六十年代初蔣光頭反攻大陸之謎

六十年代初蔣光頭反攻大陸之謎

一九六一年四月一日,蔣介石下令在台北縣三峽地區秘密成立「國光作業室」,由刮民黨陸軍中將朱元琮擔任主任,並且調動海、陸、空三軍優秀參謀人員三十餘人進駐。

咁呢個「國光作業室」究竟係搞乜東東?原來係蔣光頭決定正式展開擬定反攻大陸嘅作戰籌劃也!

反攻大陸計劃構想主要分為兩個階段,第一階段係以廈門為目標,由刮民黨軍突襲登陸廈門,以廈門為據點,依照情勢發展。向南往廣州進兵,或者向東或向北,分佔福建及湖南。

國光計劃」第二階段,目標係在大陸建立一長期攻勢基地,為此,特設立一「華南戰區總司令部」,負責反攻大陸後各「收復區」內嘅地方重建及社會動員。

但係,反攻大陸是否成功,最關鍵就係米國老細態度,唔好彩係一九六一年初起,米國總統已經換左係民主黨甘迺迪,呢條友素來對台灣刮民黨不善,主張同中共溝通,如果俾佢知道「國光計劃」內容,實會洗橫手阻攔者也!

為左擾亂米國老細視線,老蔣又同時下令另外在台北新店碧潭成立一個「巨光計劃室」,由刮民黨副參謀總長廣東台山佬余伯泉負責推動台、米雙方進行聯合作戰,並向米國佬提交一份「野龍計劃」執行細節,係要求米國佬協助刮民黨部隊發動在大陸敵後空投任務。

呢個「野龍計劃」具體做法係以廿至三十人為一小組,由米國佬提供C-54G運輸機,對福建,廣東,江西及湖南等地區進行空投,各小組進入大陸後,就會破壞當地中共組織,誘發大陸民眾反抗中共暴政運動及進行游擊作戰。

呢種小規模作戰計劃,米國佬係唔會反對,因為自五零年米國佬對台灣提供軍事援助起,米軍顧問團團長蔡斯就向老蔣講明,台灣刮民黨部隊任何調動如果牽涉到營級或五百人以上兵力,必須事先知會米軍顧問團,而「野龍計劃」僅係調動兩三百人兵力,米國佬係唔會反對者也!

「國光計劃」與「巨光計劃」同時推動,一在暗,一在明,米國佬一時間亦搞唔清楚老蔣葫蘆內賣乜嘢藥也!

自一九六二年初起,老蔣反攻大陸軍事準備逐次提高,台灣,澎湖及金門前線刮民黨部隊均處於高度備戰狀態,民間商船亦被軍方征調去進行兩棲登陸作戰演習。

老蔣已經確定反攻大陸日期為是年六月廿九日,佢指示部下一旦發動登陸作戰,要做到「三日佔一個機場、五日佔一個港口」!整個登陸行動預計動用五十個師左右的陸軍兵力,前期直接參與行動的進攻部隊將投入至少二十個師。

特別係呢一年二月間,台北向米國佬提出一項非常關鍵之要求,就係要米國佬向台灣提供四架C-130大力神運輸機,可以一次過投放一千兩百人兵力,米國佬一睇到呢個要求,先至驚覺到老蔣原來係準備要向大陸發動大規模攻擊!

反攻大陸除左需要米國老細支持外,仲有樣嘢係非常緊要,就係銀兩問題,以當時台灣一省收入,根本就冇財力支撐數十萬大軍進攻大陸所用燈火油蠟,為開拓財源,老蔣決定向台灣商家佬埋手。

一九六二年四月底,刮民黨政府宣布開徵「國防臨時特別捐」,預期在十四個月內,徵收到六千萬米元額外稅收,以投入反攻大陸軍事開銷。

米國佬一獲悉刮民黨大搞乜嘢「國防臨時特別捐」,為之極度唔乃奇,要求台北公開「特別捐」經費使用項目細節,否則米方會停止所有經濟援助計劃!

米國佬由一九六二年初起,陸續派出多名官員到台,向老蔣施壓,但係老蔣反攻大陸決心並冇改變。最後米方派出中央情報局副局長克萊恩(RAY S. CLINE)到台,再度向蔣氏父子傳遞甘迺迪總統立場。

點解會搵克萊恩出馬?原來呢個克萊恩五十年代曾係CIA駐台主任,同蔣太子經國friend過打band,兩個人經常一齊飲酒摸杯底,無話不談。

克萊恩話甘迺迪總統希望老蔣將六月底反攻大陸日期推延到十月初,米方會利用呢三個月時間同刮民黨軍方共同討論「國光計劃」,以保證反攻大陸百分之百可以成功!

米國佬見阻攔唔到老蔣反攻大陸,索性提出我米國佬同你玩埋一份,籍此趁機控制成個「國光計劃」,可謂毒辣也矣!而且米方呢種建議係有法律根據,因為按一九五四年台米所簽署所謂協防條約,係規定台灣任何軍事行動均需知會米方也!

與此同時,大陸老八亦加上臨門一腳,使到老蔣反攻大陸美夢最終破碎!

一九六二年六月十九日,米台軍方偵察到大量解放軍部隊進入福建,到六月底,估計共軍有成四十萬地面兵力到達福建前線,同時福建境內集中成百幾艘各類型艦艇及三百多架戰機,老八擺出一副與刮民黨決一死戰姿態。

米台淨係知道共軍大舉進入福建,佢地唔知指揮呢次調動係邊個,根據近年大陸解密資料,原來與軍隊一齊進入福建有總參謀長羅瑞卿!

仲有連成日病假嘅國防部長林彪元帥亦有份進入福建參與指揮,因為林彪日以繼夜咁在福建調動軍隊,頂唔順乃致流鼻血暈低!

米國佬見事態危急,六月廿二日,米國副國務卿哈里曼約見蘇聯駐米大使布里寧,要求佢向赫魯曉夫傳達米國佬無意支持蔣老介反攻大陸,希望老赫向老毛傳遞呢項信息,因為台灣海峽一旦開大片,我地米國同你毛熊都有可能被捲入也!

但係其時中蘇已經鬧翻,赫魯曉夫有冇能力影響老毛,頗成疑問,所以米國佬決定自己親自落場!

第二日,米國駐波蘭大使卡伯特與中共駐波蘭大使王炳南在華沙開左一次緊急會議,卡伯特向王炳南再三保證米國政府絕對唔會支持老蔣反攻大陸,冇我地米國佬提供關鍵性武器裝備,老蔣係冇可能反攻大陸,請八叔放心!

王炳南想左一輪,話如果米國佬真係保證到唔支持老蔣反攻大陸,咁我地調入福建部隊會採取守勢,唔會主動對台灣發動攻擊!

王炳南與周恩來及差利卓別靈在瑞士

華沙談判後,米國佬摸到中共底牌,好似食左個定心丸咁,而且對於阻攔老蔣反攻大陸計劃決心更加堅定。

華沙談判後第二日,米方向台北通報談判內容時,米國佬專登隱瞞米國大使卡伯特曾向王炳南保證唔支持老蔣反攻大陸呢個重要內容,而任由中共在國際上散佈米國呢項保證不加澄清,搞到老蔣唔知華沙談判真實內容為之而忐忑不安。

米國佬背後出賣盟友乃係拿手好戲也!

在米國佬軟硬兼施下,負責「國光計劃」班刮民黨軍柴心灰意冷,一股悲觀情緒蔓延於台北政壇,七月初起,媒體各種反攻大陸言論全部收爹!

米國佬驚老蔣頂唔順會痴左線,於是打左一巴,跟住俾粒糖!米國佬話你老蔣想要C-130大力神運輸機冇可能,但係我地可以提供兩架足以運載兩百名兵力C-123運輸機,咁你老蔣想在大陸進行小規模空投行動,我地米國會樂觀其成也!

米國佬呢個新方案俾老蔣一個下台階,所以老蔣宣布取消原定十月初所發動大規模登陸行動,而改為向大陸派遣小分隊進行突擊任務。

六二年八月底,台灣派出一股武裝人員在澳門大陸邊境登陸之後,進行左爆破,炸瓜邊境居民多人。

九月間,另一股刮民黨特務由香港出發,在廣東海岸進行六次爆破。呢兩鑊嘢引起葡萄牙佬及英國佬極度不滿,兩國通過米國佬向台灣抗議!

米國佬提醒老蔣,唔可以在華南地區進行呢種破壞活動!

到一九六三年初,台灣官方宣布已經在大陸卅五個省區建立左游擊基地,共慘黨快將崩潰咁講,但係冇幾耐,大陸新華社公佈已經全部殲滅刮民黨武裝特務,一個不留!

點解老蔣反攻大陸最初係威係勢,最後會變成虎頭蛇尾呢?

當然米國佬態度係最主要因素,刮民黨在突擊登陸時,登陸小艇如LCVP、LCM及登陸運輸車LVT-4等多數唔能滿足突擊登陸需要,而美國為左阻止蔣介石反攻大陸,刻意唔向台當局提供呢類裝備。

巧婦難為無米之炊,就算老蔣有三頭六臂,缺乏登陸裝備乃係死症冇得醫也!

米國中央情報局副局長克萊恩與小蔣係friend,但係friend還friend,克萊恩在佢俾白宮秘密報告中卻係以嘲諷懷疑口氣來分析蔣光頭反攻大計必然失敗原因。

克萊恩話老蔣最大失算係對大陸情況判斷出錯,原本老蔣向米國佬拍心口,只要台灣幾支突擊隊登上大陸,大陸饑民即刻會起義推翻中共暴政!

但係查實所有登上大陸刮民黨突擊隊都係俾中共民兵或邊境防衛部隊所擊潰,正規軍完全冇出動到,所謂饑民起義,根本就未發生過!

克萊恩話大陸三年困難期並冇對民心士氣造成影響,中共仍然牢牢掌控各級政權,老百姓對共黨並未失去信心,所以冇人會響應刮民黨突擊隊也!

克萊恩又話一九六二年十月,中印邊境發生戰鬥,阿差王牌師毋須兩日就俾共軍打到全軍覆沒,顯示出中共軍隊非凡之組織能力及戰鬥能力,所謂三年困難期會拖垮共軍係完全冇根據者也!

我當時對老蔣反攻大陸必然成功都深信不疑,因為日日睇香港屎報,奸商日報及顛倒日報,全部唱衰老八,再加上我幫老媽子寫包裹寄大陸接濟親友寫到手腫,所以對老八極其不滿,認為老八絕對捱唔過一九六三年也!

事實上,饑荒好快就過去,農民開始有飯食,點會睬你老蔣反攻大陸?

土地係困擾中國幾千年一個大問題,老八幾年時間搞掂,一次過斷絕農民起義呢種因素。

刮民黨在台灣第一項德政就係土地改革,否則刮民黨冇可能在台灣企得咁耐也!

雖然多次突擊大陸失敗,蔣光頭仍然唔死心,一九六三年秋,佢派蔣太子經國親自前往華盛頓拜見甘迺迪總統,再次請求米國支持刮民黨反攻大陸,但係甘迺迪顧左右而言他,對於呢項請求不置可否,小蔣如同一盤冷水兜頭淋也!

甘迺迪當時可能想緊今晚同邊條女開拖多過想點樣支持老蔣同老毛開拖!

點解米國佬死都唔肯支持蔣光頭反攻大陸?原因有好多種,根據克莱恩秘密報告,佢話極度懷疑老蔣明知台灣冇食力反攻大陸而堅持要推行之,乃係老蔣一項隂毛,就係想拉米國佬落水,逼米國佬捲入中國内戰!

老蔣認為刮民黨部隊登陸之後,如果順利固然係大吉大利,但係如果失利,米國冇理由見死不救,實會親自落場出兵大陸參與國共內戰,有米國佬出馬,何愁共匪不滅?呢個就係老蔣如意算盤也!

米國歷任政府雖然視中共為東亞頭號敵人,但係却决心避免與中共正面衝突,因為經過韓戰後,米國佬領教過共軍戰鬥力,見過鬼怕黑,無論如何都視與中共開片為最大戒律也!

一九五八年八月金門炮戰期間,老蔣要求米國第七艦隊護航刮民黨艦艇對金門進行補給,米國佬無法拒絕,但係米國戰艦一航行到大陸領海線即刻停止唔向前,袖手旁觀刮民黨艦艇遭共軍炮火轟擊,呢種“護航”實際上係搵笨實也!

而老毛似乎亦與米國佬有默契,毛指令共軍不得向任何米國戰艦開火,違令者斬!中共同樣係極力避免與米國佬發生正面衝突也!

國共两岸分隔,係最符合米國佬在東亞之最高利益,米國佬唔想打破呢種平衡,中國統一對米國利益損害最大,所以無論係反攻大陸定係解放台灣,米國佬都會盡全力阻碍之!

仲有一個重要因素使到米國佬對幫助刮民黨片低八叔冇性趣,呢個就係發生於五十年代末六十年代初國際共產陣營一件大事:中蘇關係走向破裂!

在整個全球博弈棋盤上,米國真正頭號敵人係毛熊,老八只属二號敵人而已,老八與毛熊鬧翻,敵人之敵人正係潜在盟友也!如果米國佬片低老八,咁豈唔係幫毛熊除去心頭大患?米國佬點肯做咁樣笨實仔?

中共自建國以來就被視為毛熊附庸國,在國際博弈棋盤上并冇獨立人格,但係中共一旦叛出毛熊師門,外交博弈身份即刻由被動變為主動,米國佬會視之為争取對象而非敵對對象,毛魔王决心與毛熊决裂,實際上係扭轉自鴉片戰争以來中國外交上被動之局面,其歷史意義恐怕至今尚甚少人體會之也!

此所以甘廼迪總統上台後就開始考慮如何改善與中共關係,佢白宫辦公檯上,除左本聖經外,就係毛魔王選集,如非佢在一九六三年秋遭到暗殺,則佢極可能會在第二任期内突破中米關係也!

一九六二年十月古巴導弹危機,米蘇面臨核子熱戰,米國軍方向甘廼迪递交對毛熊實施核弹打擊圖,甘廼迪見到中國大陸亦係包括在米國核攻擊範圍内,即刻提出異議,要求除去,從呢點睇,甘廼迪即使不惜與毛熊打全球性核戰,仍然冇考慮將大陸列入核打擊對象。

要知道五十年代米國政府曾多次向中共施展核恐嚇,可見當時米國佬係將大陸列入核打擊對象,但係到六二年古巴導弹危機,甘廼迪親自將大陸除去,毛魔王與毛熊决裂所造成國際博弈棋盤形態之改變是如何之大也!

同樣在古巴導彈危機期間,米國佬要封鎖古巴,表面上要取得拉丁美洲國家決議同意,呢班拉丁美洲國家都係米國佬馬仔,佢地草擬左一份決議書,書內將共產主義集團稱為SINO-SOVIET POWERS,甘迺迪一見到呢個稱呼,即刻要求將SINO除去,可見甘迺迪此時已經冇將中共與毛熊列入同一夥也!

亦可見甘迺迪雖然成日玩女人,但係頭腦仍然非常清醒也!佢可以話係“荒淫”,但係就未算係“無道”也!

傳統歷史學家中意以領導人是否好色來判斷其是否係合格領導人,中國史學家更加係道德行頭!例如明武宗正德帝,被抹黑為一荒淫無道壞皇帝,民間亦多有其風流艷史流傳。

但係近年有史學家為正德帝平反,認為佢係明朝歷任皇帝中比較想有所作為,佢好多貌似荒唐行勁,實際上佢係企圖從文官集團奪回統兵權,並曾多次率軍擊敗敵人,後來係被文官集團勾結太醫,使其失醫而死也!所謂佢係馬上風致死係冇根據者也!

李翰祥所導演黃梅調電影“江山美人”就係講正德帝如何溝民女並食其豬之荒唐史!

在戲中正德不問朝政,淨係識得玩女人!

“江山美人”根據民間“傳說”而來,但係將正德帝去大同改成下江南,坐實正德玩江南美女之罪!

查實正德去山西大同並非玩女人,佢係親臨前線同蒙古佬揮過,但係亦唔排除佢戰餘時間玩大同妹呢個可能性!

點解會玩大同妹?據講大同妹有樣嘢係其他地方女人所無,就係“重門叠户”也!

其實所謂民間“傳說”,都係政敵專登放出抹黑材料也!