1973年8月24日至28日，中國共產黨第十次全國代表大會在北京召開，呢個係大陸文革十年期間內第二次召開大會，係屬於比較唔正常一次會議。

大會除左要選新中央政治局成員外，仲要選出新一屆中央委員，在候選名單內赫然出現「王稼祥」呢個名，唔少出席會議者頗感意外，點解？

因為王稼祥在文革期間遭到極為嚴厲批判，被指係走資派嘅首犯，原因係在1962年時任中央書記處書記及中聯部部長嘅王稼祥，寫左封有關中共外交政策建議信。

王稼祥認為當時中國大陸正處於極端困難期，對外關係方面應該採取緩和而非緊張政策，繼續堅持和平共處外交方針，在國際鬥爭中唔好要四面樹敵，同時佢提出中國對外援助應「實事求是，量力而行」。

呢封信毛澤東閱後為之龍顏大怒，佢指責王稼祥主張係對帝國主義要和，對修正主義要和，對印度及各國反動派要和，對支持民族解放運動要少，咁樣即係「三和一少」也！

皇帝一出聲，王稼祥即刻被放入雪櫃冷藏冇得撈矣！

文化大革命一爆發，王稼祥當然在劫難逃，被紅衛兵連番批鬥，1968年4月被隔離審查。

1969年10月被下放到河南信陽，到1970年年底獲得恩准回北京治病。

林彪事件後，中共黨內政治氣氛稍為緩和，1972年5月王稼祥寫信俾黨中央、毛澤東，要求分配工作。

依家中共十大終於將會選王稼祥為中央委員，周恩來奉聖旨要向各代表解釋，老周話毛主席多次講過：王稼祥在遵義會議上投關鍵一票，有功於黨，當中央委員絕對冇問題也！

大家見皇帝出金口，點敢話唔得？王稼祥自然順利當上中央委員，唔係再係人人喊打嘅走資派矣！

咁究竟毛澤東所講遵義會議上王稼祥投關鍵一票係乜嘢一回事?依家且聽老夫慢慢道來。

1931年6月22日，中共中央總書記向忠發俾刮民黨周左去洗頭仲跟住槍斃，由莫斯科控制共產國際舉留俄派王明為總書記，是為留俄派王明路線開始統治中共時期。

王明係個精人，佢覺得留在上海分分鐘會俾刮民黨拉去洗頭，好漢不吃眼前虧，卅六計走為上計，佢搵個藉口就溜番莫斯科食俄國大餐，上海中共中央檔攤就交俾另一留俄派同黨博古(秦邦憲)揸fit，實際上大權仍然由王明遙控。

王明路線講白一句就係：左傾盲動冒險主義，咁樣搞法，冇幾年中共中央已經無法在上海立足，博古本人亦在1933年初前往中央蘇區瑞金以策安全。

本來中央蘇區軍政大權係在毛澤東手上，但係博古係頂頭上司，佢對毛澤東游擊戰策略極為反對，認為毛澤東靠三國演義水滸傳孫子兵法打仗唔夠專業。

在博古要求下，共產國際在1933年9月派左個德國佬李德來到中央蘇區，李德係軍事學校畢業專家，擅長打城市街頭戰，佢就以中華蘇維埃共和國中央軍事委員會軍事顧問身份控制紅軍指揮權，老毛被炒魷投閒置散。

在中央蘇區第五次反「圍剿」中，因博古盲目聽從李德以硬碰硬打陣地戰策略，紅軍損失慘重，蘇區掌控範圍一日缩過一日。

到1934年10月，紅軍已經無法在中央蘇區存身，就開始所謂二萬五千里長征，講係長征，實際上係較腳走佬也！

屬於留俄派王稼祥在1933年4月，曾遇空襲被炸穿左條腸——在冇麻藥情況下，忍著劇痛經歷左八小時手術，但係無法取出彈片，只好採取保守療法，在肚皮插左條管。

所以長征途中，王稼祥係由幾個擔架員抬著行軍，走進廣西時，佢見部隊由贛南出發時八萬多人到依得只剩三萬多，佢焦急萬分。

呢個時候，毛澤東亦因病重要坐擔架，行軍路上，毛王兩人並排走埋一齊，使佢地可以有充裕時間議論黨及紅軍大事。

王稼祥非常憂慮咁對毛講：咁樣搞落去，紅軍好快會玩完也！應該趕唔瞭解中國國情嘅德國佬李德下臺。

佢乾脆表示，要將博古及李德「轟」落台！

毛澤東雖然表示贊同，但係佢擔心票數唔夠，未必做得到。

王稼祥拍心口話佢會進行遊說，務必取得多數人支持。

咁啱另一留俄派張聞天亦因病要坐擔架，王稼祥就向佢表示到達遵義之後要開一次會，總結呢幾年軍事路線，而張聞天話佢同樣表示考慮呢個問題，贊成要開呢次會議。

聶榮臻在行軍途中扭親隻腳，要坐擔架，王稼祥對聶榮臻講博古與李德唔掂，必須改組領導，要恢復毛澤東領導地位。

就咁樣，在留俄派王稼祥及張聞天遊說下，已經獲得黨內多數人支持隊冧留俄派博古及李德，當然呢兩條友對於背後陰毛係一無所知！

1935年1月，紅軍攻占貴州遵義城，由於白天要集中精力指揮部隊作戰，所以會議都係在晚上召開。

參加會議中共中央政治局委員有：張聞天、毛澤東、周恩來、博古、朱德、陳雲；政治局候補委員有：王稼祥、鄧發、劉少奇、凱豐（何克全），仲有中央秘書長鄧小平。

再加上紅軍總部及各軍團負責人：劉伯承、林彪、李富春、聶榮臻、彭德懷、楊尚昆，李卓然（唔係李卓人）。

德國佬李德亦出席會議，由伍修權擔任翻譯。

會議由博古主持，佢首先作報告，主要內容係強調唔能夠粉粹第五次圍剿嘅原因，係客觀上不利嘅因素，黨中央軍事路線並冇錯。

博古講完，由周恩來作補充報告。

接住就係重頭戲，毛澤東企起身講話，佢媽叉博古、李德在蘇區所提出「禦敵於國門之外」、「唔放棄蘇區一寸土地」及「短促出擊」等策略，對左傾冒險主義路線進行針鋒相對及有力批判。

毛澤東一講完，王稼祥第一個發言支持毛澤東，佢指出博古及李德的確在軍事指揮上有嚴重錯誤，表示要擁護毛澤東出來再領導紅軍。

張聞天跟住表態，佢同意毛澤東及王稼祥意見，亦對博古及李德進行批判。

周恩來同樣話佢要求毛澤東重新指揮紅軍，態度非常堅定及誠懇。

政治局委員一面倒支持毛澤東恢復軍事領導地位，會場意見就好容易咁統一起來，其他大部分參加會議者均紛紛表態支持。

會議期間，李德坐在靠門口地方，一言不發，只係猛咁食煙仔，情緒非常低落。

到最後一日，會議討論中央領導機構改組，毛澤東擔任中共中央軍委主席，周恩來及王稼祥任副主席，由佢地三人成立一個軍事指揮小組。

張聞天則被選為中共中央總書記，主持黨中央日常工作。

由於長征途中主要要應付問題全部與軍事有關，毛澤東掌握左軍權，就等於確立毛澤東在黨內實際領導地位。

由遵義會議開始，毛澤東就一直掌控中共最高權力到佢1976年9月9日瓜老襯為止。

老毛所講王稼祥在遵義會議上投關鍵一票由來講能完！

遵義會議係中共建黨以來第一次冇受到莫斯科共產國際干預下之會議，意義非凡，顯示出中共獨立路線。

點解莫斯科呢次會干預唔到遵義會議？原因係中央紅軍開始長征時，好衰唔衰，共產國際在上海地下電台被破獲，負責人俾拉去洗頭，中央紅軍就咁同共產國際失去聯繫，長征途中請示無門，對唔治，唯有自把自為矣！

以後中共中央開會一概唔柒聽莫斯科支笛，因為遵義會議已經造成先例也！俄國佬冇乜符矣！老毛想點都得，吹咩？