日本移民中國東北始末

日本移民中國東北始末

竟日本仔對中國東北起痰係起自何時呢?

整個大和民族對中國東北垂涎由來已久,應該係日本明治維新後,推行大陸政策,日本仔就有向外殖民擴張呢種計劃及願望。

本來在1895年中日馬關條約中,東北遼東半島係割讓俾日本,但係當時俄國、法國及德國出面干預,即所謂三國干涉還遼,日本被迫將已經到嘴呢塊肥肉嘔番出來!

當時沙俄勢力擴張到成個東北,修中東路及霸占旅順大連,在呢種情勢下,日本經過十年準備,在1904年2月10日發動日俄戰爭,以報三國干涉還遼之仇也!

日俄雙方在中國土地上展開激烈較量,而呢片土地主人大清王朝,正係日落西山,處於最後衰亡期,只得宣布中立。眾所周知,戰爭結果係以沙俄戰敗退居北滿而得以終結。

呢場戰爭唔單止係使到日本仔在東北亞取得軍事優勢,更加係取得朝鮮及中國東北駐軍權力,日本佔據遼東半島及南滿鐵路沿線,一時間成為中國東北南部實際統治者。

日本朝野大陸政策奉行者終於等來實現夢想機會,點樣可以長期佔有滿洲,係日本面對一個重大問題。

日本在滿洲建立左一個殖民機構,就係南滿洲鐵道株式會社,呢個相當於日本東印度公司,就開始負責向南滿鐵路附屬地及關東州進行移民工作。

日本朝野之中,最早提出向東北移民係大將兒玉源太郎,佢被譽為明治時期第一智將,佢特別重視軍事力量與經濟力量良性循環,被稱為豐臣秀吉再世!

兒玉源太郎指出,日俄兩國戰爭,未必以滿洲一戰而結束,為左防禦俄國進攻,日本必須居於優勢地位,而呢個地位之確立,移民係至關重要也!

與此同時,時任日本外務省大臣小村壽太郎亦提出:為左保護國防第一線之永久安全,必須盡速安排相當數量大和民族定居滿洲。

日本移民東北最初目的係針對俄國威脅,點樣將滿洲利益消化掉,軍事佔領係一方面,最根本問題係要有人,小村壽太郎認為日本移民如果能夠佔滿洲人口十分之一,咁日本在滿洲就可以進退有據矣!

1910年3月,在日本議會上,外相小村壽太郎提出廿年向滿洲移民大和民族百萬人計劃,將日本向中國東北移民推向政策化及具體化。

日本殖民主義者認為,日本向中國東北移民,就係造成日本在中國東北強大之大和民族實力,形成強大軍事後盾,防禦俄國反擊及列強在中國東北插足,解決日本日漸膨脹人口及糧食危機,轉移國內日益激化矛盾。

日俄戰爭後,日本人口在東北不斷增加,1905年9月,由戰前一千九百人增加到五千兩百人,到1907年,僅僅兩年時間,再次猛增到三萬七千人!

雖然日本移民不斷增加,但係其中大部分仍然係日本在中國東北企業之職員商人,農業移民寥寥無幾。

對此,因受兒玉源太郎舉薦而擔任滿鐵第一任總裁後藤新平,曾再三強調滿韓移民集中論,並為此潛心研究各種對策。

1908年6月,後藤新平拋出佢之傑作《滿洲移民論》,佢對日本向中國東北農業移民之重要性必要性及可能性,進行左充分闡述,佢主張向東北大量移民,佢話要在東北佔得以客為主呢種地位。

後藤新平曾係日本台灣殖民地長官,對管治殖民地頗有心得,在佢就任滿鐵第一任總裁演說中,佢毫不掩飾咁提到,經驗滿蒙之訣竅為:第一,經營鐵路;第二,開發煤礦;第三,移民;第四,發展畜牧業,其中猶以移民為最重要!

由呢個時候開始,日本零散咁向中國東北移民,當時移民數目好有限,因為東北廣大地區乃係中國領土,日本人所佔有只限關東州及滿鐵附屬地,因此呢個階段只係屬於移民嘗試,而且呢類嘗試規模唔大,對中國東北整個格局,冇乜大影響也!

為左在滿鐵附屬地內推行農業移民,後藤新平決定將附屬地4,400公頃適用於農耕之土地,低價出租俾日本個體自由移民,並企圖通過低租金之租佃形式來吸引日本內地人,移入中國東北定居,形成日本人在東北廣大農村發展之基礎力量。

一戶人家就給予一百四十幾畝耕地,日本中下階層貧苦農民,一夜之間來到肥沃黑土地滿洲,成為地主,如此美夢,應該幾有吸引力。

但係,事與願違,好多日本人並非到滿鐵來經營土地,而係趁機將土地低價承攬,繼續轉租俾中國人從中漁利,過過做收租地主癮也!

就咁樣,經過幾年經營,後藤新平發現,呢種自由移民政策極之唔穩定,來去自由,冇長期打算,好難形成日本人在東北之發展,更何況,對於幅員廣闊之東北來講,區區幾萬日本人,遠遠達唔到任何規模也!

如何進一步深入殖民東北,為左咁,後藤新平不得不與佢班同僚另謀他法矣!

1913年,滿鐵開始改變經營方式,決定由滿鐵守衛隊中之退役兵中,選拔出有農業經驗者及熱心於農事之士兵,進行移民試驗。

滿鐵認為退役兵經過幾年軍事訓練,身體健康,組織紀律性強,而且佢地已經適應東北之實際生活、氣候及環境,乃係最佳試驗對象也!

呢種移民,由於當時東北主權屬於中國,另外土地商租問題、移民生活問題,用地問題及住房問題等等,都係一系列障礙,所以到九一八事變前,簡單咁講,在滿鐵附屬地及關東州日本純農業移民並唔多。

滿鐵呢種移民方式先後實施左三次,共只得34戶,儘管滿鐵付出巨大努力,給予好多優惠政策,但係退耕者不斷增加,到九一八事變前,日本移民中34戶中,僅存17戶!

寄望於個體移民,以期達到形成廣闊基礎之計劃,無法成功後,日本朝野中精英分子,就開始思索下一步計劃。其中最為引人關注係福島安正所實現之「愛川村計劃」。

福島安正係日本陸軍大將,有「日本情報戰之父」之稱,佢係一個具有超前眼光之戰略家,早在中日甲午海戰之前,佢就已經提出日本防衛線應該在朝思想嘅軍國主義者。

對於移民計劃,福島安正在任關東都督時,亦用心頗深,1912年春,佢為左在租借地內推行農業移民,親自前往各地視察,尋覓土質優良,適於農耕又交通便利地區。

當福島安正來到大魏家屯附近,佢發現呢處土地肥沃,面積廣闊,係移民最佳地點,於是佢下令禁止在此地自由開荒造田。

佢決定在呢處試辦日本移民規範村計劃,1914年10月,福島安正派遣有關方面人員,回日本進行移民招募工作,到1915年3月,已有19戶農家應募入殖,並分給予房屋及貸付農具,從事農田水利作業。

因為呢批移民多來自山口縣愛宕村及川下村,因此就將移民村命名為「愛川村」,移民之資金輸送方面,皆由官方提供,呢個亦係日本最早有組織有計劃之試點移民。

但係愛川村成立第一年就遭到十年不遇旱蟲災害,顆粒未收,所攜帶資金已經消耗殆盡,移民生活困苦不堪。移民由於生活所迫,對前途失去信心,一部分移民轉做其他行業,大部分回日本。

19戶愛川村移民在幾年後,只剩下3戶!後經退休回鄉之福島安正多方努力,在佢家鄉長野縣募集移民13戶進行補充,但係效果依然不佳。圖為當年日本移民在愛川村所遺留至今房屋。

由於第一次世界大戰對商品對商品經濟之刺激,棄農者繼續出現,殘留者僅存7戶。

日本移民農業經營主要係種植水稻及當地穀物都非常失敗,所以導致後來好多團員逃跑或逃散左,因為經營不善,又有水土不服問題,所以多數溜回日本。呢個階段日本在中國東北農民移民總數唔到一千人。

愛川村移民係早期日本對中國東北進行一次農業移民嘗試,但係由於移民政策失誤及其他諸多原因,日本早期農業試點移民,基本上以失敗告終!

愛川村移民計劃雖然失敗,但係失敗後所得經驗教訓,卻對隨後產生之日本在中國東北進行嘅「武裝移民」及「國策移民」計劃,有左非常重要影響。

關東都督府隨後為之專門制定左《關東州移住規則》及《關東州移住規劃》,開創左日本移民侵略法則之先河。

日本國土狹小,農業人口比較多,可用地少,咁樣養活日本日益增長人口,本土已經唔夠應用,想出之辦法就係去外面搵土地,十九世紀末,日本開始向台灣移民,並向北美洲及南美洲移民。

米國在1924年頒布左個《移民法》,對日本移民進行限制,北美洲移民呢條路行唔通,就轉而將佢地目光盯准左最富饒而距離最近,移殖亦最方便嘅中國東北矣!

九一八事變及滿洲國成立,日本仔睇到時機已經成熟,馬上就提出移民計劃,本係半遮半掩,依家終於可以大張旗鼓進行之,日本移民遂勢不可擋矣!

呢個時候,有兩條冷對日本農業移民中國東北起極大關鍵性作用,一個係加藤完治,日本東京帝國大學農學部畢業高才生,呢條友係個狂熱殖民主義者,亦係數十萬日本農民一生命運聯合締造者之一。

加藤完治名言:我確信,將辛勤日本農民移居到滿蒙天地,俾佢地開墾荒地,將盜賊橫行滿蒙變成世界和平之鄉,呢個係我地大和民族使命!

另一個就係東宮鐵男,係一位狂熱軍國主義者,皇姑屯事件執行者,被稱為「滿洲開拓團之父」。

東宮鐵男名言:日本依家呢個大和民族就好似盆中之竹,係養在花盆內之竹,時間長就會枯萎死去,只有將盆內之竹移到大地上,才能富庶,才能根深葉茂,所以我地向滿洲移民,就等於將盆中之竹移到大地上,咁先至可以保證大和民族之發展!

盆中之竹,不可久活,咁樣比喻輕易使人讀懂日本人心思,以日本島國有限領域,無論資源抑或發展,均遭遇瓶頸。

加藤完治完全係個文人,佢在宣傳上,在輿論工作上,在上竄下跳做各方面工作,有佢獨特之處,佢係一個重農主義者,佢一直過住好似日本浪人咁樣嘅生活,佢認為農業係整個國家發展嘅一個基礎,佢經常一條冷在深山墾田。

九一八事變後,加藤完治起草《滿蒙六千人移民案》,提交拓務省及內閣會議,在日本,有個加藤集團,主張向外進行大量農業移民,佢認為日本要真正強大起來,唯一道路就係移民!

佢遊說於日本外務省及軍部多次,後來軍部基本上就同意佢嘅意見,加藤完治與東宮鐵男會晤後,佢地兩條冷就有左分工,東宮鐵男負責移民地點嘅選擇,移民土地嘅獲得,加藤完治則主要在日本國內活動,到各地去演講。

因為加藤係教書佬出身,所以口才幾好,講話好有煽動性:你地去滿洲喇!果度土地捏出來就係油呀!種乜嘢就長乜嘢㗎!果塊土地將來係屬於我地㗎!

1932年初,加藤集團制定左一份《滿蒙殖民計劃事業書》,對未來移民滿洲做左詳盡嘅規劃,佢嘅主張得到日本關東軍極力讚賞,與加藤「農業移民」思想相對應東宮鐵男嘅「武裝移民」思想。

東宮鐵男在九一八事變後第二日,當時佢尚係岡山步兵第10聯隊大尉,就迫不及待咁起草《在鄉軍人及朝鮮人滿蒙移民方案》提交軍部。

日本陸軍省、拓務省及關東軍決定,加快移民侵略步伐,緊急召開各種移民會議,並提出一列列武裝移民方策,成立各種移民機構,好快就興起第二次向東北移民高潮!

呢次移民係分為三個階段,第一個階段就係1932年到1936年之間,由官方組織有計劃嘅試驗移民,前後共組織左四次共一千八百戶。

由於呢批移民係由在鄉軍人及退役兵組成,而且領導亦係由陸軍省推薦嘅將校組成,移民係攜帶武器,所以就叫做「武裝移民」或「特殊移民」!

軍人東宮鐵男係個中國通,曾經自費到中國學習漢語,佢在九一八事變後在黑龍江三江地區,搞移民試驗,在姚河及撫遠地方建立一個移民村。

關東軍在瀋陽開左次移民政策制定方面嘅會議,在呢次會議上,部分日本學者都主張向東北大量農業移民,呢個時候東宮鐵男亦四圍佢鼓吹,要建立「屯墾軍」,以退伍軍人為主。

1932年8月,日本內閣通過左拓務省嘅移民方案,隨後關東軍又制定《滿洲移民要案》,對日本移民目的、性質作出規定,由以前「普通移民」改為「特別農業移民」。

「特別農業移民」係退役軍人為主體,當時提出招募條件係:一,出身農村,身體健康,有從事農業經驗者;二,在部隊訓練成績良好,未滿卅歲者;三,有獨立生活能力;四,無家庭牽累。

在政府鼓動下,好多在鄉退伍軍人踴躍報名,好快按照上述條件招募左492人,佢地先要在國內進行廿幾日訓練後,於1932年10月3日組成第一批武裝移民團,離開東京前往中國東北。

佢地冇想到就係第一批武裝移民進入佳木斯當日,就遭到抗日義勇軍襲擊,幅員遼闊之東北,貌似已經成為日本囊中之物,卻因其地域寬廣,而使得關東軍無法確保勢力範圍抵達全境。

第一批武裝移民因抗日義軍襲擊,起初無法進入預定之移民點,只能就地編成佳木斯屯墾軍第一大隊,配合日軍擔任佳木斯警戒任務。

呢批移民一直在佳木斯住左將近三個月以上時間,第二年2月,佢地先至遷移到開拓地樺川縣,建立一個叫做彌榮村移民團,佢地全部係按軍隊裝備,佩戴左機槍小炮等。

武装移民由呢一批開始,一直到1934年末,日本向中國東北移入左五批總數三千人左右。呢幾批人的確起左協助關東軍鎮壓東北民眾反抗及維持殖民統治秩序之作用。

為推行移民侵略政策,日本在移民同時,又大肆掠奪東北地區土地,1932年,日本在東北成立「日滿土地開拓公司」,通過驗收、搶奪並銷毀地契等方式,大量掠奪東北農民土地。

滿洲國允許日本人在東北自由購買及租用土地,日本大肆收買土地,無論係荒地熟地,當時市價在十幾元到幾十元,但係日本仔規定一律一元,幾乎等於白搶白佔。

土地來源主要有三種:第一,係利用滿洲國政府所發布法令,叫做土籍整理;第二,移民剛到仲未立穩腳跟,用低價收購老百姓土地;第三,係直接用武裝進行搶奪及佔領。

日本武裝移民入東北後,強佔當地農民土地,並協助關東軍殘酷鎮壓及盤剝民眾,引發民眾強烈不滿,終於爆發左「土龍山農民暴動」。

呢個地區人口六萬人,有一萬條槍,民間都有槍,日本強行要收繳武器,農民冇左地,連槍都要上繳,就導致呢場暴動。

1934年3月8日,土龍山人民在各保保長謝文東、景振清、曹子恒、張魁武、馬海亭、馮秉臣等領導下匯合各路武裝農民2000多人舉行暴動抗日,先後擊斃飯塚大佐、偽警大隊長蓋文義、重創日本廣瀨師團,打響左農民武裝抗日第一槍。

呢場暴動對日本移民帶來極大影響,在日本移民內部流傳一種稱為「屯墾病」現象,患者紛紛要求退團回國,有D患者燃燒自己所住房屋,性情狂躁者甚至自殺,三千人當中,有一千人要求退團。

日本武裝移民到左東北之後,日日擔驚受怕,並冇機會享受如政府宣傳咁樣和平繁榮生活,政府冇辦法,唯有同意俾堅決退團者回日本。

由於中國東北抗日運動高漲,日本武裝移民進行得並唔順利,而且區區幾千人,在遼闊東北大地上,無法形成任何規模。

聞知此事之加藤完治迅速由日本趕到佳木斯,與東宮鐵男一起安慰班躁動不安之移民,遭遇挫折,日本朝野精英人士並未退卻,安撫之餘,佢地反而想出更大計劃。

從七七事變到日本投降,係日本移民中國東北最後一個階段,亦係最猖狂嘅一個階段,即係所謂「國策移民」階段也!

呢個時候已經距離愛川村移民已經過左廿幾年時間,吸收愛川村及武裝移民經驗,呢次日本政府制定左詳細嘅移民計劃,就係《向滿洲移住農業移民百萬戶計劃》也!

1936年8月25日,日本廣田弘毅內閣正式將《廿年移民百萬戶計劃》列為日本政府七大「國策」之一。

而呢次「國策移民」,係要求由1935年開始到1955年,廿年內要向東北移民五百萬!咁樣即係意味日本國內農民四分之一要移往中國東北!

因為日本政府推算到1955年時候,中國東北人口能夠達到五千萬,日本要移來五百萬,咁就可以佔東北人口十分之一矣!咁樣,日本仔在東北就有根基矣!

由1937年起,每五年為一期,移民戶數係逞遞增,第一期係十萬戶,第二期係廿萬戶,第三期係卅萬戶,第四期係四十萬戶,共一百萬戶,即共五百萬人。

日本當局覺得武裝移民已經可以在東北站穩腳跟,應該係時候進行大規模移民,所以到呢個時候,關東軍就開始研究呢個大野心計劃。

百萬戶移民又被分為「甲種移民」及「乙種移民」。

所謂「甲種移民」又稱「集團移民」,指係接受政府優厚補助,並由政府直接受理之移民,被安置在寬裕之移住地,目的係使之成為未來移民村之核心,移民之構成單位至少在200 – 300戶。

「乙種移民」又稱「自由移民」,指政府補助微薄,主要依靠民間實行之移民。

日本本國農民因為土地少,好多下層農民生活亦好困難,農民最依賴就係土地,有土地之地方,當然對佢會有吸引力,加上日本軍國主義之欺騙宣傳,甚至帶有部分強迫性質者,例如話你呢個村要走廿戶,唔走唔得!

但係到1941年,並沒能完成計劃,於是又搞出「分村分鄉」計劃,就係將日本原住民,原來之村、鄉一半,或三分之一,或整個搬遷到東北。

為左實行「國策移民」計劃,日本拓務省採取左「分村分鄉」移民方式,將日本一個村或一個鄉作為「母村」,從中分出部分農戶,組成一個開拓團,移居中國東北,然後建立一個「公村」或「子村」。

呢種將日本農戶男女老幼全家遷出之辦法,既可以減少移民家庭阻力,增加移民數量,又可以使移民在移住地區,保持鄉鄰及家族關係。

所謂「分村」,就係假定在日本呢個村有五百人,就分出兩百五十人到滿洲去,而在滿洲建立呢個村名字同日本原來個村係一樣,向東北移民團提供優良種子,提供部分農具,等呢邊種完地後,打下之糧食,就運回日本「母村」。

日本覺得呢個計劃幾好,可以使到移民團穩定發展,所以由1937年到日本戰敗之前,都大體上係實行呢個「分村分鄉」計劃。

七七事變後中日全面戰爭爆發,由於日本對兵力及勞動力需求劇增,使到日本勞動力供需狀況,發生左巨大變化。

唔少農民被徵兵,而國內軍工業發展,部分農民亦到工廠去當工人,開拓團又走左一部分,農村人口逐漸減少,咁樣要維持原來廿年內要移民一百萬戶計劃,就好難實現矣!

加藤完治就向日本軍部提出,要建立滿蒙青少年開拓義勇隊,佢認為青少年適應環境能力強,又能吃苦,而且「愛國」意識亦更加強烈,應該將青少年作為實施移民計劃重點對象。

加藤在佢自己老家茨城縣內原建立左一個訓練學校,培訓兩到三個月,然後到東北建立青少年義勇隊,劃出大片土地,俾佢地邊耕種,邊學習,邊練習軍事知識。

全東北有呢類訓練所八十九處,全部係進行軍事化訓練,訓練內容係:基本軍事技能、基本農業技能、仲有精神教育,灌輸開拓亦係一種獻身國家方式。

日本有本書叫做《滿蒙開拓青少年義勇軍》封面上就係一個唔夠步槍咁高細路,根本就係個娃娃兵,根據記錄最細得十三歲。

呢班細路組成團之後,由現役軍官率隊,先將佢地集中到一個訓練所,訓練所有部分在東北,有部分在日本,進行半年或三個月訓練,然後派往主要係邊境地區。

青少年義勇軍來到東北後,佢地對當地境況非常唔熟悉,而且由於氣候寒冷,再加上有反滿抗日分子對佢地進行襲擊,所以班細路經常有悲觀情緒。

佢地來時聽到宣傳係開拓及建立一個美好新世界,乜嘢「五族共和」,乜嘢「王道樂土」,但係剛剛過左一年,班細路發現與所宣傳夢想相差甚遠,所以佢地特別想家。

好多在北安青少年義勇隊較腳逃跑,上火車逃來哈爾濱,但係結果都係被拉番去接受嚴厲懲罰。

而部分性情急躁衝動青少年,控制唔到自己情緒,則經常向移民村附近中國農民攻擊或搶掠,製造事端,使到局面更加混亂。

對於加藤完治來講,呢班青少年開拓團係佢移民計劃之重要支柱,必須要處理好,於是日本實施一種叫「寮母」制度,即係為呢班開拓團每三百人配備一個三,四十歲婦女,俾佢地母性之愛,以控制佢地衝動情緒。

咁就由日本徵調左批中年婦女,亦叫做「寮母」,由佢地負責青少年義勇隊日常生活管理,使到青少年義勇隊相對比較安定。

為左穩定青少年義勇隊,日本軍國主義又實行「大陸新娘」政策,募集在日本及滿洲居住之十七歲以上到廿五歲以下日本獨身女仔,進行為期一年「女塾」訓練,內容主要係營農及農家事務實習。

訓練結束後,呢班日本妹就集體與義勇隊成員組成家庭,定居東北,建立所謂「皇國結婚觀」,向班女仔反覆教育佢地「皇道主義精神」,提出口號係「滿洲式新娘樂園」,鼓勵佢地去滿洲建立新家庭。

「大陸新娘」政策之推行,唔單止可以使青少年移民穩定安居,而且可以繁衍生育,補充在戰爭中消耗兵源,就地生產及增加大和民族人口。

青少年義勇軍唔單止有一般移民性質,更重要,佢地係日本軍隊後備力量,根據資料記載,日本在侵略戰爭後期,呢班被遷往東北青少年義勇軍,都被應徵入伍,成為日本侵略戰爭炮灰。

到1945年5月為止,日本共向中國東北輸送農業開拓團881個,其中開拓團民220,359人,義勇隊員101,514人,共計321,873人。

日本對中國東北進行移民。為中國人民帶來無窮無盡災難,大量日本移民以自己係「高等民族」,依仗各種特權,任意欺辱,打罵,搶奪財產,特別係各開拓團團長,佢地都係現役軍人或在鄉軍人,都受過軍事訓練,所以欺壓當地老百姓事件屢出不窮。

「開拓團」強佔或以極低廉價格強迫收購中國人土地,使到500萬中國農民失去土地,四處流離或在日本組建之12000多個「集團部落」中忍饑受寒,其間凍餓而死者無法計數。

日本仔自日俄戰爭後想盡各種辦法要據滿洲為己有,移民係其中一項最大工程,但係中國東北係中國人嘅東北,無論日本仔點想點做,到最後結果就係「夢碎滿洲」矣!

1945年8月,日本仔吞左米國佬奉送兩粒原子彈,毛熊趁機搏懵,百萬紅軍攻入東北,對日本東北移民帶來致命一擊!

太平洋戰爭爆發後,關東軍大批精銳部隊被抽調到南方作戰,東北日本兵力空虛,唯有大量徵集在鄉軍人、開拓團員及義勇隊員,進入關東軍編制調去中蘇邊境,先後有成十萬至十五萬人。

所以當蘇聯紅軍進攻東北時,關東軍全部不堪一擊,呢班開拓民好多連槍都未放過,毫無戰鬥力,所以好快就瓦解。

邊境上大批開拓民撤退,倉惶逃跑,任人宰割班日本開拓民迎來左逃亡之路,當年蠱惑佢地來東北日本軍政府,在呢個最危險時刻將佢地拋棄,日本政府事前都預先通知自己官員及企業人員撤退,但係就冇通知到開拓團,任得佢地自生自滅。

戰爭後期,開拓團內多係老弱病殘,青壯年都被徵調去當兵,逃亡途中,死者都係呢班老弱病殘。

有關東軍混雜在逃亡開拓團隊伍中,因為驚團內班嬰兒啼哭會引來蘇軍,佢地強迫班婦女將自己嬰兒掐死,如果班婦女唔忍心咁做,關東軍索性用刺刀將BB刺死。

1946年5月到11月間,大批被遣返日本人從葫蘆島登船回國。到此時為止,日本向中國東北移民侵略陰謀以徹底失敗而告終。戰爭中,全部33萬移民中有8萬多人死亡。

終於copy and paste完畢日本移民中國東北故事,此為我中華民族慘痛之經歷也!望諸君萬勿忘卻之!