米國佬舊艦翻新天價賣台灣,路透社舊聞翻新欺騙讀者!

米國佬舊艦翻新天價賣台灣,路透社舊聞翻新欺騙讀者!

日前路透社突然獨家發表一段新聞,話米國國務院决定對台灣軍售两艘佩里級戰艦,價值一點九egg米龍!

消息傳出,台灣岸鳩部即刻表示歡迎,民進黨人士亦深表興奮!

但係心水清者明明記得米國佬早在舊年已經宣布左賣呢两艘八十年代建造舊艦俾台灣,咁路透社呢段新聞究竟係乜嘢一回事?係米國佬再賣多两艘舊艦俾台灣乎?定係路透社舊聞翻新?

阿爺岸鳩部當然非常重視呢段新聞,即時向米國佬提出交涉,要求澄清,米國國務院回答話米國政府暫無軍售台灣新計劃!

對米國佬來講,呢種戰艦係廢物,但係對台灣來講,却係至寶也!

两艘廢艦賣俾台灣,台灣佬如同食左至寶三鞭丸,叔羊變成壯羊矣!

呢两艘舊艦當年造價四千萬米龍,三十二年後以接近两egg米龍賣俾台灣,個個話搵笨柒,獨係台灣感恩流涕,對米國大老細再三叩頭感謝也!

路透社見到阿爺認真double check呢段新聞,唔到廿四小時亦急急致歉,承認舊聞翻炒也!

懂軍事者當然知道台灣買入呢两艘舊艦根本就冇乜用途,因為目前大陸戰艦全部都係近呢十幾年來新建造者,台灣用卅幾年前廢艦點够揮?

透社新聞可信程度仲低過路邊社新聞也!

米國佬軍售台灣係中米關係一項奇難雜症,中米建交後近四十年來,耐不耐就會出來困擾一番,何以會咁?

一九七二年尼克遜首次訪問北京,但係冇達成兩國建立正式外交關係,原因係中方要求米方必須做到與台灣斷交,廢約及撤軍三個條件,做唔到,就冇得建交,老尼答應佢在一九七三年第二任期內會滿足中方呢三個要求。

但係人算不如天算,尼克遜雖然如願連任總統,點知佢上任後就俾水門事件纏繞,最後於一九七四年黯然落台,所謂人亡政息,中米建交工程暫時停擺!

到一九七七年卡特就任總統後,因為要面對毛熊日益擴張,米國佬極之需要拉埋中共加入國際反蘇聯盟,於是就啟動中米建交工程,一九七八年五月廿日,卡特國家安全助理布熱津斯基到北京,向矮佬鄧表達米方願意滿足中方建交三條件,中米商討建交細節就此登場。

雖然米國佬已經答應左做足三項條件,但係米國佬卻聲明與台灣斷交後仍然維持向台灣售武,中共當然唔肯制,由米國駐華聯絡處主任伍德科克與中共外交部長黃華之間進行之建交談判陷入僵局。

拖到當年十二月中,就由矮佬鄧親自出馬同伍德科克傾,仍然係為售武問題而爭拗,矮佬鄧最後話你地美國政府在一九七九年一月一日通知台灣唔再續約,要同時通知埋唔再售賣武器俾台灣。

當時伍德科克冇細心聽鄧小平呢一句說話,加上英文翻譯唔係咁準確,伍德科克對鄧小平呢句說話理解為米國在一九七九年呢一年內停止售賣武器俾台灣,意思就係一年後米國可以繼續賣武器,伍德科克就話我地雙方歧見已經全部解決,依家就等白宮最後拍板決定建交!

當伍德科克同鄧小平談判記錄傳到白宮,布熱津斯基詳細反覆加以閱讀,猶太佬比較細心,布熱津斯基覺得記錄中有關鄧小平對美國售賣武器俾台灣嘅表述唔係好清晰。

布熱津斯基知道呢幾個月來中米談判中,中方係一直堅持米國唔可以賣武器俾台灣,點解鄧小平會來個大轉變,要米國淨係停止售賣武器一年,以後又可以賣呢?布熱津斯基覺得呢單嘢好有疑問。

佢就緊急約見中國駐米國聯絡處主任柴澤民,向佢出示談判記錄英文版本,問柴澤民鄧小平原意係乜嘢?一年唔賣武器定係永遠唔賣武器?

柴澤民話佢帶來北京傳俾佢份談判記錄中文版本,當然以中文版本為標準,鄧小平響呢處係講要米國通知台灣由一九七九年一月一日起唔再賣任何武器俾台灣,意思係話米國永遠唔再賣武器俾台灣!

布熱津斯基聽到柴澤民咁講,深知不妙,佢即刻聯繫在北京嘅伍德科克,要佢立刻搵鄧小平,要求佢澄清究竟係一年唔賣武器定係永遠唔賣武器。布熱津斯基話米國政府最後底線係可以在一九七九年呢一年唔賣武器俾台灣,但係一年後,米國係保留向台灣售賣武器權利,如果中方仍然持反對意見,咁樣建交就會取消。

伍德科克聽到布熱津斯基咁講,當堂嚇到腳軟,佢就緊急約見鄧小平,呢個時候離開中米要公開宣布建交仲有十零個鐘頭!

鄧小平在十二月十五日晚在人民大會堂再次接見伍德科克,伍德科克就對鄧小平講佢剛剛接到白宮訓令,請求鄧小平就售賣武器表述作出澄清,究竟係一年唔賣武器定係永遠唔賣武器?

鄧小平話我地當然係要求美國永遠唔賣武器俾台灣喇!伍德科克聽左,就話米國政府最後底線係可以在一九七九年呢一年唔賣武器俾台灣,但係一年後,米國係保留向台灣售賣武器權利。

 鄧小平一聽,用手大力拍左沙發椅扶手一下,提高聲調咁講:米國係唔可以向台灣售賣任何武器,我地中國政府會反對到底!

伍德科克聽完,為之面青,佢話白宮訓令係如果中方仲係反對米國政府最後底線,咁呢幾個月來為建交所進行努力全部會化為烏有!

鄧小平聽完之後,想左一陣間,跟住佢就咁講:建交方面唔好俾佢停落來,繼續按既定程序進行,至於有關售賣武器爭議,依家既然米國可以在一九七九年一年之內停止向台灣售賣武器,一年後係唔係再賣,到時中米雙方再通過外交渠道商討,我地將售賣武器問題暫時掛起上來,唔好影響建交!

伍德科克聽到鄧小平咁講,成個人鬆左一口氣,佢話:感謝上帝!感謝鄧副總理用靈活態度處理呢個大難題,依家中美建交可以正式去馬!

直到今日,有人覺得鄧小平在中米建交談判最後關頭,似乎犯左個錯誤,就係留低一督蘇州屎,呢督蘇州屎就係米國向台灣售賣武器問題,呢卅幾年來,中米為左呢個問題唔停咁爭拗,成為中米關係一個死結。

係我地又要反問一個問題,就係點解鄧小平咁著急響呢個時候要同米國建交呢?一個係時機問題,十二月中正係米國國會休會期間,國會班大帝多數唔響華盛頓,中米在呢個時候宣布建交,會將班議員殺個措手不及,反對派想結集力量亦來唔切。

如果一九七八年底中米唔能夠達成建交,咁就勢必要拖延到一九七九年,但係一九七九年上半年,米蘇會開始第二輪裁減核彈頭談判,米國政府將會全副精神去應付俄國佬,唔會有時間及精力搞中米建交。

中米建交談判就會推遲到一九七九年下半年,亦極可能要到年尾先至會達成建交,但係呢一年時間變數會好大,分分鐘發生乜嘢意外就會使到中米建交永遠唔會實現。

另一個更重要原因係,當鄧小平在人民大會堂連續接見伍德科克嘅時候,在人民大會堂另一邊大會議廳,中共正在舉行緊秘密會議,呢個秘密會議叫做中央工作會議,已經進行左好多日,咁呢個中央工作會議究竟係搞邊科呢?呢個中央工作會議就係為即將舉行嘅中共第十一屆三中全會做準備,十一屆三中全會,大家應該熟悉,呢個三中全會將會宣布中共放棄階級鬥爭路線,全面搞經濟建設,即係搞改革開放。

中國大陸要搞改革開放,就需要大批外國資金及技術,而呢D外國資金及技術,好多會係來自米國,只有中米建交,米國資金及技術先至可能順利進入中國,咁改革開放事業成功率就會增加,呢個係鄧小平不惜留低售賣武器呢督蘇州屎,都要爭取在呢個時候同米國建交也!

米國佬死都要堅持售賣武器俾台灣,主要原因當然係牽涉到米國軍火商利益也!台灣係大客,點可以放棄呢?身為米國總統冇軍火商銀兩支持,半日總統都冇得做,所以首要條件係必須滿足軍火商利益。

一九七九年一月中米正式建交,米國國會復會,在China Lobby主導下,米國國會大比數通過所謂“台灣關係法”,該法係米國國內法,卻係決定中國領土內台灣省命運,此法講明米國佬必須繼續向台灣提供武器,並且話米國佬對台灣安危非常關切咁講!

米國佬一於打死狗講價,由國會炮製呢個“台灣關係法”,保障左軍火商利益,因為米國表面上係三權分立,中共對米國國會搞呢手把戲,亦無可奈何也!

根據李敖睇法,佢話“台灣關係法”中係講向台灣provide武器,provide意思明顯係白送,所以米國佬應該送俾台灣武器而唔係賣俾台灣武器!

米國佬自說自話之所謂“台灣關係法”雖然對台灣安危表示關切,但係卻冇清楚講明如果中共攻台,米國佬會唔會出兵?如果米國佬唔出兵,咁台灣即使買多多武器都守唔住也!

我一直懷疑阿爺與米國佬之間在扯貓尾,阿爺岸鳩部抗議米國佬對台售武聲音越大,米國佬賣俾台灣武器價格就更高,唔通阿爺有份收回扣?

米國佬唔賣太過先進武器俾台灣,除左唔想俾阿爺煩住佢之外,仲有就係台灣一旦俾阿爺攻陷,米國佬先進武器白白會落在阿爺手中也!

如果解放台灣後,阿爺在天安門閱兵,將在台灣繳獲之米國佬先進武器擺晒出來,米國佬將情何以堪!

呢兩艘廢艦拖去釣魚台填海的確值得考慮!