米國佬在中東仍然使用六十幾年前製造之U2高空偵察機!

米國佬在中東仍然使用六十幾年前製造之U2高空偵察機!

唔好以為佢係米國太空人,佢乃係U2機駕駛員也!

因為U2機最高可以飛到七萬英尺,已經係太空邊緣,所以駕駛員必須著上太空衣也!

米國佬雖然派出唔少無人偵察機在中東進行偵察,但係覺得偵察精確度仍然及唔上U2機也!所以仍然要靠U2機對IS進行更加精確之偵察也!

對於中國人來講,米國佬U2機乃係我地老朋友,五十幾年前,米國佬派刮民黨飛行員駕駛U2機進入大陸進行軍事偵察,最遠飛到陝西甘肅新疆等地,認真勁揪也!

但係遇到共慘黨奸到出汁,居然先後擊落多架U2機,其記錄至今冇人能破也!

共慘黨擊落米國佬U2機,當然係大件事,大陸報紙頭版報導大吹特吹也!

目前北京軍事博物館存放被擊落U2機四架殘骸,一字排開,認真震撼也!

北京軍事博物館除左有被擊落米國佬U2機殘骸外,仲有架珍寶島戰役被中共奪得之毛熊T62型坦克。

當年中共在珍寶島奪得毛熊最先進T62,成班共慘黨坐在坦克上得意洋洋!

呢架坦克被阿爺修復後擺在北京軍事博物館供人參觀。

當年老八點樣擊落U2機完全秘而不宣,呢幅圖畫顯示班大陸民兵揸住舊式步槍圍住被擊落U2機歡呼,似乎暗示係用步槍擊落,當然唔係事實啦!

呢幅圖前面有個共軍跪低仔細觀察U2機頭,因為呢處有機上各種精密電子偵察器也!

其實當年中共係用俄國佬所製造地對空導彈擊落,但係中共第一支導彈部隊係屬高度機密,冇對外透露細節,呢支導彈營營長岳振華因多次指揮擊落U2機而獲得毛大帝親自接見。

老毛並接見導彈營全體官兵,係建國後,毛首次接見整支部隊也!

因為其時中共與俄國佬已經鬧翻,進口導彈全國來來去去得五十零枚,所以要唔敢亂用,要十拿九穩先至敢發射也!

八當年傳媒淨係宣布擊落U2機,對駕駛員命運如何卻隻字唔提,台灣刮民黨認為已經陣亡,但係實際上有兩條友跳傘逃生俾八叔俘虜左!

其中一名葉常棣係在江西鷹潭上空被擊落,佢跳傘降落地面時,見到漫山遍野民兵圍埋來,班民兵衣衫襤褸,手持一次大戰時期破槍,同佢葉常棣身上當代最先進太空服,成強烈對比,佢覺得好似演一場荒謬劇咁!

米國佬六十年代初派刮民黨駕駛U2機入大陸最大目的係要偵察中共核子武器發展狀况,所以大陸西北甘肅新疆及內蒙係偵察重要對象,每次偵察完就多數飛經江西返回台灣,中共導彈部隊就選擇江西爲埋伏點,果然一擊即中!

由於中共擊落多架米國佬最先進U2偵察機,機上多種精密電子設備俾中共科技人員攞去研究,中共軍事電子技術借此提升唔少也!

六十年代中期,中共終於自己研製成功紅旗地對空導彈,毋須依靠手中越來越少俄製導彈,要幾多有幾多,可以在全國各地布署導彈,1967年國產紅旗導彈首戰告捷,在浙江上空擊落U2機!

之後,米國佬唔敢再派U2機飛入大陸,只限沿大陸海岸線外進行偵察。

阿爺當年唔公布已經先後俘虜左葉常棣及另一名U2飛行員張立義,刮民黨認爲佢地已經瓜左,所以就在台北圓山忠烈祠中供奉两人神主牌,真係大吉利是也!

廿年後阿爺突然將葉張两人放來香港,嚇全世界一跳,佢地向台灣要求歸隊,刮民黨認爲呢两條友俾共惨黨洗左廿年頭,非常之唔可靠,拒絕接收佢地,搞到葉張两人在香港進退两難,非常難堪也!

最後好彩米國CIA出來認頭,因爲當年刮民黨空軍所有U2機飛入大陸任務係由CIA設計及命令執行,偵察完畢所有資料亦全部俾米國佬攞走,而且U2機飛行員接受米國佬一份糧,事實上佢地係CIA雇員也,所以結果由米國接佢地去米國歎世界矣!

呢個故事教訓我地做走狗要做米國佬走狗,千祈唔好做刮民黨走狗!

中共以有限及落後軍備同米國佬鬥法周旋,唔理米國佬再三警告,繼續發展兩彈一星,最後終於成為現代化軍事強國!

老夫每次睇到葉常棣回憶見到裝備落後得可怕班大陸民兵,都有好大感慨,中國人民有志氣,即使落後都唔肯妥協白白挨打!

落後唔係罪過,對敵妥協投降先至係罪過!

你話呢個毫不低頭妥協之中華民族,點可能會亡國滅族?

米國佬唔能夠再用U2機來蝦中國佬,依家用來蝦中東佬!