蔣介石死亡之謎

蔣介石死亡之謎

話說一九六九年九月十六日傍晚,台北榮民總醫院門口突然有幾輛大型房車呼嘯而至,車上走落多名黃衣大漢,佢地抬出兩名傷者急速送入醫院,大家一見到呢班黃衣大漢,就知道佢地乃係總統府侍衛,咁傷者肯定係非等閒之輩。

所以在場醫生護士非常緊張,果然,佢地睇真下第一個傷者,原來佢係中華民國當今大總統蔣介石,但見佢滿口鮮血,第二名傷者就係總統夫人宋美齡女士,但見佢高聲叫痛。

醫生護士急忙問班總統侍衛究竟發生乜嘢事,佢地話剛剛總統同夫人係響陽明山遇到車禍,所以受傷。班醫生護士覺得雖然台北日日有車禍,但係身為總統同夫人,似乎好難會同車禍有關,真係好奇怪。

經過醫生詳細檢查之後,發現蔣介石主要係嘴唇有小範圍嘅撕裂傷,所以流血,下體春袋瘀青浮腫,胸口曾遭到碰撞而有些少痛,但係好快就冇再痛,咁樣睇嚟,好似傷勢唔係太重。

至於宋美齡雖然唔停咁瓜瓜叫話:痛死我喇!但係檢查之後,發現佢淨係撞傷條頸同埋膝頭哥,就冇乜其他地方受傷。

但係畢竟老蔣當時已經係八十三歲嘅老人,宋美齡亦有七十一歲,按照醫生囑咐,老蔣兩夫婦要響醫院留醫觀察多兩三個禮拜。

大家可能同班醫生護士會有呢個疑問,就係台北雖然車禍多,但係應該同蔣介石冇乜關係,佢居然會遇上車禍,真係不可思議,但係世事就係咁奇怪,唔應該發生響蔣介石身上嘅事情居然就發生左。

依家我有必要詳細講述呢場車禍經過。

台北係個四面環山嘅盤地,夏天非常之悶熱,蔣介石夫婦住響台北士林官邸頂唔順,所以每年六月間,如果冇乜其他要事,蔣介石夫婦通常會由士林官邸搬去陽明山官邸避暑,因為陽明山比台北市區溫度低好多度,非常之清涼,直到十月初佢地先至會返回台北士林官邸。

一九六九年九月十六日呢一日,蔣介石有一項活動,就係參加響陽明山舉行嘅軍事會議,呢日上午,蔣介石精神奕奕咁主持呢次軍事會議,並且講左一輪話。

按照議程,下午會舉行分組討論,老蔣通常就唔會參加呢種分組討論,佢於是響中午十二點左右離開左會場,返回陽明山官邸食午飯,食完午飯,老蔣會照例瞓下晏教。

起身之後,佢會處理一D公務,食過D點心,到四點幾鐘,佢就會搵宋美齡,然後問佢:達令!去唔去車車呀?呢個去唔去車車,意思係去唔去遊車河,即係兜風。通常天氣正常,蔣介石夫婦每日都會在呢個鐘數坐車出外兜風。

總統遊車河當然同老百姓遊車河係完全唔同,係非常大陣象,老蔣一出外,就會係一隊車隊,最前面係先導車,跟住係老蔣座駕車,後面再跟住兩部後衛車,坐滿左侍衛。

呢隊車隊就浩浩蕩蕩落左陽明山,到台北市郊兜左一輪,五點左右,蔣氏夫婦兜完風,車隊於是上番陽明山,要上陽明山,就一定要行一條公路,叫做仰德大道,雖然叫做大道,實際係條雙線行車嘅公路,因為老蔣經常要用呢條路,所以呢條路在台北算係最好一條公路。

陽明山仰德大道

但係仰德大道畢竟係條山路,轉彎抹角地方非常多,車隊嚟到仰德大道永福附近,剛好另一條行車線有一輛落山開往市區嘅公路局客運班車,正在停響一處車站,等候乘客上車。

當蔣介石車隊先導車,駛過一個大彎,距離果輛停靠路邊公路局客運班車車頭有兩三百米嘅時候,突然有一部軍用吉普車高速由客運班車左後方超車衝左出嚟,迎面朝住先導車急駛過來,先導車司機即刻踩剎車制,果部軍用吉普車擦身而過,去到無影無踪。

緊跟住先導車後面嘅蔣介石座駕車司機可能一時分神,又可能一時緊張過度,本來應該踩剎車制,結果反為踩左油門,於是座駕車好似一支箭就咁撞埋先導車後車廂,撞出個大窿。

當時老蔣坐響右後座位,正靠住拐杖閉目養神,坐響左後座嘅宋美齡正翹起二郎腿,欣賞緊車外景物。

車禍發生得太突然,六十年代,台灣仲未有綁安全帶呢樣規定,蔣介石身體猛烈向前衝,直接撞到駕駛座後面隔板上,手中所持拐杖當堂折斷,蔣介石假牙響撞擊瞬間,飛左出去,嘴唇被撞到出血,胸口一陣劇痛。

宋美齡頸部同膝頭哥亦撞到前方玻璃隔板上,痛到佢大聲慘叫,高呼救命。

本來呢輛座駕車係有三排座位,為左要有更大空間,使到蔣介石坐得更舒服,所以就拆去中間座位,於是前後座椅之間距離要比普通房車大得多,咁使到撞擊力度相對加大。

後衛車見到總統座駕車出事,班黃衣大漢侍衛急急落車,打開座駕車門,睇到蔣氏夫婦受傷,佢地嚇個半死,當然急送佢兩人去榮民總醫院。

侍衛長孔令晟送蔣介石夫婦到醫院後,即刻通知正在行政院開緊會嘅蔣經國,小蔣聽到佢老竇受傷,急忙趕嚟醫院探視,發現好彩老蔣傷勢似乎唔係太重。

侍衛長孔令晟晚年

孔令晟將車禍經過一五一十向蔣經國報告,當蔣經國知道有部軍用吉普車引起呢次車禍,佢大為緊張,雖然經過廿年白色恐怖統治,反蔣人士已經全部被清洗,但係難保有漏網之魚,唔通係軍方有人蓄意謀殺老蔣?

呢廿年,台灣軍隊曾經有過兩次政變陰謀,一九五五年,孫立人部下企圖趁蔣介石到南部檢閱嘅時候做低佢。一九六四年,駐守桃園裝甲兵第一師,響裝甲兵副司令趙志華鼓動下,要進攻台北。

 呢兩次兵變,都係因為蔣經國響軍隊中佈置左政工幹部,而最後都係失敗收場。

因為陽明山車禍事出突然,冇人記得起部吉普車車牌號碼,蔣經國下令全台北市憲兵同警察出動盤查軍用吉普車,結果好似大海撈針咁,一直搵唔到呢部吉普車。

後來經過蔣經國左右提點,佢地話凡係軍用車輛出入都會登記,呢部吉普車係由陽明山衝落嚟,查下山上軍事單位出車記錄就得喇!

果然即刻查到呢部吉普車係屬於一個陸軍師長所有,佢係參加完陽明山軍事會議,因為要趕番屋企食飯,就叫司機盡量開快D,點知會闖下呢場大禍。

呢個師長當然被逮捕,並且由蔣經國親自審訊,經過一輪盤問之後,發現呢個師長並冇任何政治背景同動機,呢場車禍純屬意外,並非政治暗殺陰謀。呢個師長後來被革職查辦,司機亦被拉去坐籃。

陽明山車禍照計應該就咁告一段落,但係冇幾耐,車禍後遺症終於顯現出嚟。

幾個星期後,響榮民總醫院一次檢查中,醫生發現老蔣心臟大動脈部位,傳來一陣陣雜音,再經更詳細檢查,知道蔣介石心臟主動脈瓣膜曾經受到重創,呢個係陽明山車禍撞擊後嘅結果。

心臟主動脈瓣膜受損害,等於抽水機個活塞壞左一樣,血打上去又會倒流番轉頭,呢個亦係導致日後蔣介石心臟衰竭主要原因之一。

在陽明山車禍之前,蔣介石身體一直非常好,佢雖然已經八十三歲,但係老人病例如高血壓糖尿病,佢都冇份。佢大部分器官都係健康,心肺都冇問題。

蔣介石老當益壯

呢個同佢長期生活有規律有關,佢每日朝早五點鐘起床,先飲一杯溫度約六十度溫開水,跟住做晨操,廿分鐘後,寫寫日記,睇睇報紙,食完早餐,九點鐘左右,換好衫就去番工,日日如是。

老蔣日日精神奕奕,健步如飛,班侍衛跟佢跟到氣都咳。

蔣介石日常粗茶淡飯,煙酒咖啡從來唔掂,車禍前,蔣介石一年難得會有小感冒一兩次,但係車禍之後,蔣介石身體每況愈下,時不時就會發高燒,有時行路會感到無力,試過會突然跌低,有時會無緣唔故就瞓著左。

後來,老蔣對副總統嚴家淦講:永福車禍,減我陽壽廿年!如果冇呢場車禍,照計老蔣肯定會活超過一百歲。

發生響蔣介石身上呢場車禍,以及佢後來心臟發生問題,都係屬於台灣官方高度機密,傳媒從來冇作任何報導,外面老百姓完全唔知道有呢回事。

一九六九年九月一場車禍,使到蔣介石健康響起警號,屋漏偏兼連夜雨,中華民國外交形勢亦出現左警號。

喺陽明山車禍發生前九個月,即係一九六九年一月廿日,尼克遜就任米國總統,佢一上任,就同佢國家安全助理基辛格準備來一次戰後米國外交大轉移,就係要同中國大陸進行和解,決定要以華制俄。

尼克遜基辛格對大陸外交係用秘密方式進行,蔣介石所知甚少。但係蛛絲馬跡,佢發覺尼克遜有轉軚跡象,因為尼克遜宣布停止派米國第七艦隊進入台灣海峽巡邏。

米國第七艦隊唔再巡邏台灣海峽,係唔係表示米國佬唔會再保衛台灣呢?老蔣非常擔心,冇左米國佬,台灣將如何能夠抵擋中共進犯呢?呢種擔憂,自然對蔣介石健康有極壞影響。

一九七一年五月廿二日,蔣介石再次做例行檢查,醫生發現佢情況進一步惡化,蔣介石心臟有明顯擴大跡象,嚴重嘅時候,連呼吸都有困難,車禍後遺症一日比一日突顯。

兩個月後,一場外交上大打擊終於出現,一九七一年七月,基辛格秘密訪問北京與周恩來握手言歡,事後對外宣布尼克遜將會在第二年,即係一九七二年二月訪問大陸,消息傳來,蔣介石激到生蝦咁跳,米國佬呢個盟友真係準備拋棄中華民國!

基辛格與周恩來

跟住響十月份,更大一場打擊又來臨。響美國紐約時間十月廿五日夜晚,聯合國以大比數通過恢復中華人民共和國席位,中華民國被逐出。

中華民國被逐出聯合國

呢個係台北時間十月廿六日上午,蔣介石正在士林官邸花園散步,副官急忙走嚟對老蔣講:報告總統,我地退出左聯合國!老蔣當時戴住頂帽,聽到呢個消息,佢攞起頭上頂帽大力向地下一掉,表示極度憤怒,個副官跟住見到蔣介石兩眼流出眼淚,八十五歲老人受到刺激而流馬尿,對健康當然非常不利。

七十年代初,因為,米國佬開始轉軚,其他國家冇理由執輸,呢段時間,前後有四十幾個國家同中華民國斷交,然後同大陸建交,中華民國外交部就變成斷交部。

 到一九七二年,有幾單事件對蔣介石連續衝擊,終於使到呢個強人從此再唔能夠企番起身,我依家就講述呢幾單大事。

一九七二年最大鑊當然係二月廿一日米國總統到達北京,尼克遜同毛澤東周恩來會談,佢地私底下究竟點樣商量出賣中華民國,蔣介石係一無所知,難免日夜驚惶不已。

尼克遜與毛澤東

響一九七二年,台灣內部亦面臨一單大鑊嘢,就係中華民國第五任總統要進行選舉。大家可能會有疑問,就係中華民國成立於一九一二年,到一九七二年已經成六十年,點可能得五任總統?

呢個第五任總統係由一九四八年起計算,民國初年總統孫中山,袁世凱,徐世昌等等係冇計算在內。因為一九四八年國民政府宣布實行中華民國憲法,根據憲法規定要選出第一任總統,但係唔係一人一票普選,係由國民代表大會代表選出。

憲法規定總統任期六年,只可以連任一次,一九四八年第一任總統自然係由蔣介石當選,冇人會同佢爭。

六年後,即係一九五四年,要輪到第二任總統選舉,呢個時候國民黨已經冇左成個大陸,敗退到台灣,咁響台灣選唔選到總統呢?國民代表大會代表得兩千幾人,絕大部分都跟左國民黨嚟台灣,所以冇問題就選出第二任總統蔣介石。

到一九六零年第三任總統選舉,問題就嚟嘞,因為憲法規定總統只能連任一次,依家老蔣已經連任左一次,照理係唔可以再選做總統,但冇蔣介石做總統又係唔可能,因為蔣總統年年都拍心口話要帶我地番大陸,依家仲未番到大陸,如果蔣介石唔做總統,咁我地搵邊個帶我地番大陸?

所以在台灣軍民呼籲之下,又為左唔違反憲法,結果係諗出一條橋,就係制定一項名為動員戡亂時期臨時條款,呢個臨時條款係咁講:目前國家處於非常時期,大陸尚未光復,憲法中有關總統只可連任一次規定暫時停止執行,等待大陸光復後再恢復執行。

雖然當時雷震所主持嘅《自由中國》雜誌代表台灣自由主義者睇法,認為蔣介石唔應該搞個咁樣臨時條款來做總統,但係雷震後來俾老蔣搵個藉口拉左去坐足十年監。

就咁樣,老蔣又響一九六零年當選為第三任總統,一九六六年照辦煮碗,繼續由老蔣當選為第四任總統。

依家一九七二年三月又要再選舉第五任總統,照計老蔣身體一日比一日差,應該可以引退休養下,但係形勢逼佢非要做第五任總統不可。有時做獨裁者都幾慘,欲罷不能,做到瓜為止!

關於老蔣連做五任總統,台灣民間偷偷流傳一個笑話,就係講蔣介石上左天堂,見到孫中山,孫中山就問佢中華民國行憲之後第一任總統係邊個?老蔣就答話係蔣中正,即係我。

孫中山就問第二任總統係邊個?老蔣答話係于右任,于右任係國民黨黨國元老,監察院院長,亦係著名書法家,大家可能睇過佢D字,于右任諧音意思係話余(我)又任總統。

于右任(余又任)

孫中山又問第三任總統係邊個?老蔣答話係吳三連,吳三連係台灣一個有錢佬,類似我地香港李嘉誠咁,吳三連又係諧音吾(我)第三次連任。

吳三連(吾三連)

孫中山再問第四任總統係邊個,老蔣答話係趙麗蓮,趙麗蓮係一位美國女教師,專教英文,長期居住台灣,佢個中文名係趙麗蓮,咁即係諧音照例連任咁解。

趙麗蓮(照例連)

孫中山跟住又問第五任總統係邊個,老蔣答話係趙元任,趙元任係中國著名語言學家,有首歌叫做教我如何不想他,就係佢所寫,趙元任又係諧音趙番原來個任咁解。

趙元任(照原任)

呢個笑話係諷刺老蔣死左仲要呃孫中山,唔俾孫中山知道佢係做左終身總統。

老蔣執權柄至死不放

老蔣七二年係有個計劃,就係要準備就任第五任總統時候,要任命蔣經國為行政院院長,呢個係傳子最重要一步,台灣行政大權將全部要由蔣經國掌握。

但係有個人要來改變老蔣呢個計劃,一九七二年元旦後冇幾日,呢個人就由美國飛抵台北松山機場,佢係乜水?佢叫做孔令侃,又叫孔大公子,佢係孔祥熙同宋靄齡嘅大仔,佢叫宋美齡做阿姨,叫蔣介石做姨丈,叫蔣經國做表哥。

呢個孔大公子曾在上海設立楊子建業股份有限公司,專門囤積居奇,謀取暴利。一九四八年國民政府推行新經濟政策,老蔣派蔣經國去上海打老虎,專門拉班囤積居奇嘅奸商。

蔣經國受到上海地頭蛇杜月笙嘅壓力,就拉左上海灘最大囤積商孔令侃,將楊子公司貨物全部查封。蔣經國拉邊個都冇問題,但係拉左孔大公子就有大麻煩。

宋美齡一生冇生育子女,佢將家姐宋靄齡嘅大仔孔令侃同第二女孔令偉即係孔二小姐當成寶貝,兩個人經常響宋美齡身邊,被稱為宋美齡嘅金童玉女。

孔令侃宋美齡孔令偉三人合照

宋美齡喺南京知道蔣經國拉左佢個寶貝外甥,極之憤怒,就由南京趕到上海,將囚禁中孔大公子帶走,並且向蔣介石告御狀。

蔣介石當時正響東北同共產黨打緊決生死一場仗,老蔣接到宋美齡急電,唯有丟低軍務,趕番上海處理家務,佢將蔣經國叫嚟省左佢一餐。

蔣經國打虎運動功敗垂成,國民政府新經濟政策含包散,一年後,國民黨冇左成個大陸,敗退台灣。國民黨內部百分之九十嘅人都認為老蔣失去大陸,主要都係俾孔宋兩個家族害死。

所以四九年後,孔祥熙同宋子文家族主要住在美國,孔令侃亦係偶然一兩次返回台灣探下阿姨宋美齡,佢同蔣經國因為四八年打虎事件,結成冤仇,見面係咁意禮貌上打個招呼,並冇深談,所以兩人心結繼續存在。

咁依家一九七二年一月初,為乜孔大公子會由美國飛嚟台北?佢實際上係接到宋美齡電話,話有緊要事要同佢密商而飛嚟台北,佢一到台北,先係入住佢個妹孔二小姐所揸fit嘅圓山飯店。

跟住,孔大公子搵個朝早上,趁蔣介石去總統府上班,就去士林官邸見宋美齡,兩人就響房間內密談左兩個鐘頭,孔大公子之後就離開士林官邸,番去圓山飯店。

當日中午,蔣介石照例由總統府番士林官邸食午飯,食完午飯就瞓一陣間晏教。

瞓完晏教,老蔣就會去書房,以前身體好嘅時候,佢會處理下公務,但係依家健康有問題,佢基本上會在書房內瞓響張沙發床睇報紙,呢個時候,宋美齡就行左入嚟。

士林官邸內貌

班侍衛見到宋美齡行入蔣介石書房,知道佢兩公婆有嘢要傾,大家就退出。

宋美齡坐低就開門見山咁對老蔣講:今年五月廿日你就要就任第五任總統,我依家就向你舉薦一個新嘅行政院院長人選,佢就係孔令侃!

老蔣一聽到宋美齡要舉薦孔大公子做行政院院長,佢就瞪大眼睛望住宋美齡,宋美齡就講:你唔洗咁瞪大眼睛望住我,我同你講,我知道呢幾十年嚟,傳媒以及反對分子都係講盡孔令侃嘅壞話,將佢全盤妖魔化,講到佢非常不堪。

查實孔令侃係一個奇才,佢係乜嘢出身?佢係美國哈佛大學高才生。抗戰時期,一九四三年我代表中華民國到美國訪問,受到美國朝野熱烈歡迎,我有得入住白宮貴賓客房,又有得到美國國會發表演說,呢D都係孔令侃幫我安排妥當。

當時佢響哈佛讀緊博士學位,佢就放棄左學業,做我呢個代表團秘書長,我所有演說講詞,都係由孔令侃親手所寫,其中唔少佳句俾美國主流報章引用。

孔令侃

我呢次訪美,使到我地中華民國由九流弱國即刻變成一流強國,成為ABC,three powers,羅斯福總統答應全力支持我地抵抗日本侵略,呢個都係孔令侃嘅功勞。

四九年之後,孔令侃繼續為中華民國外交打拼,華盛頓國會CHINA LOBBY,中國遊說團,就係佢一手一腳搞出嚟,收買國會議員同傳媒所用銀兩,都係由孔令侃自己淫荷包,冇孔令侃,米國佬早會響廿年前拋棄左我地。

孔令侃響外交上做左咁多貢獻,佢響政府並冇乜嘢官職,幾年前,你不過係好勉強咁任命佢做中華民國駐美國大使館參事,呢個職位同佢嘅貢獻係唔相符嘅!

依家七二年,我地中華民國外交正面臨一場生死決戰,對米國外交就需要一個了解米國又英文講得好咁樣人才嚟做行政院院長先至得,孔令侃長期居住米國,熟悉米國政情,唔搵佢搵邊個?

我知道你係想安排蔣經國做行政院院長,但係蔣經國英文唔掂,佢淨係依依哦哦識得俄文,佢嘅quali同孔令侃比就根本係蚊比同牛比。蔣經國連初中都未畢業,所謂去蘇聯留學,學到D乜嘢?就係學到共產黨果套殺人放火之嘛!

下個月尼克遜要去大陸同毛澤東勾搭,要應付尼克遜就必須要搵孔令侃出馬先至掂!

蔣介石一聽到宋美齡提到孔令侃以及尼克遜,就為之冒火三丈,佢就破口大罵,老蔣話:你唔提孔令侃同尼醜猶自可,一提到佢地,我就火滾!老蔣口中所講尼醜係指邊個呢?就係指尼克遜也!

蔣介石響佢日記入便有兩個米國佬係被佢稱為醜,一個係甘迺迪總統時期國務卿魯斯克,呢條友素來對中華民國唔友善,蔣介石響佢日記中就稱佢為魯醜。

蔣介石日記原本稱尼克遜為尼克森,呢個係台灣譯法,但係尼克遜響上一年即係七一年七月宣布要訪問大陸之後,老蔣就開始響日記稱佢為尼醜!

老蔣跟住對宋美齡講:一九五六年尼醜以米國副總統身份嚟台灣訪問,佢呢次嚟台灣做乜?佢係嚟化緣,佢係想我地俾筆巨款佢作為六零年競選總統費用。佢唔敢直接開口,淨係兜彎抹角暗示一番,我呢就詐傻扮懵唔明佢意思,冇俾到佢任何錢,搞到佢空手而回,從此對我地含恨在心。

尼克遜副總統與老蔣

點解我當時唔俾尼醜錢?就係因為你宋美齡話唔好俾錢佢,咁點解你話唔好俾錢佢,係因為你接到孔令侃個衰仔由米國打電話嚟叫我地唔好俾佢錢。孔令侃就話尼醜響米國政壇唔受歡迎,完全冇機會當選總統,唔好響佢身上浪費金錢。

尼醜六零年選唔到總統,但係佢結果響六八年競選成功,尼醜呢個契弟係個小人,非常之記仇。佢六九年一上任,就由背後插我地一刀,報一九五六年我地冇俾佢錢一箭之仇,呢個都係孔令侃個衰仔害我地,所以我響日記上寫左:「令侃之罪不小也!」

你依家仲敢推薦孔令侃出嚟做行政院院長?我點會答應?

蔣介石噴左宋美齡一臉屁,宋美齡就放軟聲氣咁講:既然你要俾蔣經國做行政院院長,咁我唔反對,依家大家各讓一步,我建議由孔令侃做行政院副院長,表哥做院長,表弟做副院長,兩兄弟拍住上,咁仲好喇!

老蔣又破口大罵:娘希匹!你都痴膠線!你明知蔣經國同孔令侃因為四八年打虎事件存在心結,佢兩個根本就唔啱key,依家你將佢兩個擺埋一齊,咁豈唔係要行政院日日打交,絕對唔得。

宋美齡跟住話,咁你起碼都要安排孔令侃做財政部部長,佢老豆孔祥熙大陸時期做過財政部長,老豆做得,點解個仔唔做得?

老蔣依然拒絕安排任何位置俾孔令侃,國民黨內部絕大部分人係非常憎孔宋家族嘅人,大家認為我地失去大陸大好河山,慘到流落台灣孤島,都係俾孔宋兩個家族所害,如果老蔣安排個位俾孔大公子,恐怕難以維繫台灣軍心民心,亦唔利於蔣經國接班。

蔣氏父子情深

宋美齡堅持要塞孔令侃入政府,係考慮到老蔣健康情況一日壞過一日,恐怕未做完第五任總統就會瓜老襯,到時政府全部係蔣經國嘅人,咁佢呢個皇太后就會喪失一切話事權,所以點都要想辦法俾自己家族嘅人霸番個位。

但係蔣介石呢個人有名叫,介石介石,其介如石,as hard as a rock,佢呢個人好頑固,唔輕易會屈服。宋美齡見講極都講唔掂,就對老蔣施展冷戰。

平時響士林官邸,午飯同晚飯,都係四個人食飯,老蔣、宋美齡、孔二小姐同佢圓山飯店助手蕭太太。宋美齡依家扭計話唔舒服,唔落嚟食飯,於是孔二小姐同蕭太太亦唔嚟食飯,餐餐得老蔣一支恭獨食,非常冇癮。

過去在大陸時期,如果蔣氏夫婦發生爭吵,宋美齡多數會離家出走去上海番娘家,老蔣過幾日就會屈服,自己打電話低聲下氣向宋美齡沙冧。

但係呢次反為係輪到老蔣離家出走,佢唔想再見到宋美齡呢個八婆,有咁遠走咁遠,就南下高雄休養左幾個星期,而且佢出左一個絕招,就係揚言唔鬼參選第五任總統,索性退休到底。

宋美齡一聽到老蔣有意唔再做總統,咁即係佢冇得做第一夫人,為左要塞孔令侃入政府,反而使到自己喪失第一夫人呢頂光環,咁樣值唔值得呢?於是,宋美齡唯有向老蔣沙冧,呢個亦係有史以來,蔣氏夫婦爭吵後,第一次係宋美齡屈服,兩夫妻於是和好如初。

老蔣夫婦感情和好時

一九七二年五月廿日,蔣介石就任第五任總統,為左遷就老蔣健康情況,就職典禮盡量缩短到得半個鐘頭,侍衛就響老蔣身後放置一張穩重嘅沙發椅來頂住佢雙小腿,咁樣支撐之下使到老蔣勉強完成就職大典。

典禮完畢之後,侍衛幫老蔣換衫,發現佢內衣襯衫全部濕晒。可見半個鐘頭典禮已經使到老蔣非常吃力。

就職典禮後冇幾日,榮民總醫院醫生又對蔣介石進行詳細檢查,御醫陳耀翰醫生睇完份檢查報告,非常緊張,佢對老蔣講:報告總統,依家睇落你心臟又進一步擴大,情況極為嚴重,我地醫生團一致認為總統必須自即日起完全停止一切公務活動,入住我地榮民總醫院特別病房徹底休養半年!

老蔣聽到之後,都幾擔心,就搵宋美齡商量,宋美齡一聽到陳耀翰醫生要求老蔣休養半年,為之大怒,佢將陳耀翰醫生叫埋嚟省左佢一餐。

宋美齡申斥陳耀翰醫生:你完全唔顧國家整體大局,隨便恐嚇總統,嚴重影響佢嘅情緒,係乜嘢居心?一旦總統休息半年,消息傳出左去,對國家安全同民心士氣會造成幾大影響,你有冇想像過?

要知道總統身繫中華民國前途,如果要佢休息半年,民心士氣受到重挫,敵人趁機坐大,你要唔要負起呢個責任?

陳耀翰醫生仲想辯解下,佢話係憑著醫生專業知識決定要總統休息半年。

宋美齡話你唔好同我講乜嘢專業,總統嘅情緒同國家嘅處境係更高於一切專業。

陳耀翰醫生俾宋美齡責罵,唯有自認倒霉,出番嚟嘆左一口氣,話都係自己衰多口,以後都唔再多講嘢。

不聽醫生言,吃虧在眼前,兩個月後,老蔣終於俾病魔所擊倒,從此就再企唔番起身。

蔣介石由一九一五年就開始寫日記,幾乎冇間斷咁寫左五十幾年,佢最後一篇日記係寫於一九七二年七月廿一日,呢一日佢淨係寫左兩句,話佢感覺身體非常唔舒服,之後,佢就再冇再寫日記。

呢個係因為第二日,即係一九七二年七月廿二日中午,老蔣響陽明山中興賓館食午飯,食得一半,突然將所食飯菜全部嘔番晒出嚟,呢個係從來未發生過。

陽明山中興賓館

老蔣話佢胃口唔好,唔想再食飯,侍衛就扶佢上床休息,御醫即刻齊集進行檢查,發現老蔣喘氣喘得比平時厲害,四五十分鐘之後,老蔣表示佢胸口悶,好唔舒服。

醫生覺得老蔣唔適宜平臥,就叫侍衛扶起老蔣,要佢坐番起身,點知呢個時候老蔣就陷入昏迷,就由呢一日開始,蔣介石名義上係中華民國總統,但係直到一九七五年四月五日逝世為止,呢兩年零八個月時間,佢冇再上過一日班,國家政務已經完全由蔣經國一手掌控。

八月六日,醫生將蔣介石由陽明山中興賓館搬去榮民總醫院第六病房,住院之後,蔣介石病情有所好轉。

呢次老蔣響榮民總醫院一直住到一九七三年十二月廿二日,總共係住院一年零四個月,在宋美齡堅持之下,再由醫院搬番士林官邸休養。因為長期臥床,蔣介石肌肉及關節都有所萎縮,需要進行物理治療。

因為老蔣病倒後,長期冇再出現公眾場合,乜嘢雙十國慶慶典,元旦慶典,佢都缺左席,引起民間唔少猜測,有人甚至話老蔣已經瓜老襯,只係秘不發喪而已。

宋美齡為左要向外界證明老蔣尚在人世,就安排左幾次露面場合。

第一次係第三孫蔣孝勇要結婚,就由蔣孝勇以及佢個新娘同蔣介石夫婦合影左一幅相,呢幅相就刊登響台灣各大報章上,台灣民眾睇到呢幅相,先至確認左老蔣仲未拉柴。

老蔣夫婦與蔣孝勇夫婦

跟住,宋美齡又安排第二孫蔣孝武抱住佢剛剛生左嘅BB與老蔣合照。

國民黨舉行中全會期間,主席團響陽明山中山樓拜見蔣介石,老蔣坐響處,同大家打招呼,傾左幾句。

另一次活動係屬於秘密性質,米國駐台北大使馬康衛要離任,佢向台北外交部表示想在離任前拜會下蔣介石。

我地知道,雖然尼克遜在一九七二年二月訪問北京,但係到訪問結束,米國並冇同大陸建立正式外交關係,因為大陸要求米國必須斷交,廢約及撤軍先至有得建交,尼克遜話佢會七三年連任總統後再啟動中米建交工程。

點知七三年尼克遜雖然連任,但係佢跟住俾水門事件所纏繞,冇法子分神啟動中米建交工程,而且冇幾耐,尼克遜就黯然落台,福特繼任亦唔敢在外交上輕舉妄動,所以到呢個時候,米國仍然同台北維持邦交關係。

馬康衛提出要見老蔣,理由充分,冇得拒絕,所以就安排馬康衛到士林官邸見老蔣,事前向馬康衛打左招呼,話老蔣只能夠坐響度同馬康衛握手,馬康衛話冇所謂,只有能見到老蔣本人,佢番米國可以向華盛頓報告老蔣健康真實情況就得嘞。

馬康衛行入士林官邸大客廳,同坐響度嘅老蔣握手,老蔣講左幾句,跟住全部對話由宋美齡同馬康衛之間進行,老蔣淨係微笑及點頭。

根據官方所公佈蔣介石醫療記錄,到一九七四年十二月一日為止,蔣介石病情係處於一個穩定狀態,淨係得一單嘢仲未解決,就係蔣介石肺積水問題。

班御醫認為老蔣肺積水雖然嚴重,但係暫時仲未威脅到佢生命安全,所以佢地認為採取穩陣嘅保守治療方式比較適宜,用藥物控制肺積水細菌唔再擴大範圍就算成功勒。如果採取積極手段,可能會弄巧反拙,會節外生枝。

但係有個人要改變御醫呢個治療方式,佢係邊個呢?佢就係孔二小姐。

講到孔二小姐,唔知點解,孔祥熙專生怪胎,佢個大仔孔令侃已經係怪胎,佢個第二女孔二小姐更加係怪胎中嘅怪胎。

我地睇過所有孔二小姐嘅相片,發現佢全部係女扮男裝,著西裝打領呔,疏起個男人西裝頭,不倫不類。本來有時女人扮成男人會好好睇,好似任劍輝、凌波、林青霞女扮男裝,都非常俊俏。

唯獨係孔二小姐女扮男裝,只會令人覺得作嘔,但係宋美齡就中意佢中意都發燒。

TOMBOY孔二小姐

關於孔二小姐傳聞非常多,最大單係發生在抗戰時期,當時佢嫌重慶太落後,連浴缸都冇,所以佢長期住響香港。但係一九四一年十二月八日架頭發動太平洋戰爭,攻打香港。

重慶國民政府派出架專機到香港啟德機場要接走滯留香港國民政府政要,班政要趕到啟德機場想坐呢架最後飛機走頭,點知見到孔二小姐已經將架飛機霸住,睇到佢班助手將十幾件大行李搬上飛機,仲包括埋個浴缸,更離譜係孔二小姐仲帶埋十七隻狗上機,飛機爆滿,班政要唯有睇住架機飛走。

呢班政要後來就自己設法由陸路水路離開香港,差D俾架頭捉左,幾經辛苦先至到達重慶,佢地向傳媒爆左呢單嘢,引起群情洶湧,個個大罵孔二小姐,孔二小姐照樣我行我素,唔理外界點樣評價佢。

孔二小姐唔單止女扮男裝,仲響個腰度掛把手槍,試過佢開快車,俾交通警察截查要抄佢牌,孔二小姐拔出手槍將個交通警察打瓜。

孔二小姐終身冇嫁到,但係佢同一個軍閥姨太太同居,出雙入對,如同夫婦。孔二小姐話男人可以三妻四妾,點解女人唔得?佢唔單止同呢個軍閥小老婆磨豆腐,有時會搵其他幾個女人齊齊玩3P 4P集體磨豆腐。

四九年後,孔二小姐跟孔祥熙去米國居住,六十年代初,宋美齡覺得寂寞,就叫孔二小姐來台灣陪佢,而且俾左個大project佢做,就係擴建台北圓山飯店,孔二小姐雖然荒唐,但係呢單嘢搞得幾成功,圓山飯店成為台灣一流國賓館。

圓山飯店

孔二小姐依家對宋美齡講,話佢大佬孔令侃響米國刮到個世界級名醫叫做哈醫生,專門醫治肺積水,響米國醫好唔少呢類病人。宋美齡素來崇拜米國,就話即刻重金禮聘呢個米國哈醫生嚟台灣為老蔣醫病。

孔二小姐與宋美齡

有錢使得鬼推磨,果然重金之下,米國哈醫生響一九七四年十一月底到達台北,佢到士林官邸檢查老蔣,並且睇過老蔣病歷。哈醫生就對宋美齡講,病人目前處於相對穩定狀態,正係實施抽出肺積水最佳時機。哈醫生話打保票,一抽出肺積水,蔣介石就會完全康復。

但係班御醫極力反對,佢地話一動不如一靜,依家用藥物控制住肺積水內細菌,唔俾佢地擴散就已經阿彌陀佛。就好似派官兵圍住班山賊困響賊竇內唔俾佢地出嚟就算成功嘞。

如果強行抽出肺積水,話唔埋D細菌趁機四圍擴展,會造成大面積感染,就好似俾班山賊走出賊竇,變成流寇,四圍咁捐,咁仲大鑊。

宋美齡唔肯聽,決定十二月一日中午召開一次聯席會議,參加會議係宋美齡,蔣經國,米國哈醫生同埋班御醫。

米國哈醫生首先企起身講述抽出肺積水原理、過程同功效,全部係醫藥名詞,蔣經國英文水平有限,聽到頭爆。蔣經國當時全副精神搞緊十大經濟建設,又要上山下鄉,訪貧問苦,忙到不得了,開呢次會,佢感到頭昏眼花,冇法子下判斷。

哈醫生講完,宋美齡就話大家唔好再反對呢次手術,要相信米國醫學水平高過我地好多。

 宋美齡以高姿態問蔣經國你點睇,蔣經國唯有答話一切請母親決定喇,班御醫見到蔣經國都屈服,唔敢再出聲。

因為人地米國醫生喺米國病人多到排期到明年,佢當晚就會飛番米國,所以就即日下午響士林官邸蔣介石臥室進行呢次手術。

先係由侍衛同護士將仰臥嘅蔣介石扶起變成側臥,然後哈醫生用一枝長針筒由蔣介石背脊插入佢肺部,先後抽左幾次,總共抽左幾百CC肺積水,睇落呢個手術都幾騎呢,咁我興叔都可以做哈醫生,成為醫治肺積水專家矣!

咁騎呢嘅嘢,居然發生在元首身上,真係不可思議。哈醫生之後宣布手術非常成功,話過兩日蔣介石就可以同普通人一樣正常活動。

哈醫生當晚就收完手術費,即刻坐飛機番米國,當佢飛機起飛冇幾耐,蔣介石病情就急轉直下,發起高燒,燒到四十一度,班御醫所擔心嘅情況終於出現,蔣介石肺部大面積感染,變成肺炎,佢地唯有盡量幫米國醫生抹屎忽。

蔣介石官方醫療報告一直隱瞞米國哈醫生曾經為老蔣抽肺積水呢件事,因為會牽涉到宋美齡,唔方便講。咁點樣解釋明明七四年十二月一日前老蔣病情趨向穩定,點解之後又會惡化?

官方解釋係七四年十二月台灣出現流行性感冒,老蔣受到感染,所以出現病情逆轉咁講,但係查核當時台灣並冇流行性感冒出現過,官方係用呢個藉口來掩飾宋美齡同孔二小姐所犯錯誤。

外界對於呢件事真相並唔了解,係到近年蔣介石侍衛接受傳媒訪問時爆左出嚟,大家先至知道呢兩個無知婦人點樣害死老蔣。

老蔣病情一直惡化落去,到一九七五年四月五日,當日上午,老蔣突然精神番,講話要坐起身,但係冇幾耐又話要瞓低,但係之後又話要坐起身,反反覆覆多次,顯得非常煩躁,到夜晚六點鐘,老蔣開始唔講得嘢。

八點鐘御醫發覺老蔣心臟跳動緩慢,就進行急救,一直搶救到十一點五十分,其實老蔣早已冇生命跡象,但係班御醫唔敢停,繼續用電擊,將老蔣胸部擊到焦黑色。

呢個時候,宋美齡突然大喝一聲:夠嘞!班御醫先至敢停手,就正式宣布老蔣死亡。

四月五日日頭台北風和日麗,天氣非常好。但係夜晚當老蔣斷氣果個時刻,突然狂風暴雨,行雷閃電,大家話係天神歸位也!

呢篇嘢係幾年前在網台講稿,依家炒冷飯再度呈獻!

老蔣升天後,佢生平死對頭共慘黨有乜嘢反應?

《人民日報》發表左一則題為《蔣介石死了》嘅報導,放在第四版(末版)刊出。

呢篇報導一開頭就話:「國民黨反動派的頭子、中國人民的公敵蔣介石,四月五日在臺灣病死。」

跟住篇報導簡單咁講述對老蔣評價:「蔣介石自從一九二七年背叛孫中山先生領導的民主革命以來,一直作為帝國主義、封建主義和官僚資本主義在中國的代表,堅持反共反人民,獨裁賣國。他雙手沾滿了中國革命人民的鮮血。但是他的血腥統治始終未能阻擋歷史車輪的前進。」

報導末尾稱:「中國人民一定要解放臺灣!」

呢個係大陸官方傳媒唯一一篇有關老蔣駕崩嘅報導,之後就冇任何follow up,在大陸尚處於文革期間,算係低調反應也!