係最衰果個,而且我地熟悉佢脾性,佢想做乜,我地一清二楚!

所以毛澤東話如果老赫被換馬,未必對中共有利,我地有必要扶一扶老赫一把。佢命令中央起草一封祝賀赫魯曉夫七十大壽電報,一開頭就稱呼老赫為「親愛的同志」,十分肉麻也!

呢封電報全文在《人民日報》發表後,大陸老百姓覺得好奇怪,明明我地黨報日日媽叉赫魯曉夫,何以突然整封咁樣捧老赫嘅祝賀電報,佢地當然唔知道老毛用意。

中蘇關係第二個關鍵年係1964年,中國軍事防禦戰略調整到既對米國又對蘇聯,蘇聯成為中國假想敵。

1962年12月12日,赫魯曉夫在最高蘇維埃會議上作外交政策報告時候,提出中國軍隊由麥克馬洪線撤回,與其你退回去,乾脆當時就唔好越過去啦!又講香港及澳門都係殖民地,而中共卻冇收回意思。

1963年3月8日,《人民日報》發表一篇社論,首次明確提出中蘇之間仲存在不平等條約問題,實際上就係講中蘇邊界問題,呢個係中共對蘇政策作出調整之後,反映在處理邊界問題方針之變化。

呢篇社論發表不久後,即1963年7月,蘇聯與蒙古簽訂左一個幫助蒙古加固南部防禦協定,所指就係中蒙邊境,所以呢個協定係針對中國。

之後,赫魯曉夫仲在華沙條約國家領導人會議上提出,話蒙古領導人澤登巴爾想要加入華沙條約,赫魯曉夫意思係要接受,企圖將蒙古納入華沙集團,但係因為羅馬尼亞反對,所以未能成事。

所以1963年9月,中共中央軍委召開邊防工作會議,其中提到要特別加強中蒙及中蘇邊界防務工作。

1964年2月4日,七評話蘇共係國際共產主義運動最大分裂者,跟住,2月10日,毛澤東在會見金日成話蘇聯對中國如果壓唔服嘅話,佢仲有一條路,就係同中國打仗!

毛澤東係開始考慮蘇聯會對中國進行進攻,係毛首次明確提出左呢個問題。

1964年4月到5月,中共中央工作會議期間,毛澤東就將國民經濟「三五計劃」重點由吃穿用轉移到以戰備為主,毛澤東並且話根據目前赫魯曉夫反華趨勢,我地要警惕佢會冒天下之大不韙來進攻中國!

周恩來在解釋「三線」時候話,對於修正主義來講,西北東北係第一線,「三線」建設本來係著重來對付米帝,呢個時候亦要考慮到蘇聯對中國軍事威脅可能性。

1964年7月份,在一次政治局會議上,毛澤東又講:我地唔能夠只係注意南面,唔注意北面,只注意帝國主義,唔注意修正主義。

1964年7月10日仲發生一件事,毛澤東在會見日本社會黨人士時候,日本人講到蘇聯霸占日本領土,毛就講俄國佬在歷史上佔領人地領土多得很,一百年前將貝加爾湖以東,包括伯力,海參崴,堪察加等等全部佔據左!呢筆賬我地仲未同俄國佬算!

呢個係中國最高領導人首次對外公開講中蘇之間領土呢筆賬仲未計算。

日本代表團見完毛澤東在7月12日到達香港,佢地在接見媒體採訪時就將毛講話內容透露出去,引起極大轟動。

呢單嘢對蘇聯刺激甚大,1964年9月2日,蘇聯《真理報》發表長篇編輯部文章,指中國清朝皇帝係較老沙皇更厲害擴張主義者,明顯係針對毛澤東講話。

9月15日,赫魯曉夫亦接見日本一個議員代表團,佢話:我地蘇聯係掌握最先進武器(暗指核武器),其殺傷力及毀滅力係非常之大,我地蘇聯領土係神聖不可侵犯,邊個膽敢來侵犯,我地會給予毀滅性打擊!

咁樣赫魯曉夫係首次向中國發出核威脅。

赫魯曉夫呢段說話出來之後,同樣對毛澤東刺激甚大,1964年10月,毛澤東先後會見阿爾巴尼亞巴魯庫及北韓金日成,多次問佢地蘇聯有冇可能打入來?有冇可能會佔領新疆,東北及內蒙古?

毛話雖然蘇聯進犯可能性唔係好大,但係我地必須做好準備。

1964年中後期,中國對外軍事防禦戰略,唔係單一對付米國,而係要加入對付蘇聯防禦,由原來對蘇只限意識形態鬥爭,到依家要加上軍事鬥爭準備矣!準備兩面作戰!

九評全部發表之後,雖然毛澤東唔想赫魯曉夫發生不測,但係到1964年10月,赫魯曉夫果然俾佢班同志趕左落台。

當時中共方面仲想蘇共新領導上來之後,係唔係有可能會有改變,如果有所改變嘅話,咁中共與蘇共或者可以搵到新共同點。

1964年11月份中共派出周恩來去蘇聯,參加十月革命紀念活動,想去摸新蘇共中央底牌。

點知11月7日發生馬利諾夫斯基事件,蘇聯國防部長馬利諾夫斯基飲大左,先係走向周恩來對佢話我地將赫魯曉夫搞落台,你地亦應該將毛澤東搞落台,老周一聽即刻行開唔鳩理佢。

但係呢個馬利諾夫斯基意猶未足,又走去攬住賀龍講同樣說話,賀龍即向周恩來匯報呢件事。

而西方傳媒第二日大肆報導話周恩來已經與蘇共新領導達成協議要趕老毛下台!

老周馬上搵蘇共新領導勃列日涅夫興師問罪,老勃解釋係馬利諾夫斯基係酒後失言,周恩來反駁話係酒後吐真言!

接落來中蘇兩黨會談,周恩來提出蘇共唔好再背住赫魯曉夫呢個包袱,改弦更張,但係蘇共明確表示對華方針與赫魯曉夫相比冇任何差別,一切照舊也!

呢次周恩來在莫斯科,可以話係中蘇高層最後一次碰頭,已經成為絕響矣!

因為1965年3月,莫斯科召開一次世界工人黨會議,中共極力反對召開呢次會議,亦冇參加呢次會議,所以呢次莫斯科會議象徵國際共運徹底走向分裂。

1966年2月,蘇共召開二十三代,發函要請中共參加,中共拒絕出席,中蘇兩黨關係正式中斷矣!僅保留中蘇兩國外交關係而已。

自四十年代末由斯大林建立起社會主義陣營亦告名存實亡矣!

中蘇共分裂係廿世紀六十年代一件大事,因為呢鑊嘢影響到全世界政治格局,但係由於中蘇一直保密關係,外界對此所知甚少,就連米國中央情報局對於中蘇分裂亦未能及時作出正確判斷。

米國中央情報局一直到1962年仍然唔相信中蘇同盟關係會破裂,理由係中蘇存在住意識形態一致、政治追求一致及國家利益與安全利益一致,而且中蘇有共同敵人,就係米國佬及西方國家。

米國佬認為中蘇之間分歧係可以調和及妥協,到1963年,中央情報局先至認識到中蘇真係分裂,但係就唔明白點解會分裂。

莫講米國中央情報局搞唔清楚中蘇共為乜要分裂,即使到今日,歷史學家仍然對中蘇共分裂真正原因提唔出結論。

有人話係中俄兩個民族性唔同,所以分裂係必然。

有人話係赫魯曉夫與毛澤東性格不合所致。

六十年代中蘇共大論戰,有大文章發表,北京人民講錯電台就成晚反覆咁播出全文,我好佩服個廣播員,咁柒長文章居然冇讀錯半個字!

呢場大論戰,雙方發出字彈以千萬計,今日睇番,基本上係垃圾,但係當時雙方投入大量人力物力去寫垃圾文章,究竟係為乜?

中蘇共大論戰應該係屬於煙霧彈,係用來掩蓋雙方真實意圖。

到字彈用完,就係子彈登場!中蘇終於在邊境開片!

歷史最弔詭嘅地方係,五十年前中共輿論萬炮齊轟,屌柒俄國佬勾結米帝來夾擊中國,點知到最後居然係中共與米帝勾結夾擊毛熊,最後搞到蘇聯帝國呢個龐然大物倒塌!

米國佬當時亦認為主宰呢個世界係米蘇兩大核子國,所以米國佬頻頻向毛熊送秋波,根本就冇將中共睇在眼內,認為封鎖制裁就足以陰乾中共矣!

但係到尼克遜上台,米國佬終於醒悟到中共有舉足輕重之力量,知道要搞掂毛熊,必須要搵剛剛同毛熊開片嘅中共,咁就出現米國戰後最大一次外交戰略轉移:聯華制俄!

毛澤東應該係中國近代最具世界視野及格局領導人,因為中共與毛熊聯盟,中共永遠處於老二地位,永遠冇得出頭,佢不惜與毛熊翻枱,拉起第三世界呢個隊伍,中國就無可爭議成為阿頭,在國際博弈中,中國就唔會再係人地棋子矣!

中華帝國幾千年來都係天朝上國,都係掛頭牌。但係鴉片戰爭之後,中華帝國地位一落千丈,成為豬狗不如九流弱國,係中華民族最屈辱之一段慘史也!

二次大戰後,中國擺脫九流弱國地位,刮民黨依附米國做老二,共慘黨最初亦係依附蘇聯做老二,但係呢個唔係老毛建國最終目的,佢始終係想恢復中華帝國掛頭牌地位,所以就必須脫離毛熊也!

赫魯曉夫收皮,大陸民間都認為係俾我地中國試爆第一顆原子彈轟落台,原因係1964年10月17日北京各大報章頭版都刊登左兩單大新聞:一單係中國核彈試驗成功,另一單就係赫魯曉夫落台,所以俾人有呢種印象也!

但係查實赫魯曉夫落台與中國核試並冇乜直接關聯,因為呢兩件事發生時間完全唔同也!

1964年10月14日北京時間深夜,蘇聯駐華大使契爾沃年科突然打電話俾中共中央辦公廳,要求見中共中央領導人,話有緊急事項向中方通報。

按照過去中蘇關係友好時期,通常毛澤東會接見蘇聯大使,但係1964年中蘇關係緊張,老毛豈會隨便見俄國佬?

於是中共中央辦公廳主任楊尚昆決定由中央聯絡部副部長伍修權接見蘇聯大使,因為係半夜三更,伍修權就在屋企見契爾沃年科。

契爾沃年科一見到伍修權就即刻話蘇共中央要向中共中央通報一件事,就係10月14日下午,蘇共中央接受赫魯曉夫同志辭職請求,由勃列日涅夫同志接任蘇共總書記,柯西金同志接任總理!

其實在莫斯科時間10月14日上午,赫魯曉夫在勃列日涅夫迫宮下,含淚答應自己炒自己魷魚,當日下午,蘇共中央開會接受老赫辭職。

而中國第一顆原子彈則係在北京時間10月16日下午試爆,距離老赫落台有兩日之久。由於蘇共中央係在莫斯科時間10月15日深夜(北京時間10月16日上午)先至正式對外公佈老赫落台消息,所以10月17日北京各報將兩單新聞並列頭版也!

中共在10月16日試爆原子彈,係早於蘇聯大使契爾沃年科向中方通報老赫落台之前已經確定,所以兩鑊嘢並冇關聯也!

伍修權在接到蘇聯大使通報後,當然唔敢怠慢,立即向楊尚昆報告,楊尚昆馬上禀報毛主席,由10月15日起,老毛連續多次召開政治局常委會議,討論對策,講來講去,大家對勃列日涅夫呢條友冇乜特別印象,唔知佢對華政策會點,毛最後拍板話一於“靜觀其變”可也!

在蘇共中央正式對外公布人事變動後,中共中央國務院發出賀電俾勃列日涅夫及柯西金,祝佢地高升,語調溫和,係試探性質。

依家世人淨係睇到“九評”,實際上中共中央正在研究緊寫“十評”,但係因為赫魯曉夫突然收檔,呢篇“十評”就冇寫出來。

“十評”內容係討論中蘇邊境問題,應該會極具爆炸性也!如果推出,中蘇邊境戰鬥可能會提早幾年爆發也!

中蘇口角之初,中共指責蘇共執行修正主義,所以稱毛熊為蘇修,到1968年蘇聯出兵鎮壓捷克,中共認為蘇修已經墮落成為對外侵略社會帝國主義,合稱為蘇修社會帝國主義!

果然蘇修社會帝國主義侵略阿富汗就成為毛熊墳墓矣!

在中共中央政治局常委討論蘇共新領導層時,大家都對勃列日涅夫唔係好了解,劉少奇話1960年底佢訪問蘇聯時,全程由勃列日涅夫接待,覺得佢沉默寡言,唔輕易表露喜怒哀樂,與赫魯曉夫性格完全相反。

金日成曾對鄧小平講勃列日涅夫呢個人木頭木腦,有D蠢蠢地,係真蠢定係扮豬食老虎就木宰羊矣!

勃列日涅夫有個怪癖,就係特別中意荷蘭水蓋,被人諷刺有濃重“勳章情结”,佢一生共獲荷蘭水蓋超過114枚!

老勃被稱為荷蘭水蓋大王真係冇講錯也!

中蘇共公開嗌交果段時間,我仲讀緊書,北京人民講錯電台每次播放𨳒柒俄國佬文章,我都洗耳恭聽,第二日又買文匪報睇全文,覺得非常之不可思議,因為自細我地就接受港台及米國傳媒影響,認定中共就係蘇共走狗,點解依家會翻臉翻到咁樣程度?

如果話中共擺脫毛熊控制係歷史之必然,但係五十年代末到六十年代初,卻並非係中共與蘇共翻枱最佳時機,因為呢個時候正係中共建政以來最困難一段時間,點解毛澤東會在自己羽毛未豐之前就要同毛熊決裂呢?

毛澤東兵行險著,唔通佢唔怕米俄合謀夾瓜佢?

1964年11月初,在赫魯曉夫已經落台,中共尚對蘇共新領導層勃列日涅夫唔係太了解,毛澤東在中共中央政治局常委會議上,慷慨激昂咁講左一段說話。

毛澤東話:我地中國係個大國,我地中華民族從來冇向人地屈服過,有挫折但係會繼續奮鬥,會頑強地崛起。一百幾年來,列強要想征服我地,但係佢地都失敗左。我地依家係個社會主義國家,當然更加冇可能向任何外國屈服,面對最強大帝國主義米國,我地亦冇低過頭!對蘇聯亦係一樣,我地絕對唔會屈膝稱臣!我地所爭唔係想居人之上,而係在爭取平等地位!

五十幾年後,老毛說話仍然擲地有聲也!

毛澤東決心擺脫毛熊有千種理由,但係相信佢唔會預計到毛熊咁快會玩完,佢更加唔會預料到因為中共早日脫離蘇共主導共產主義集團,蘇東波一來,中共反為冇受到任何衝擊而得獨善其身!

當矮佬鄧及眾多中共老一輩領導人在睇到蘇東波威力後,應該都會標出一身冷汗!佢地都會想如果中共仲係綁在蘇聯集團身上,相信會難逃蘇東波一劫也!

蘇東波係米國佬及西方國家策劃多年一項倒蘇工程,如果中共仍然係蘇聯集團一份子,肯定亦會被列為重要戰靶之一,米國佬點可能會放生中共?

1958年,毛熊提出在大陸建造長波電台及建立中蘇聯合艦隊,毛澤東拒絕之,成為中蘇分裂一條導火線,唔少人認為毛係維護中國主權而拒絕毛熊要求,呢個可能係理由之一,但係並非係最主要之理由。

按照中蘇軍事同盟條約,蘇聯要在大陸建造長波電台及建立中蘇聯合艦隊,並無不合理之處也!米國佬可以在全球同盟國家設立各種軍事基地,點解作為蘇聯軍事盟友中國唔允許蘇聯咁做呢?

毛澤東最大理由恐怕係唔想被綁上蘇聯呢部戰車,如果蘇聯在大陸設立長波電台及建立中蘇聯合艦隊,一旦米蘇開拖,中國大陸就肯定會成為米國核彈攻擊目標。

1962年10月古巴導彈危機時期,米國軍事參謀將米國全球核打擊點地圖俾甘迺迪審閱,甘迺迪見到中國大陸主要港口城市均被列入核打擊點,佢就提出異議,甘迺迪話第一中國冇擁有核武器,第二蘇聯在中國並冇任何軍事基地,所以佢主張將中國大陸核打擊點除去!

假定1962年,中蘇已經建立聯合艦隊,毛熊攜帶核彈潛艇停泊在中國大陸港口,咁米蘇一開片,中國大陸呢D港口肯定會遭到米國佬核打擊矣!

毛澤東其實都幾能缩骨,蘇聯軍事援助jetso佢全部要,但係如果有被牽涉到成為米蘇核戰戰靶,佢就唔能制!此所以赫魯曉夫谷能住度middle air也!

赫魯曉夫媽媽聲,佢話你老毛要我地幫你造原子彈,又要我地幫你造核潛艇,樣樣jetso都要,獨係作為盟友應該要孭嘅責任就唔鳩制!天下豈有如此道理?

老毛jetso就要,鑊就唔肯孭,老赫焉能唔火鳩滾也!

平情而論,其實赫魯曉夫對中共唔算差,起碼好能過斯大林億倍以上,冇證據顯示老赫有意侵犯中國主權,但係呢條友衰在衝動,俾老毛睇穿左,所以基本上係老赫俾老毛玩,而唔係老毛俾老赫玩也!

1964年11月周恩來去莫斯科摸底,結果因爲馬林洛夫斯基事件,中蘇談判不歡而散,呢個係中共高層最後一次造訪莫斯科,但係蘇共高層有條友却在中蘇分裂期間两次到北京,佢就係蘇聯總理柯西金是也!

1965年蘇共準備唔理中共反對,决定在3月召開一次國際共產黨會議,中共拒絕出席,爲說服中共改變主意,柯西金在訪問北越途中,借專機在北京加油之機見毛澤東及其他高層領導人。

呢個係毛澤東生平最後一次見蘇共高層領導,雖然柯西金態度十分誠懇,但係毛不爲所動,話堅持要與蘇共争論一萬年,柯西金聽到嚇一大跳,話希望中蘇争論時間盡量縮短。

毛澤東就話:睇在你柯西金份上,我可以將中蘇争論時間縮短一千年,即係仲要争論九千年也!柯西金係個老實人,聽到毛澤東大話西遊,真係講唔出說話來,呢次中蘇談判當然冇結果喇!

到1969年3月,中蘇邊境發生武裝衝突,老勃及軍隊高層均主張對中國進行核打擊,主和派柯西金力排眾議,主張争取與中共高層溝通,避免中蘇大戰。

當年9月,北越領袖胡志明去世,中蘇高層均會赴河內奔喪,周恩來唔想同蘇共高層碰頭,提早趕去河內,拜完胡伯伯即刻走頭,柯西金趕到河內已經見唔到老周矣!

但係老柯唔死心,佢請北越總理范文同幫佢傳話,希望佢專機可以在返莫斯科時停靠北京機場,趁加油時間在機場與周恩來就邊境衝突進行緊急磋商。

但係中共遲遲未有答覆,柯西金專機離開河內,途中在中亞加油先至接到中共答應會談信息,老柯即刻下令專機掉頭飛往北京,於是就有北京機場柯周談判呢一幕矣!

柯西金與周恩來在北京機場傾左幾個鐘頭,中蘇達成協議,雙方在邊境上軍隊脱離接觸,盡量避免衝突,同時亦就中蘇展開副部長級邊界問題談判達成共識,對中蘇軍事緊張對立局面有緩和作用。

中蘇關係雖然緊張,但係中國乃禮儀之邦,待客禮貌不可缺,老周在機場以盛宴招呼老柯,老柯對北京填鸭讚不絕口,老周命令厨房即刻再整多隻填鴨,俾老柯帶上飛機享用也!

其實當年諾貝爾和平奬係應該頒俾柯西金也!

當年在中蘇争執之間做和事佬,除左北越胡志明外,仲有羅馬尼亞共黨領袖齊奥修斯古。

爲調停中蘇之間争執,齊奥修斯古親到北京見毛澤東進行游說,毛澤東話我講過要同蘇共争論一萬年,上次柯西金來北京,我俾面佢,將時間縮短一千年,依家又俾面你齊奥修斯古,再縮短多一千年,即係要争論八千年也!齊奥修斯古當場爲之吹能脹也!

1969年9月,北京機場柯西金周恩來會談,對有條友起極大刺激作用,呢條友就係米國大統領尼克遜也!

尼克遜1969年初上台後,第一件事就係要設法與中共尋求和解,佢下令從台灣海峽撤走第柒艦隊,又允許米國六種公民可以去中國大陸訪問,就係向阿爺表示愛意也!

尼克遜獲悉中蘇高層在北京機場會談,大起恐慌,佢對基辛格話如果中蘇和解並且再度聯手,咁我地米國就會有大麻煩也!

所以佢命令米國駐波蘭大使設法直接與中共外交官接觸,就出現年底米國大使在華沙外交活動上追住中共駐波蘭參贊呢種場面,結果係1970年1月,中米恢復華沙會談,米方第一次表示願意派官員到北京進行溝通,可見尼克遜如何喉急也!