米國佬又搵台灣一次笨實!

米國佬又搵台灣一次笨實!

米國佬將軍火當古董咁賣俾台灣,越年代久遠,售價越高!

呢次米國佬賣俾台灣兩艘派里艦,係1984年造之泰勒號及蓋瑞號,原本造價係在4500萬美元以內,但係用左31年後居然以1.9億美元天價賣俾台灣!

米國佬仲黑心過摩籮街班古董商!查實呢種戰艦米國佬曾以免費形式移交俾巴基斯坦,波蘭及土耳其!

另外,米國佬呢次賣俾台灣254枚刺針導彈,包含售後服務、人員訓練及訓練靶機等配套措施,每枚導彈售價高達約85萬米元;以往米國佬向其他國家出售刺針導彈,每枚售價僅約在12.6萬至20萬米元之間!

呢種搵笨式軍售,係得中華民國要對米國佬感激流涕!

依家大陸戰艦基本上都係近十幾年新建造,台灣買卅年舊軍艦,點夠大陸揮吖?

米國佬對台灣呢六十幾年軍事援助,似乎有道公式,就係大陸軍備越落後,米國佬俾台灣軍火越先進,而且仲係免費添!

例如,五十年代大陸軍備落後到阿媽唔認得,搞到毛賊東登基咁耐從冇乘坐軍艦出海,最多係在長江內河游下船河而已!

當時米國佬免費送俾台灣軍火都係比較先進,為亞洲各國所無!

但係當大陸軍備水準追到上來,米國佬反為將舊貨存貨高價賣俾台灣,亦屬怪事也!

其實早在列根時代,中米就簽署左八一七公報,其中講明米國佬必須續年減少對台灣軍售到最後停止,但係蘇東波之後,米國佬反口,老布殊開始繼續軍售台灣,但為免過度刺激阿爺,就盡量賣倉底貨俾台灣,仲要係高價添!

目前米國佬軍售台灣在軍事上可以話係毫無意義,但係米國佬卻樂此不疲,其原因除左搵銀之外,仲係向全世界強調台灣乃係我米國佬條菜!

而台灣對於每次米國佬軍售都係感恩流涕,其實台灣焉唔知俾米國佬搵笨實?但係台灣當政者無論係刮民黨定係綠黨,都可以借米國佬軍售來瞞騙島內班愚民,使佢地誤以為米國佬會保護台灣也!

對台灣軍售係中米關係一道死結,自一九七九年中米建交至今卅幾年,一直係纏擾住中米兩國,相信要到台灣問題徹底解決之後始能消失!

過去阿爺對於米國佬軍售台灣除左抗議一番之外,似乎亦冇乜其他辦法,但係呢次就宣稱將會制裁有關米國軍火製造商。

目前正在米國珍珠港訪問之老八導彈驅逐艦濟南號,艦上係用垂直方式發射導彈,先進過台灣高價所買入派里艦好多!

濟南號新新淨淨,艦上系統全部係屬於廿一世紀水平,派里艦則係屬於上個世紀八十年代水平,點揮?

米國佬曾經鑿沉左多艘派里級艦艇作為人工魚礁,依家轉手egg egg聲賣俾台灣佬,呢盤生意真係做得過也!

呢單交易其中回扣落左邊條契弟個袋?值得研究也!

軍火回扣從來係最勁揪,做一單,分分鐘有成egg落袋!

清末以來,唔少官員靠買洋軍火攞回扣,發到阿媽唔認得,佢地落台之後,帶住回扣所得錢財走去租界嘆世界,幾世都用唔完也!

米國佬雖然自己將舊軍火高價賣俾人地,但係卻又唔俾烏克蘭將圖160戰略轟炸機賣俾老八,強迫烏克蘭將成批每架值幾egg米金轟炸機全部當廢物處理!

老八買唔到圖160戰略轟炸機,唯有自己搞個轟6加強版,稱之為轟6K,但係同圖160仍然有極大差距!

米國佬馬仔有兩種,一種係烏克蘭,自己明明有非常值錢戰略轟炸機,偏偏被米國佬強迫唔可以售賣幫補下,一種係中華民國,要從米國佬高價買入批廢鐵!